ஜனநாயகன் படத்தின் இசை வெளியீட்டு விழா குறித்த அறிவிப்பு வெளியாகி உள்ளது.
விஜயின் 69 ஆவது படமாக உருவாகி வரும் திரைப்படம் தான் ‘ஜனநாயகன்’. இந்த படத்தை ஹெச். வினோத் இயக்குகிறார். நடிகர் விஜய் இதில் போலீஸ் அதிகாரியாக நடிக்க அவருடன் இணைந்து பூஜா ஹெக்டே, பாபி தியோல், மமிதா பைஜு, கௌதம் வாசுதேவ் மேனன், பிரகாஷ் ராஜ் மற்றும் பலர் நடித்துள்ளனர். இந்த படத்தை கே.வி.என் ப்ரொடக்ஷன்ஸ் நிறுவனம் தயாரித்துள்ளது. அனிருத் இதற்கு இசையமைத்துள்ளார். அரசியல்வாதியாக மாறியுள்ள விஜயின் கடைசி படம் இது என்பதால் இந்த படத்தின் மீதான எதிர்பார்ப்பு மிகப்பெரிய அளவில் இருந்து வருகிறது.
ரசிகர்கள் இந்த படத்தை திருவிழா போல் கொண்டாட தயாராகி வருகிறார்கள். அதன்படி ஏற்கனவே இந்த படம் 2026 ஜனவரி 9ஆம் தேதி வெளியாகும் என்று அறிவிக்கப்பட்டிருக்கிறது. மேலும் படத்தில் இருந்து முன்னோட்ட வீடியோவும், முதல் பாடலும் வெளியாகி இருக்கிறது. இந்நிலையில் இந்த படம் தொடர்பான புதிய அறிவிப்பை படக்குழு வெளியிட்டுள்ளது. அதாவது வருகின்ற டிசம்பர் 27ஆம் தேதி மலேசியாவில் இருக்கும் கோலாலம்பூர், புகிட் ஜலீல் மைதானத்தில் இந்த படத்தின் இசை வெளியீட்டு விழா நடைபெறும் என வீடியோ ஒன்று வெளியிடப்பட்டு அறிவிக்கப்பட்டுள்ளது.
சமீப காலமாக வெளியான விஜயின் படங்களுக்கு இசை வெளியீட்டு விழா நடத்தப்படாத நிலையில், கிட்டத்தட்ட மூன்று வருடங்கள் கழித்து விஜயின் கடைசி படமான ‘ஜனநாயகன்’ படத்திற்கு இசை வெளியீட்டு விழா நடத்தப்பட இருப்பது ரசிகர்களுக்கு இன்ப அதிர்ச்சியை தந்துள்ளது. எனவே ரசிகர்கள் இப்பொழுதே அதை கொண்டாட தயாராகி வருகிறார்கள்.