தமிழ்நாட்டில் வடகிழக்கு பருவமழை தொடங்க உள்ள நிலையில், அதனை எதிர்கொள்வதற்கான முன்னெச்சரிக்கை நடவடிக்கைகள் குறித்து முதலமைச்சர் ச. ஜோசப் விஜய் தலைமையில் சென்னை தலைமைச் செயலகத்தில் முக்கிய ஆலோசனைக் கூட்டம் நடைபெற்றது. கடலோர மற்றும் காவிரி டெல்டா மாவட்டங்களில் மேற்கொள்ள வேண்டிய முன்னெச்சரிக்கை நடவடிக்கைகள் குறித்தும் கூட்டத்தில் ஆய்வு செய்யப்பட்டது.
இந்த ஆலோசனையில் அமைச்சர்கள், தலைமைச் செயலாளர் மற்றும் பல்வேறு துறைகளைச் சேர்ந்த உயர் அதிகாரிகள் பங்கேற்றனர். மாவட்ட ஆட்சியர்களும் காணொலி காட்சி வாயிலாக கலந்து கொண்டனர்.
வெள்ளப்பாதிப்பு ஏற்படும் பகுதிகளை முன்கூட்டியே கண்டறிய உத்தரவு
வடகிழக்கு பருவமழையின்போது ஏற்படக்கூடிய வெள்ளம் மற்றும் கடல்நீர் உட்புகுதல் உள்ளிட்ட பாதிப்புகளைத் தவிர்க்க, பாதிப்புக்கு உள்ளாகக்கூடிய பகுதிகளை முன்கூட்டியே கண்டறிய முதலமைச்சர் விஜய் அறிவுறுத்தியுள்ளார்.
கடல்நீர் உட்புகும் பகுதிகள், கடல் அரிப்பு ஏற்படும் இடங்கள் மற்றும் வெள்ளப்பாதிப்பு ஏற்படக்கூடிய பகுதிகளை அடையாளம் காணவும், கடலோர கிராமங்கள் மற்றும் அங்கு வசிக்கும் மக்களின் விவரங்கள் தயாராக இருப்பதை உறுதி செய்யவும் அதிகாரிகளுக்கு அறிவுறுத்தப்பட்டதாக தெரிவிக்கப்பட்டுள்ளது.
நீர்நிலைகள் தூர்வாரும் பணிகளுக்கு முக்கியத்துவம்
மழைக்காலத்தில் வெள்ளப்பாதிப்பை குறைக்கும் வகையில் நீர்நிலைகளை தூர்வாருதல், ஆகாயத் தாமரை மற்றும் ஆக்கிரமிப்புகளை அகற்றுதல் உள்ளிட்ட பணிகளை விரைவுபடுத்துவது குறித்தும் ஆலோசிக்கப்பட்டது.
மேலும், மழை மற்றும் வெள்ளம் காரணமாக பாதிப்பு ஏற்பட்டால் உடனடியாக மீட்புப் பணிகளை மேற்கொள்ளும் வகையில் மீட்பு உபகரணங்கள் மற்றும் பணியாளர்களை தயார் நிலையில் வைத்திருப்பது குறித்தும் ஆலோசனை நடைபெற்றது.
டெங்கு தடுப்பிலும் தீவிர கவனம்
தமிழ்நாட்டில் டெங்கு பாதிப்பு அதிகரித்து வரும் நிலையில், அதனை கட்டுப்படுத்துவதற்கான நடவடிக்கைகள் குறித்தும் கூட்டத்தில் ஆய்வு செய்யப்பட்டது. மாநில அளவில் டெங்கு காய்ச்சல் நிலவரத்தை தொடர்ந்து கண்காணிக்கவும் முதலமைச்சர் விஜய் அறிவுறுத்தியதாக தெரிவிக்கப்பட்டுள்ளது.
கொசு உற்பத்தியை கட்டுப்படுத்துதல், கொசு ஒழிப்பு பணிகளை தீவிரப்படுத்துதல் மற்றும் பொதுமக்களிடையே டெங்கு தடுப்பு குறித்த விழிப்புணர்வை ஏற்படுத்துதல் உள்ளிட்ட நடவடிக்கைகளுக்கும் முக்கியத்துவம் அளிக்கப்பட்டுள்ளது.
தமிழ்நாட்டில் 17 ஆயிரத்துக்கும் மேற்பட்டோர் பாதிப்பு
செப்டம்பர் 21-ம் தேதி வெளியான தகவலின்படி, தமிழ்நாட்டில் இந்த ஆண்டு இதுவரை 17,000-க்கும் மேற்பட்டோர் டெங்கு காய்ச்சலால் பாதிக்கப்பட்டுள்ளனர். செப்டம்பர் மாதத்தில் பாதிப்பு அதிகரித்து வருவதால் தடுப்பு நடவடிக்கைகள் தீவிரப்படுத்தப்பட்டுள்ளன.
சென்னை, செங்கல்பட்டு, கோவை, திருவண்ணாமலை, கிருஷ்ணகிரி, சேலம், திருவள்ளூர், காஞ்சிபுரம், தஞ்சாவூர் மற்றும் விழுப்புரம் உள்ளிட்ட மாவட்டங்களில் டெங்கு பாதிப்பு அதிகமாக இருப்பதாக சுகாதாரத்துறை தகவல்கள் தெரிவிக்கின்றன.
மீட்பு மற்றும் நிவாரணப் பணிகளுக்கும் தயார் நிலை
மழையால் பாதிப்பு ஏற்படும் பகுதிகளில் முன்கூட்டியே மீட்புப் படையினரை பணியமர்த்துதல், நிவாரண மையங்களில் மின்சாரம், குடிநீர், உணவு உள்ளிட்ட அடிப்படை வசதிகளை உறுதி செய்தல் ஆகியவை குறித்தும் ஆலோசிக்கப்பட்டுள்ளது.
வடகிழக்கு பருவமழையை எதிர்கொள்ளும் வகையில் பல்வேறு துறைகள் ஒருங்கிணைந்து செயல்படுவதற்கான முன்னேற்பாடுகள் மேற்கொள்ளப்பட்டு வருகின்றன.