வெனிசுலா நாட்டின் எல்லைக்குள் செயல்பட்டு வந்த கொலம்பிய கிளர்ச்சிக் குழுவான தேசிய விடுதலை ராணுவத்தின் (ELN) முகாம் மீது வெனிசுலா ராணுவம் நடத்திய தாக்குதலில் 19 பேர் கொல்லப்பட்டதாகத் தகவல் வெளியாகியுள்ளது.
வெனிசுலாவின் மேற்கு பகுதியில் உள்ள அபுரே மாநிலத்தின் தென்மேற்குப் பகுதியில், கொலம்பிய எல்லைக்கு அருகே அமைந்துள்ள வனப்பகுதியில் இந்த முகாம் செயல்பட்டு வந்தது. கடந்த அக்டோபர் 30-ம் தேதி டிரோன்கள் மற்றும் ராணுவ ஹெலிகாப்டர்கள் மூலம் இந்த முகாம் தாக்கப்பட்டதாகக் கூறப்படுகிறது.
19 பேர் உயிரிழப்பு
மனித உரிமை மீறல்களைக் கண்காணித்து வரும் ஃபண்டாரெடஸ் (Fundaredes) என்ற தன்னார்வ அமைப்பின் ஒருங்கிணைப்பாளர் ஜுவான் பிரான்சிஸ்கோ கார்சியா எஸ்கலோனா, இந்தத் தாக்குதலில் முதலில் 9 பேர் உயிரிழந்ததாகத் தெரிவித்தார்.
பின்னர் மேலும் 10 பேரின் உடல்கள் மாநிலத் தலைநகரான சான் பெர்னாண்டோவுக்கு எடுத்துச் செல்லப்பட்டதாகவும் அவர் கூறியுள்ளார். இதையடுத்து உயிரிழந்தவர்களின் எண்ணிக்கை 19 ஆக உயர்ந்துள்ளது.
உயிரிழந்தவர்களில் பெரும்பாலானோர் வெனிசுலா நாட்டைச் சேர்ந்தவர்கள் என ராணுவ நடவடிக்கைக்கு நெருக்கமான வட்டாரங்கள் தெரிவித்துள்ளன. எனினும், உயிரிழந்தவர்களின் அடையாளங்கள் அதிகாரப்பூர்வமாக உறுதிப்படுத்தப்படவில்லை.
அமெரிக்க உளவு அமைப்புகள் உதவியதாகத் தகவல்
இந்த ராணுவ நடவடிக்கைக்கு அமெரிக்காவின் சிஐஏ (CIA), எஃப்பிஐ (FBI) உள்ளிட்ட உளவு அமைப்புகள் உதவியதாக, பெயர் வெளியிட விரும்பாத வெனிசுலா ராணுவ வட்டாரத்தைச் சேர்ந்த ஒருவர் தெரிவித்துள்ளார்.
மேலும், அமெரிக்காவின் உத்தரவின் பேரிலேயே இந்தத் தாக்குதல் நடத்தப்பட்டதாகவும் அவர் கூறியுள்ளார். இருப்பினும், இந்தக் குற்றச்சாட்டு தொடர்பாக அமெரிக்க அரசு தரப்பிலிருந்து உடனடி அதிகாரப்பூர்வ விளக்கம் வெளியாகவில்லை.
கொலம்பியா – வெனிசுலா எல்லையில் பதற்றம்
கொலம்பியாவும் வெனிசுலாவும் சுமார் 2,200 கிலோமீட்டர் நீள எல்லையைப் பகிர்ந்து கொள்கின்றன. இந்த எல்லைப் பகுதிகளில் ELN உள்ளிட்ட பல்வேறு ஆயுதக் குழுக்கள் போதைப்பொருள் கடத்தல், சட்டவிரோத சுரங்கத் தொழில் மற்றும் கடத்தல் நடவடிக்கைகளில் ஈடுபட்டு வருவதாகக் கூறப்படுகிறது.
கொலம்பியாவின் புரட்சிகர ஆயுதப் படைகள் (FARC) 2016-ம் ஆண்டு அந்நாட்டு அரசுடன் அமைதி ஒப்பந்தத்தில் கையெழுத்திட்ட பின்னர், ELN லத்தீன் அமெரிக்காவின் முக்கிய ஆயுதக் கிளர்ச்சிக் குழுக்களில் ஒன்றாகத் தொடர்ந்து செயல்பட்டு வருகிறது.
வெனிசுலாவின் ராணுவக் கொள்கையில் மாற்றமா?
நீண்டகாலமாக கொலம்பிய கிளர்ச்சிக் குழுக்களுக்கு வெனிசுலா அடைக்கலம் அளிப்பதாகக் கொலம்பிய அரசு குற்றம்சாட்டி வந்தது. இந்த நிலையில், வெனிசுலா எல்லைக்குள் செயல்பட்டு வந்த ELN முகாம் மீது அந்நாட்டு ராணுவமே தாக்குதல் நடத்தியிருப்பது அந்நாட்டின் ராணுவ அணுகுமுறையில் மாற்றம் ஏற்பட்டிருப்பதற்கான அறிகுறியாக இருக்கலாம் என அரசியல் மற்றும் பாதுகாப்புத்துறை பார்வையாளர்கள் கருதுகின்றனர்.
இந்தத் தாக்குதல் தொடர்பாக வெனிசுலா இடைக்கால அரசின் அதிகாரப்பூர்வ விளக்கம் வெளியாகாத நிலையில், எல்லைப் பகுதியில் தொடர்ந்து ராணுவ நடவடிக்கைகள் மேற்கொள்ளப்படலாம் என்ற தகவலும் வெளியாகியுள்ளது.