இலங்கையின் அரசியலமைப்பு சட்டத்தை மாற்றி எழுத அந்நாட்டு அதிபர் அனுர குமார திசநாயகே திட்டமிட்டிருக்கும் சூழலில், தமிழர் மாகாணங்களுக்கு தன்னாட்சி வழங்கிட இந்திய அரசு அழுத்தம் தர வேண்டும் என்று திருமாவளவன் வலியுறுத்தியுள்ளார்.
சென்னை ஆவடியில் நடைபெற்ற மாவீரர் தின நிகழ்ச்சியில் கலந்துகொண்ட விடுதலை சிறுத்தைகள் கட்சி தலைவர் திருமாவளவன் சிறப்புரை ஆற்றினார். அப்போது அவர் பேசியதன் தொடர்ச்சியை இங்கே காணலாம்:- அமெரிக்காவில் இரட்டைக் கோபுரம் இடிக்கப்பட்ட பிறகு அமெரிக்கா அல்கொய்தா உள்ளிட்ட தீவிரவாத அமைப்புகளுக்கு எதிராக யுத்தத்தை தொடக்க வேண்டும் என்று அமெரிக்க அரசு முடிவு செய்து, தனது ஆதரவு நாடுகளை திரட்டி பயங்கரவாதிகளின் பட்டியலை தயார் செய்தது. 20க்கும் மேற்பட்ட இயக்கங்களின் பட்டியலில் விடுதலைப்புலிகள் பெயரும் இருந்தன. விடுதலைப்புலிகள் இயக்கத்திற்கு எதிராக உலகின் பல நாடுகளிலும் தடை விதிக்கப்பட்டது. அதற்கு முன்னதாக தமிழ்நாட்டில் ராஜிவ்காந்தி படுகொலை செய்யப்படுகிறார். ராஜிவ்காந்தி படுகொலை செய்யப்பட வேண்டும் என்று விடுதலைப்புலிகள் முடிவு செய்திருந்தால், அது வரலாற்று பிழை. அப்படியான ஒரு முடிவை பிரபாகரன் எடுத்திருக்க மாட்டார் என்பது என்னுடைய கருத்து. காரணம் அவர் அதீத ஞானம் கொண்டவர்.
நான் 2002ஆம் வன்னிக்காடுகளில் பிரபாரகனை சந்தித்து பேசியபோது, அவரிடம் நார்வேவை சேர்ந்த எரிக் சோல்ஹைம் இந்த பிரச்சினையில் இவ்வளவு ஆர்வம் காட்டியது ஏன் என்று கேட்டேன். அப்போது அமெரிக்காவின் கோர முகம் இஸ்ரேல். அமெரிக்காவின் அன்பு முகம் நார்வே என்று சொன்னார். அப்போது அதற்கு அர்த்தம் புரியவில்லை. பிறகு அமெரிக்கா இந்த விவகாரத்தில் எப்படி தலையீடு செய்கிறது என்று புரிந்துகொண்டேன். நார்வே நாட்டை வைத்து அமைதி பேச்சுவார்த்தை என்ற பெயரால் நாடகம் ஆடியது என்பதை பிரபாகரன் உணர்ந்திருந்தார். அந்த அளவுக்கு ராணுவ அரசியல் புரிதல் கொண்டவர் பிரபாகரன்.
ஐ.ஜி மோகன்தாஸ், பிரபாகரனுடன் தங்கியிருந்தவர்களின் வயர்லஸ் கருவிகளை எல்லாம் பறிமுதல் செய்துகொண்டார். உதகையில் நடைபெற்ற மலர்க்கண்காட்சியில் கலந்துகொண்டபோது இந்த தகவல் கிடைத்து சாகும் வரை உண்ணாவிரதம் இருந்தார். அடுத்த நாளே அங்கே சென்று மாணவர் குழுவில் உண்ணாவிரதத்தை கைவிட வலியுறுத்தி போராடினோம். முதலமைச்சர் எம்ஜிஆர் தொலைபேசியில் பேசினார். அதன் பிறகு எங்களிடம் வந்து உரையாடிய பிரபாகரன் எந்த காலத்திலும் இந்தியாவுக்கு எதிராக நாங்கள் போராட மாட்டோம். எங்கள் துப்பாக்கி முனை ஒருபோதும் இந்திய அரசுக்கு எதிராக திரும்பாது என்று சொன்னார். அந்த தொலைநோக்கு பார்வை அவருக்கு உண்டு. ராஜிவ்காந்தியை படுகொலை செய்ய வேண்டும் என்கிற நிலைப்பாட்டை ஒருபோதும் எடுத்திருக்க மாட்டார். அதற்கு வாய்ப்பே கிடையாது. எனது உறுதியான நம்பிக்கை அது. பழனிபாபா வீடியோ பதிவு ஒன்றில், இந்திரா காந்தி படுகொலைக்கு பிறகு ராஜிவ்காந்தி தனது பாதுகாப்பிற்காக அடிவயிற்றில் ஒரு கையெறி குண்டு வைத்திருப்பார் என்றும், அவர் கீழே குனிந்த போது தவறி குண்டு வெடித்ததாகவும் சொல்கிறார். அது அறிவியல்பூர்வமாக ஆய்வு செய்ய வேண்டும். அது உண்மையா? பொய்யா? என்று நமக்கு தெரியாது. ஆனால் அவர் ராஜிவ் காந்தியை புலிகள் படுகொலை செய்யவில்லை என்கிறார்.
அதுவரை தமிழ்நாட்டில் எல்லா அரசியல் கட்சிகளும் ஈழ ஆதரவு நிலைப்பாட்டை எடுத்தார்கள். ஸ்ரீசபாரத்தினம் தலைமையிலான டெலோ இயக்கத்தை திமுக ஆதரித்தது. விடுதலை புலிகள் இயக்கத்தை திகவும், அதிமுகவும் ஆதரித்தன. ஆனால் ராஜிவ்காந்தி படுகொலைக்கு பிறகு எந்த இயக்கத்தையும் ஆதரிப்பது இல்லை என்கிற நிலைப்பாடு ஏற்படுகிறது. அப்போது வெகுண்டெழுந்த இயக்கம்தான் விசிக. கருணாநிதி மட்டுமல்ல வேறு யார் தமிழ்நாட்டின் முதலமைச்சராக இருந்து ஒரு தேசிய இன விடுதலைக்கு எதுவும் செய்துவிட முடியாது. அதிகபட்சம் இந்திய மத்திய அரசை எதிர்த்து கூட்டணியில் இருந்து வெளியேறுவதை விட வேறு வழி இருக்காது. காங்கிரசை வீழ்த்தி மக்கள் மத்தியில் பாஜகவை ஆட்சியில் அமர்த்தினார்கள். 11 ஆண்டுகள் முடிந்துவிட்டது. ஒரு அங்குலமாவது ஈழத்தமிழர்கள் பிரச்சினையில் மத்திய அரசு முற்போக்கான நிலையை எடுத்துள்ளதா? என்று யாராவது சொல்ல முடியுமா? இலை மலர்ந்தால் ஈழம் மலரும் என்றார்கள். பிரபாகரனை கைது செய்து குற்றவாளி கூண்டில் நிறுத்த வேண்டும் என தீர்மானம் போட்டவர் ஜெயலலிதா. இந்த வரலாறை எல்லாம் மறைத்துவிட்டு வெறும் கருணாநிதி எதிர்ப்பு என்பதில் ஈழத்து அரசியலை சுருக்கிவிட்டார்கள் சிலர்.
ஈழத்து அரசியலில் தமிழ்நாடு அரசு எதுவும் செய்துவிட முடியாது. ஆனால் இந்தியாவின் வெளியுறவு கொள்கையை தீர்மானிப்பது டெல்லி. மக்களவையில் தமிழ்நாட்டிற்கு 40 எம்பிக்கள் தான் உள்ளனர். அவர்கள் என்ன அழுத்தம் கொடுத்தாலும் இந்திய அரசின் வெளிவிவகார கொள்கையில் மாற்றத்தை கொண்டுவர முடியாது. இந்த அடிப்படை அரசியலை புரிந்துகொள்ள வேண்டும். இப்போது அங்கு சூழல் மாறியிருக்கிறது. அங்கே இடதுசாரிகள் ஆட்சிக்கு வந்துள்ளபோதும் அவர்களும் இனவாதிகளாக தான் இருக்கிறார்கள் என்பது அண்மையில் உணர முடிந்தது. அனுர திசநாயக தமிழர்களுக்கு ஆதரவாக இல்லை என்று சொல்கிறார்கள். அவர் அரசமைப்பு திட்டத்தை மாற்றி அமைக்க திட்டமிட்டிருக்கிறார்கள். இந்நிலையில் தமிழீழ அரசியல் தலைவர்கள், நாடாளுமன்ற உறுப்பினர்கள் இந்திய அரசின் துணையை நாடுகிறார்கள்.
இந்திய – இலங்கை அரசுகளுக்கு இடையிலான ஒப்பந்தம் இன்னும் அவர்கள் அமல்படுத்தவில்லை. எனவே புதிதாக எழுதுகிற அரசமைப்பு சட்டத்தில் இலங்கையில் இரு தேசிய இனங்கள் உள்ளன என்பதை ஒப்புக்கொள்ள வேண்டும். தற்போது இருக்கும் ஒற்றை ஆட்சி முறையை மாற்றி, கூட்டாட்சி முறையை கொண்டு வர வேண்டும். அப்போது வடக்கு, கிழக்கு மாகாணங்கள் தன்னாட்சி அதிகாரம் பெற்ற இடங்களாக இருக்கும். இதனை மாவீரர் நாள் நிகழ்வின் வாயிலாக இந்திய அரசுக்கு வலியுறுத்துகிறேன். அந்த கோரிக்கையை தமிழ்நாடு முதலமைச்சரும் சேர்ந்து வலியுறுத்த வேண்டும் என்று அண்மையில் அவரை சந்தித்தபோது, விசிக சார்பில் கோரிக்கை விடுத்தோம். முதலமைச்சர், இந்திய அரசுக்கு அழுத்தம் தர வேண்டும், இவ்வாறு அவர் தெரிவித்தார்.