ஏமனில் ஹவுதி கிளர்ச்சியாளர்களின் தாக்குதல்கள் மற்றும் செங்கடல் பகுதியில் அவர்களின் முன்னேற்றம் தீவிரமடைந்துள்ள நிலையில், சவுதி அரேபியா தனது முக்கியமான 1,200 கி.மீ. நீளமுள்ள கிழக்கு-மேற்கு கச்சா எண்ணெய் குழாய் இணைப்பை மூடியுள்ளது. இதனால் சர்வதேச கச்சா எண்ணெய் விநியோகத்தில் பெரும் பாதிப்பு ஏற்படும் அபாயம் உருவாகியுள்ளது.
1,200 கி.மீ. எண்ணெய் குழாய் மூடல்
சவுதி அரேபியாவின் கிழக்குப் பகுதியில் இருந்து செங்கடல் கரையில் உள்ள யன்பு துறைமுகம் வரை செல்லும் இந்த கிழக்கு-மேற்கு எண்ணெய் குழாய், ஹார்முஸ் ஜலசந்தியை தவிர்த்து எண்ணெயை ஏற்றுமதி செய்ய சவுதிக்கு முக்கிய மாற்றுப் பாதையாக இருந்து வருகிறது.
சுமார் 1,200 கி.மீ. நீளமுள்ள இந்த குழாய் வழியாக நாளொன்றுக்கு சுமார் 40 முதல் 50 லட்சம் பேரல் வரை கச்சா எண்ணெயை கொண்டு செல்லும் திறன் உள்ளது. இது உலகளாவிய எண்ணெய் விநியோகத்தில் சுமார் 4 சதவீதத்திற்கு இணையான அளவாகும்.
ட்ரோன் தாக்குதலுக்கு பிறகு நடவடிக்கை
குழாய் பாதையில் உள்ள முக்கிய பம்பிங் நிலையம் ட்ரோன் தாக்குதலில் கடுமையாக சேதமடைந்ததாக செயற்கைக்கோள் படங்கள் காட்டுகின்றன. தாக்குதலுக்குப் பிறகு ஏற்பட்ட தீ மற்றும் சேதம் காரணமாக எண்ணெய் குழாய் செயல்பாடு நிறுத்தப்பட்டுள்ளது.
இந்த தாக்குதலுக்கு ஈரான் ஆதரவு ஹவுதிகள் தொடர்புடையதாக பிராந்திய அளவில் குற்றச்சாட்டுகள் எழுந்துள்ளன. அதேநேரத்தில், சவுதி அதிகாரிகள் தாக்குதலில் பயன்படுத்தப்பட்ட ட்ரோன்கள் ஈராக் பகுதியிலிருந்து வந்ததாக குற்றம்சாட்டியுள்ளதாக சர்வதேச செய்திகள் தெரிவிக்கின்றன.
செங்கடலில் ஹவுதிகளின் ஆதிக்கம்
யேமனின் செங்கடல் கடற்கரைப் பகுதிகளில் ஹவுதிகளின் முன்னேற்றம் அதிகரித்துள்ளது. முக்கியமான பாப் எல்-மண்டேப் நீரிணைப்பை ஒட்டிய பகுதிகளிலும் அவர்களின் கட்டுப்பாடு விரிவடைந்து வருவது சர்வதேச கப்பல் போக்குவரத்துக்கு கவலையை ஏற்படுத்தியுள்ளது.
ஹார்முஸ் ஜலசந்தி ஏற்கெனவே மோதல்களால் பாதிக்கப்பட்டுள்ள சூழலில், பாப் எல்-மண்டேப் பகுதியிலும் பாதுகாப்பு அச்சுறுத்தல் அதிகரிப்பது உலகளாவிய எரிசக்தி விநியோகத்திற்கு கூடுதல் சிக்கலை உருவாக்குகிறது.
உலக எண்ணெய் சந்தையில் அதிர்வு
சவுதியின் முக்கிய எண்ணெய் குழாய் மூடப்பட்டதால், சர்வதேச சந்தையில் கச்சா எண்ணெய் விலை வேகமாக உயர்ந்துள்ளது. பிரெண்ட் கச்சா எண்ணெய் விலை ஒரு கட்டத்தில் 108 டாலரைத் தாண்டியது.
இந்த குழாய் விரைவாக மீண்டும் செயல்பாட்டுக்கு வராவிட்டால், சவுதியின் செங்கடல் துறைமுகங்களில் உள்ள ஏற்றுமதி கையிருப்பு சில நாட்களிலேயே குறைந்து போகும் அபாயம் இருப்பதாக எண்ணெய் வர்த்தகர்கள் மற்றும் ஆய்வாளர்கள் எச்சரித்துள்ளனர்.
இந்தியாவுக்கும் பாதிப்பு ஏற்படுமா?
சவுதி அரேபியாவிலிருந்து பெருமளவில் கச்சா எண்ணெயை இறக்குமதி செய்யும் நாடுகளில் இந்தியாவும் முக்கியமானது. எனவே சர்வதேச கச்சா எண்ணெய் விலை தொடர்ந்து உயர்ந்தால், இந்தியாவின் எண்ணெய் இறக்குமதி செலவு அதிகரிக்க வாய்ப்புள்ளது.
கச்சா எண்ணெய் விலை உயர்வு நீடித்தால் பெட்ரோல், டீசல், போக்குவரத்து மற்றும் உற்பத்திச் செலவுகளில் அழுத்தம் ஏற்படுவதுடன், பணவீக்கத்திலும் தாக்கம் ஏற்படக்கூடும்.
எண்ணெய் விநியோகத்துக்கு புதிய நெருக்கடி
ஹார்முஸ் மற்றும் பாப் எல்-மண்டேப் ஆகிய இரு முக்கிய கடல்வழிப் பாதைகளிலும் ஏற்பட்டுள்ள பதற்றத்துடன், சவுதியின் மாற்று எண்ணெய் ஏற்றுமதி பாதையான கிழக்கு-மேற்கு குழாயும் முடங்கியுள்ளது.
இதனால் மத்திய கிழக்கில் தொடரும் மோதல், பிராந்திய பாதுகாப்பை மட்டுமின்றி உலகளாவிய எண்ணெய் சந்தை மற்றும் பொருளாதாரத்திலும் பெரிய தாக்கத்தை ஏற்படுத்தக்கூடிய சூழல் உருவாகியுள்ளது.