தேர்தல் தோல்வியின் வடு மறையும் முன்பே, திமுகவின் உயர்நிலைச் செயற்குழுக் கூட்டம் சனிக்கிழமை கூடவுள்ளது. கட்சிக்குள்ளும், ஆட்சியிலும் அதிரடி மாற்றங்களைச் செய்யத் தலைமை தயாராகி வரும் நிலையில், மூத்த அமைச்சர்களின் “மென்மையான” போக்கும், மாற்றுக்கட்சிகளுடன் நிலவும் “மர்மமான” இணக்கமும் தொண்டர்கள் மத்தியில் பெரும் கொந்தளிப்பை ஏற்படுத்தியுள்ளது.
பதவிக்காக கட்சியை அடமானம் வைக்கிறார்களா?
ஊடகவியலாளர் சுமன் கவி, சமீபத்திய நேர்காணலில் திமுகவின் இன்றைய நிலையைச் சாடியுள்ளார். தேர்தல் தோல்விக்குப் பிறகு கட்சித் தலைமை தன்னைத் திருத்திக்கொள்ள முயலும்போது, அமைச்சர்கள் சிலரோ தங்களின் தனிப்பட்ட லாபத்திற்காகக் கட்சியைப் பலிகொடுப்பது போலச் செயல்படுகின்றனர்.
தேர்தல் பத்திரங்கள் சர்ச்சையில் சிக்கிய மாற்றுக்கட்சியினருடன், ‘மச்சான்-மாமன்’ உறவு கொண்டாடும் வகையில் அமைச்சர்கள் பேசுவது, திமுகவின் அறச்சீற்றத்தைத் தணித்துவிட்டது. பதவி மற்றும் சொத்துகளைக் காக்கக் கட்சிக் கொள்கைகளை மறந்து, கொள்கை எதிரிகளிடம் வளைந்து கொடுப்பது ஒட்டுமொத்த திமுகவுக்கும் இழைக்கப்படும் துரோகம்,” என அவர் காட்டமாக விமர்சித்துள்ளார்.
’கூட்டணி’ என்ற மாயை – இது தற்கொலை முயற்சி!
மத்திய அமைச்சரவையில் இணைய திமுக ஆர்வம் காட்டுவதாகச் சமூக வலைதளங்களில் உலவும் தகவல்களைச் சுமன் கவி கடுமையாக எதிர்க்கிறார். “பாஜகவுடன் கை கோர்ப்பது என்பது திமுகவுக்கு அரசியல் தற்கொலையாகவே முடியும். மாநிலக் கட்சிகளைத் தன் கால்டியில் கொண்டு வந்து, இறுதியில் அந்தந்தக் கட்சிகளை அழித்துவிட்டு, அதன் எம்பிக்களை மட்டும் கபளீகரம் செய்யும் பாசிசப் போக்குக்கு திமுக அடிபணியக் கூடாது. ஒருவேளை இணக்கமான அரசியல் மூலம் தப்பித்துக்கொள்ளலாம் எனச் சில சீனியர்கள் கருதினால், அது திமுக என்னும் மாபெரும் இயக்கத்தையே வரலாறு காணாத சரிவுக்குத் தள்ளும்,” என எச்சரித்தார்.
கட்சியைச் சீரமைப்பாரா உதயநிதி?
நிர்வாக மாற்றங்கள் குறித்துப் பேசிய அவர், “மாவட்டச் செயலாளர்களின் எண்ணிக்கையை அதிகரிப்பதும், புதிய நிர்வாகிகளை நியமிப்பதும் ஒரு சிறிய ஆறுதலைத் தரலாம். ஆனால், உதயநிதி ஸ்டாலின் அடுத்தகட்டத் தலைவராக உருவெடுக்க வேண்டியது காலத்தின் கட்டாயம். கட்சியை முழுவதுமாகத் தன் கட்டுப்பாட்டுக்குள் கொண்டு வந்து, தன்னிச்சையான லாபிகளுக்கு இடங்கொடுக்காமல், ஒழுக்கமான நிர்வாகத்தைக் கொண்டு வந்தால் மட்டுமே திமுகவின் வீழ்ச்சியைத் தடுத்து நிறுத்த முடியும்,” என்று திட்டவட்டமாகக் கூறினார்.
அதிகாரம் இல்லாதபோதும் மக்கள் திமுகவையே நம்புகின்றனர்!
திமுகவின் செல்வாக்கு குறித்துப் பேசிய அவர், “தேர்தலில் தோல்வியடைந்தாலும், மக்கள் இன்றும் தங்களின் துயரங்களுக்குத் திமுகவைத்தான் முதல் முகவரியாகத் தேடுகின்றனர். இந்த மக்கள் செல்வாக்கைவிட, பாஜக கூட்டணியோ அல்லது வேறு குறுக்கு வழிகளோ பெரிதல்ல. இதை உணர்ந்து, அமைச்சர்கள் தேவையற்ற வதந்திகளையும், இழிவான பேச்சுக்களையும் கைவிட்டு, மீண்டும் மக்கள் நலனுக்காகக் களத்தில் இறங்கினால் மட்டுமே திமுகவுக்கு மீண்டெழுதல் சாத்தியம்,” என்று எச்சரிக்கையுடன் முடித்தார்.
இன்றைய செயற்குழுக்கூட்டத்தில் எடுக்கப்படும் முடிவுகள், திமுகவை மீண்டும் பழைய கம்பீரத்திற்கு கொண்டு வருமா அல்லது சரிவை நோக்கி இழுத்துச் செல்லுமா என்பது தொண்டர்களின் பெரும் கேள்வியாக உள்ளது.
தொகுதி மறுவரையறை: காங்கிரஸ் கட்சிக்கு தயாநிதி மாறன் கடும் கண்டனம்!