மத்திய ஆப்பிரிக்க நாடான காங்கோ ஜனநாயகக் குடியரசில் ஏற்பட்ட பயங்கர விமான விபத்தில் 2 மூத்த ராணுவ அதிகாரிகள் உட்பட 14 பேர் உயிரிழந்துள்ளனர். இந்த விபத்து அந்நாட்டில் பெரும் அதிர்ச்சியை ஏற்படுத்தியுள்ளது.
காங்கோவின் தென்மேற்கு பகுதியில் உள்ள கிக்விட் நகரில் இருந்து தலைநகர் கின்ஷாசாவை நோக்கி விமானம் சென்று கொண்டிருந்தது. அப்போது விமானத்தில் தொழில்நுட்பக் கோளாறு ஏற்பட்டதாக கூறப்படுகிறது.
கெங்கே பகுதியில் விபத்து
தொழில்நுட்பக் கோளாறு காரணமாக விமானத்தை குவாங்கோ மாகாணத்தில் உள்ள கெங்கே பகுதியில் அவசரமாக தரையிறக்க முயற்சி மேற்கொள்ளப்பட்டதாக உள்ளூர் அதிகாரிகள் தெரிவித்துள்ளனர்.
ஆனால், கெங்கே பகுதியில் விமானம் தரையிறங்குவதற்கான ஓடுதளம் இல்லாததால், குடியிருப்பு பகுதியில் விமானம் விழுந்து விபத்துக்குள்ளானது. விபத்துக்குப் பிறகு விமானம் தீப்பிடித்து எரிந்ததாக தெரிவிக்கப்பட்டுள்ளது.
2 மூத்த ராணுவ அதிகாரிகள் பலி
விபத்தில் உயிரிழந்தவர்களில் காங்கோ ராணுவத்தின் இரண்டு மூத்த அதிகாரிகளும் இடம்பெற்றுள்ளனர். ராணுவ நீதிமன்றத்தின் தலைவராக இருந்த லெப்டினன்ட் ஜெனரல் முடோம்போ கட்டலாயி டியென்டே மற்றும் ஆயுதப்படைகளின் ஆடிட்டர் ஜெனரலாக இருந்த லெப்டினன்ட் ஜெனரல் பகுமி லிகுலியா ஆகியோர் உயிரிழந்ததாக காங்கோ ராணுவம் தெரிவித்துள்ளது.
மேலும், அதிகாரிகளுடன் பயணித்த குழுவினர், ராணுவ வீரர்கள் மற்றும் விமானக் குழுவினரும் உயிரிழந்ததாக தெரிவிக்கப்பட்டுள்ளது.
விபத்துக்கான காரணம் குறித்து விசாரணை
விமானத்தில் ஏற்பட்டதாக கூறப்படும் தொழில்நுட்பக் கோளாறுக்கான காரணம் இதுவரை உறுதி செய்யப்படவில்லை. விபத்துக்கான முழுமையான காரணத்தை கண்டறிய விசாரணை தொடங்கப்பட்டுள்ளதாக காங்கோ ராணுவம் தெரிவித்துள்ளது.
விபத்து தொடர்பான விசாரணையில் விமானத்தின் தொழில்நுட்ப நிலை, பயண விவரங்கள் மற்றும் அவசரமாக தரையிறங்க முயன்ற சூழ்நிலைகள் உள்ளிட்டவை ஆய்வு செய்யப்பட உள்ளன.
இந்த சம்பவத்தில் உயிரிழந்தவர்களின் குடும்பத்தினருக்கு காங்கோ அரசு இரங்கல் தெரிவித்துள்ள நிலையில், விபத்து தொடர்பான விசாரணை தொடர்ந்து நடைபெற்று வருகிறது.
நேபாள பெருவெள்ளம்: மாயமான 56 உக்ரைன் ஆன்மிகப் பயணிகள் எங்கே? திணறும் மீட்புக்குழுவினர்!