மத்திய கிழக்கில் அமெரிக்கா–ஈரான் இடையேயான மோதல் மீண்டும் தீவிரமடைந்துள்ளது. ஈரான் நடத்திய ஏவுகணை தாக்குதல்களுக்கு பதிலடியாக, அமெரிக்க ராணுவம் 5 ஈரானிய கச்சா எண்ணெய் டேங்கர்களை தாக்கி அழித்துள்ளதாக தெரிவித்துள்ளது.
அமெரிக்க மத்திய கட்டளைப் படை (CENTCOM) வெளியிட்ட தகவலின்படி, ஈரானின் புரட்சிகர பாதுகாப்புப் படை அமெரிக்க கடற்படை கப்பலை நோக்கி இரண்டு முறை பாலிஸ்டிக் ஏவுகணைகளை ஏவியதாக கூறப்படுகிறது. அந்த தாக்குதல்களில் அமெரிக்க வீரர்கள் யாருக்கும் காயம் ஏற்படவில்லை என்றும் தெரிவிக்கப்பட்டுள்ளது.
இதையடுத்து அமெரிக்க படைகள் ஈரானுடன் தொடர்புடைய 5 எண்ணெய் டேங்கர்களை குறிவைத்துள்ளன. Kivik, Charminar, Horizon 1, Riesco மற்றும் Derya ஆகிய கப்பல்கள் தாக்கப்பட்டதாக அமெரிக்க தரப்பு தெரிவித்துள்ளது. தாக்குதலுக்கு முன்பாக அந்த கப்பல்களில் இருந்த பணியாளர்கள் வெளியேறுமாறு எச்சரிக்கப்பட்டதாகவும் கூறப்பட்டுள்ளது.
ஈரான் கொடுத்த பதிலடி
அமெரிக்காவின் தாக்குதலுக்குப் பிறகு ஈரான் பதிலடி நடவடிக்கையை மேற்கொண்டுள்ளது. ஜோர்டானில் உள்ள அமெரிக்க இலக்குகளை நோக்கி ஏவுகணைகள் ஏவப்பட்டதாக ஈரான் அரசு ஊடகம் தெரிவித்துள்ளது.
ஜோர்டான் ராணுவத்தின் தகவலின்படி, தங்கள் வான் பாதுகாப்புப் படைகள் 18 பாலிஸ்டிக் ஏவுகணைகளை இடைமறித்துள்ளன. மேலும் இரண்டு ஏவுகணைகள் மக்கள் வசிக்காத பகுதிகளில் விழுந்ததாகவும், இதுவரை உயிரிழப்பு குறித்த தகவல் இல்லை என்றும் தெரிவிக்கப்பட்டுள்ளது.
ஹோர்முஸ் நீரிணையில் அடுத்த பதற்றம்?
உலகின் முக்கியமான எண்ணெய் போக்குவரத்து வழித்தடங்களில் ஒன்றான Strait of Hormuz மீண்டும் பதற்றத்தின் மையமாகியுள்ளது. இந்த பகுதியில் கப்பல் போக்குவரத்துக்கு புதிய கட்டுப்பாட்டு மண்டலத்தை அறிவிக்கப் போவதாக ஈரான் தெரிவித்துள்ளது.
இதனால் சர்வதேச கச்சா எண்ணெய் சந்தையிலும் அதிர்வு ஏற்பட்டுள்ளது. Brent crude எண்ணெய் விலை ஒரு கட்டத்தில் ஒரு பீப்பாய்க்கு சுமார் $99.46 வரை உயர்ந்துள்ளது.
உலக நாடுகளுக்கு அதிகரிக்கும் கவலை
அமெரிக்கா–ஈரான் இடையேயான தாக்குதல்கள் தொடர்ந்து அதிகரித்தால், ஹோர்முஸ் நீரிணை வழியாக நடைபெறும் எண்ணெய் மற்றும் சரக்கு போக்குவரத்து மேலும் பாதிக்கப்படலாம். இதன் தாக்கம் இந்தியா உள்ளிட்ட எண்ணெய் இறக்குமதி நாடுகளிலும் எரிபொருள் விலை மற்றும் பணவீக்கத்தில் எதிரொலிக்கக்கூடும்.
இந்நிலையில், இரு நாடுகளும் அடுத்ததாக மேற்கொள்ளும் நடவடிக்கைகள் குறித்து உலக நாடுகள் தீவிரமாக கண்காணித்து வருகின்றன.