அமெரிக்காவில் வரும் நவம்பர் 3-ம் தேதி மிட் டெர்ம் எலெக்ஷன் எனப்படும் இடைக்காலத் தேர்தல் நடைபெற உள்ளது. அதிபரின் நான்கு ஆண்டு பதவிக்காலத்தின் இடைப்பகுதியில் நடைபெறும் இந்தத் தேர்தலில், பிரதிநிதிகள் சபை மற்றும் செனட் உள்ளிட்ட நாடாளுமன்றத்தின் அதிகார சமநிலை மாறக்கூடும் என்பதால், இது முக்கியத்துவம் வாய்ந்ததாக பார்க்கப்படுகிறது.
டொனால்ட் டிரம்பின் குடியரசுக் கட்சி இந்தத் தேர்தலில் எதிர்பார்த்த முடிவைப் பெறாவிட்டாலும், அவர் தனது அதிபர் பதவியில் தொடர்ந்து இருப்பார். ஆனால், நாடாளுமன்றத்தில் கட்சியின் கட்டுப்பாடு மாறினால், அவரது நிர்வாகத்தின் சட்டம் மற்றும் கொள்கை நடவடிக்கைகளில் அது தாக்கத்தை ஏற்படுத்தக்கூடும்.
தபால் வாக்குகளில் புதிய கட்டுப்பாடுகள்
இடைத்தேர்தலுக்கு முன்பாக தபால் வாக்குப்பதிவு முறையில் புதிய கட்டுப்பாடுகளை அமல்படுத்த டிரம்ப் நிர்வாகம் நடவடிக்கை எடுத்தது.
புதிய விதிகளின்படி, தபால் வாக்கு தொடர்பான உறைகளில் குறிப்பிட்ட பாதுகாப்பு அம்சங்கள் மற்றும் தனித்துவமான பார்கோடு இடம்பெற வேண்டும். மேலும், தபால் மூலம் வாக்களிக்கும் வாக்காளர்கள் தொடர்பான அடிப்படை தகவல்களை மாநிலங்கள் புதிய அமெரிக்க அஞ்சல் சேவை (USPS) இணையதள அமைப்பில் பதிவேற்ற வேண்டும் என்ற விதிமுறையும் கொண்டுவரப்பட்டது.
இந்த விதிகளை பூர்த்தி செய்யாத தபால் வாக்குகளை USPS ஏற்காமல் மாநிலங்களுக்கு திருப்பி அனுப்பும் வகையிலும் விதிகள் உருவாக்கப்பட்டிருந்தன.
தேர்தல் அதிகாரிகளின் எதிர்ப்பு
நவம்பர் தேர்தலுக்கு மிகக் குறுகிய காலமே இருந்த நிலையில், இதுபோன்ற பெரிய மாற்றங்களை உடனடியாக நடைமுறைப்படுத்துவது தேர்தல் அதிகாரிகளுக்கு பெரும் சிரமத்தை ஏற்படுத்தும் என எதிர்ப்பு தெரிவிக்கப்பட்டது.
சில மாநிலங்களில் ஏற்கனவே தபால் வாக்குகள் வாக்காளர்களுக்கு அனுப்பப்பட்டிருந்த நிலையில், புதிய உறை வடிவமைப்பு, வாக்காளர் தகவல்களைப் பதிவேற்றுதல் உள்ளிட்ட நடைமுறைகளை உடனடியாக செயல்படுத்துவது நடைமுறையில் சிக்கலை ஏற்படுத்தும் என தேர்தல் அதிகாரிகள் தெரிவித்தனர்.
கீழமை நீதிமன்றங்களின் தடை
டிரம்ப் நிர்வாகத்தின் புதிய USPS விதிகளுக்கு எதிராக பல்வேறு மாநிலங்கள் மற்றும் வாக்குரிமை அமைப்புகள் நீதிமன்றத்தை நாடின.
இதையடுத்து, கீழமை நீதிமன்றங்கள் புதிய தபால் வாக்கு விதிகளை அமல்படுத்துவதற்கு தடை விதித்தன. இந்தத் தடையை நீக்கி புதிய விதிகளை தேர்தலுக்கு முன்பாக நடைமுறைப்படுத்த அனுமதிக்க வேண்டும் என டிரம்ப் நிர்வாகம் உச்சநீதிமன்றத்தை அணுகியது.
உச்சநீதிமன்றமும் தடை நீடிப்பு
இந்த வழக்கில் செப்டம்பர் 14-ம் தேதி அமெரிக்க உச்சநீதிமன்றம் டிரம்ப் நிர்வாகத்தின் கோரிக்கையை ஏற்க மறுத்தது. இதன் மூலம், USPS-ன் புதிய தபால் வாக்கு விதிகளை நவம்பர் 3-ம் தேதி நடைபெற உள்ள இடைக்காலத் தேர்தலுக்கு முன்பாக அமல்படுத்த முடியாத நிலை ஏற்பட்டுள்ளது.
புதிய விதிகளை அமல்படுத்துவதற்கான கீழமை நீதிமன்றத்தின் தடையை உச்சநீதிமன்றம் நீடிக்கச் செய்துள்ளதால், ஏற்கனவே நடைமுறையில் உள்ள மாநிலங்களின் தபால் வாக்கு நடைமுறைகளே தொடரும் நிலை உருவாகியுள்ளது.
டிரம்ப் நிர்வாகத்திற்கு பின்னடைவா?
தபால் வாக்குப்பதிவில் புதிய கட்டுப்பாடுகளை கொண்டு வர முயன்ற டிரம்ப் நிர்வாகத்திற்கு உச்சநீதிமன்றத்தின் இந்த உத்தரவு சட்டரீதியான பின்னடைவாக பார்க்கப்படுகிறது.
இந்த விவகாரம் தொடர்பாக டிரம்ப் உச்சநீதிமன்றத்தின் முடிவை விமர்சித்துள்ளார். அதே நேரத்தில், அவரது நிர்வாகம் நீதிமன்ற உத்தரவை பின்பற்றும் என அட்டர்னி ஜெனரல் டாட் பிளாஞ்ச் தெரிவித்துள்ளார்.
2026 மிட் டெர்ம் தேர்தலில் தாக்கம் ஏற்படுமா?
தபால் வாக்குப்பதிவு தொடர்பான இந்த சட்டப் போராட்டம் அமெரிக்க இடைக்காலத் தேர்தலுக்கு முன்னதாக முக்கிய அரசியல் விவாதமாக மாறியுள்ளது.
2026 நவம்பர் 3-ம் தேதி நடைபெறும் தேர்தலில் பிரதிநிதிகள் சபை மற்றும் செனட்டின் அதிகார சமநிலை எவ்வாறு அமையும் என்பது டிரம்ப் நிர்வாகத்தின் அடுத்தகட்ட அரசியல் மற்றும் சட்ட நடவடிக்கைகளுக்கு முக்கியமானதாக இருக்கும்.
இந்நிலையில், தபால் வாக்கு விதிகள் தொடர்பாக உச்சநீதிமன்றம் எடுத்துள்ள தற்போதைய நிலைப்பாடு, தேர்தலுக்கு முன்பாக டிரம்ப் நிர்வாகத்தின் தேர்தல் நடைமுறை மாற்ற முயற்சிகளில் முக்கிய திருப்பமாக அமைந்துள்ளது.