ஹோர்முஸ் ஜலசந்தி யாருடைய கட்டுப்பாட்டில்? – டொனால்டு டிரம்பின் பேச்சுக்கு ஈரான் கடும் கண்டனம்!

டெஹ்ரான்: உலகளாவிய எண்ணெய் வர்த்தகத்தின் முக்கிய தமனியான ஹோர்முஸ் ஜலசந்தி மீதான அமெரிக்காவின் முழுமையான கட்டுப்பாடு குறித்த அமெரிக்க அதிபர் டொனால்டு டிரம்பின் கூற்றை ஈரான் அரசாங்கம் வன்மையாக மறுத்துள்ளது. அமெரிக்காவின் இந்த வாதம் “அடிப்படயற்றது” என்று ஈரான் திட்டவட்டமாகத் தெரிவித்துள்ளது.

அமெரிக்க அதிபர் டொனால்டு டிரம்ப் சமீபத்தில் வெளியிட்ட குறிப்பில், ஹோர்முஸ் ஜலசந்தி மீது அமெரிக்கா முழுமையான கட்டுப்பாட்டைக் கொண்டுள்ளதாகத் தெரிவித்திருந்தார். மேலும், அப்பகுதியில் அமெரிக்க கடற்படை ஒரு “எஃகு சுவராக” நிலைநிறுத்தப்பட்டுள்ளதாகவும், அதை அமெரிக்கா தொடர்ந்து தன் வசம் வைத்திருக்கும் என்றும் அவர் குறிப்பிட்டிருந்தார். மேற்கு ஆசியாவில் நிலவும் பதற்றமான சூழலில் டிரம்பின் இந்த அறிவிப்பு சர்வதேச அளவில் பெரும் பரபரப்பை ஏற்படுத்தியிருந்தது.

டிரம்பின் இந்தக் கருத்துக்கு ஈரான் ராணுவம் மற்றும் வெளியுறவுத் துறை தரப்பிலிருந்து உடனடியாகக் கடும் கண்டனங்கள் பதிவு செய்யப்பட்டுள்ளன:

அடிப்படயற்ற வாதம்: ஈரானின் காதம் அல்-அன்பியா மத்திய தலைமையகம் வெளியிட்ட அதிகாரப்பூர்வ அறிக்கையில், அமெரிக்காவின் கூற்றுகள் யாவும் அந்த நாட்டின் ராணுவக் குழப்பத்தையே காட்டுவதாக விமர்சிக்கப்பட்டுள்ளது.

எங்கள் கட்டுப்பாட்டில்தான் உள்ளது: ஹோர்முஸ் ஜலசந்தி தொடர்ந்து ஈரானின் முழுமையான மேலாண்மை மற்றும் கட்டுப்பாட்டின் கீழ்தான் இயங்கி வருகிறது என்று ஈரான் திட்டவட்டமாகக் கூறியுள்ளது.

ஈரான் அனுமதியின்றி இயங்க முடியாது: ஈரானிய ஆயுதப் படைகளின் நேரடி மேற்பார்வை மற்றும் அனுமதியின்றி எந்தவொரு வணிகக் கப்பலோ அல்லது எண்ணெய் கப்பலோ (Oil Tanker) அந்தப் பாதையில் பயணிக்க முடியாது என்றும் ஈரான் எச்சரித்துள்ளது.

புவிசார் அரசியலில் எப்போதும் முக்கியத்துவம் வாய்ந்த ஹோர்முஸ் ஜலசந்தி விவகாரத்தில் அமெரிக்காவும் ஈரானும் நேருக்கு நேர் மோதிக்கொள்வது, சர்வதேச சந்தையில் கச்சா எண்ணெய் விலையிலும் உலகப் பொருளாதாரத்திலும் பெரும் தாக்கத்தை ஏற்படுத்தக்கூடும் எனப் பொருளாதார வல்லுநர்கள் அஞ்சுகின்றனர்.