தாய்லாந்தில் தொடரும் கனமழை: வெள்ளத்தில் சிக்கிய மக்கள், சுற்றுலா பயணிகள்

தாய்லாந்து தலைநகர் பாங்காக்கில் கடந்த சில நாட்களாக தொடர்ந்து பெய்து வரும் கனமழையால் பல்வேறு பகுதிகளில் வெள்ளப்பெருக்கு ஏற்பட்டுள்ளது. இதனால் பொதுமக்களின் இயல்பு வாழ்க்கை பாதிக்கப்பட்டுள்ளது.

50 மாவட்டங்களிலும் வெள்ளப்பெருக்கு

பாங்காக்கில் உள்ள 50 மாவட்டங்களிலும் கனமழையின் தாக்கத்தால் வெள்ளநீர் தேங்கியுள்ளது. பல பகுதிகளில் வீடுகளை வெள்ளநீர் சூழ்ந்துள்ளதுடன், சாலை போக்குவரத்தும் கடுமையாக பாதிக்கப்பட்டுள்ளது. சில பகுதிகளில் மின் இணைப்பும் துண்டிக்கப்பட்டுள்ளதாக தகவல்கள் தெரிவிக்கின்றன.

80 ஆயிரத்துக்கும் மேற்பட்ட மக்கள் பாதிப்பு

வெள்ளப்பெருக்கு காரணமாக 80 ஆயிரத்துக்கும் மேற்பட்ட மக்கள் பாதிக்கப்பட்டுள்ளனர். வீடுகளுக்குள் வெள்ளநீர் புகுந்ததால் பொதுமக்கள் பெரும் சிரமத்தை எதிர்கொண்டுள்ளனர். பாங்காக் முக்கிய சுற்றுலா நகரமாக இருப்பதால் அங்கு சென்றுள்ள சுற்றுலா பயணிகளும் இந்த வெள்ளத்தால் பாதிக்கப்பட்டுள்ளனர்.

தொடரும் கனமழைக்கு எச்சரிக்கை

தாய்லாந்து வானிலைத் துறை, செப்டம்பர் 26 மற்றும் 27 ஆகிய தேதிகளில் நாட்டின் பல பகுதிகளில் கனமழை முதல் மிக கனமழை வரை பெய்யக்கூடும் என எச்சரித்துள்ளது. குறிப்பாக பாங்காக் உள்ளிட்ட மத்திய பகுதிகள் மற்றும் கிழக்கு பகுதிகளில் தொடர்ந்து மழை பெய்ய வாய்ப்புள்ளதாக தெரிவிக்கப்பட்டுள்ளது.

இதனால் தாழ்வான பகுதிகளில் வசிக்கும் மக்கள் வெள்ள அபாயத்தை கருத்தில் கொண்டு எச்சரிக்கையுடன் இருக்குமாறு அறிவுறுத்தப்பட்டுள்ளனர்.

பெருவெள்ளம்: நேபாளம்-1,453 பேர் பலி, திபெத்-43 பேர் பலி; 5,785 பேர் மாயம்