மனமகிழ் மன்றங்களுக்கான சிறப்புக் கட்டணம் இருமடங்காக உயர்வு: தமிழக அரசு அதிரடி உத்தரவு

தமிழகத்தில் மனமகிழ் மன்றங்கள் (Recreation Clubs) தொடங்குவதற்கான சிறப்புக் கட்டணத்தை இருமடங்காக உயர்த்தி தமிழக அரசு உத்தரவிட்டுள்ளது. இது தொடர்பான அதிகாரப்பூர்வ அறிவிப்பு அரசிதழில் (Gazette) வெளியிடப்பட்டுள்ளது. முன்னதாக, சென்னை உள்ளிட்ட பகுதிகளில் மனமகிழ் மன்றம் தொடங்க சிறப்புக் கட்டணமாக 15 லட்சம் ரூபாய் வசூலிக்கப்பட்டு வந்த நிலையில், தற்போது அது அதிகபட்சமாக 30 லட்சம் ரூபாயாக உயர்த்தப்பட்டுள்ளது.
​

புதிய கட்டண விவரங்கள் (பகுதி வாரியாக):
​தமிழக அரசு வெளியிட்டுள்ள புதிய உத்தரவின்படி, மக்கள் தொகை மற்றும் பகுதிகளின் அடிப்படையில் சிறப்புக் கட்டணங்கள் மாற்றி அமைக்கப்பட்டுள்ளன:
​

சென்னை மாநகராட்சி:
சிறப்புக் கட்டணம் 15 லட்சம் ரூபாயில் இருந்து 30 லட்சம் ரூபாயாக உயர்த்தப்பட்டுள்ளது.
​பெரிய மாநகராட்சிகள் (10 லட்சத்திற்கும் அதிக மக்கள் தொகை): சென்னை தவிர்த்து, 10 லட்சத்திற்கும் அதிகமான மக்கள் தொகை கொண்ட மாநகராட்சிகளில் கட்டணம் 25 லட்சம் ரூபாயாக நிர்ணயிக்கப்பட்டுள்ளது. இதர மாநகராட்சிகள் (10 லட்சத்திற்கும் குறைவான மக்கள் தொகை): இத்தகைய மாநகராட்சிப் பகுதிகளில் சிறப்புக் கட்டணம் 20 லட்சம் ரூபாயாகும்.
​நகராட்சிகள்: நகராட்சிப் பகுதிகளில் மனமகிழ் மன்றங்கள் அமைக்க 15 லட்சம் ரூபாய் சிறப்புக் கட்டணமாக வசூலிக்கப்படும்.
​இதர பகுதிகள்: பேரூராட்சிகள் மற்றும் கிராமப்புறங்கள் உள்ளிட்ட மற்ற இடங்களில் 10 லட்சம் ரூபாய் கட்டணமாக நிர்ணயம் செய்யப்பட்டுள்ளது.
​

முந்தைய கட்டண முறை:
இதற்கு முன்னதாக சென்னை மாநகராட்சியில் மனமகிழ் மன்றம் தொடங்க 15 லட்சம் ரூபாயும், தமிழகத்தின் மற்ற அனைத்துப் பகுதிகளுக்கும் சேர்த்து பொதுவாக 10 லட்சம் ரூபாயும் மட்டுமே சிறப்புக் கட்டணமாக இருந்தது குறிப்பிடத்தக்கது.
​

விண்ணப்பம் மற்றும் அனுமதி கட்டணத்தில் மாற்றமில்லை:
​சிறப்புக் கட்டணம் இருமடங்காக உயர்த்தப்பட்டிருந்தாலும், அவற்றுக்கான விண்ணப்பக் கட்டணம் மற்றும் உரிம அனுமதி கட்டணத்தில் எந்த மாற்றமும் செய்யப்படவில்லை. அதன்படி: விண்ணப்பக் கட்டணம்: 10,000 ரூபாய். அனுமதி கட்டணம்: 30,000 ரூபாய் என்ற பழைய கட்டணமே தொடர்ந்து நீடிக்கும் என அறிவிக்கப்பட்டுள்ளது. ​தற்போது தமிழகம் முழுவதும் FL-2 உரிமம் பெற்ற மொத்தம் 863 மனமகிழ் மன்றங்கள் செயல்பட்டு வருவது குறிப்பிடத்தக்கது.