மார்கழி மாதம் என்பது ஆன்மீகம், அறிவியல் மற்றும் ஆரோக்கியம் ஆகிய மூன்றையும் உள்ளடக்கிய ஒரு அற்புதமான மாதமாகும். மார்கழியின் சிறப்புகளையும், செய்ய வேண்டிய மற்றும் தவிர்க்க வேண்டிய விஷயங்களையும் நாம் தெரிந்து கொள்ள வேண்டியது அவசியம்.
Do’sதமிழ் மாதங்களில் மற்ற மாதங்கள் மனிதர்களின் லௌகீக வாழ்க்கைக்காகப் பிரிக்கப்பட்டிருக்க, மார்கழி மட்டும் “மாதங்களில் நான் மார்கழி” என்று கிருஷ்ண பரமாத்மாவால் போற்றப்பட்ட மாதமாகும். இது தேவர்களின் அதிகாலைப் பொழுது என்று அழைக்கப்படுகிறது.
ஆண்டாள் நாச்சியார் கண்ணனை வேண்டி திருப்பாவை பாடி நோன்பு நோற்ற மாதம். அதேபோல் மாணிக்கவாசகர் சிவபெருமானைப் போற்றி திருவெம்பாவை பாடிய மாதம்.
சூரிய உதயத்திற்கு முன்பே (பிரம்ம முகூர்த்தம்) ஆலயங்களில் பூஜைகள் தொடங்கும். விஷ்ணு ஆலயங்களில் திருப்பாவையும், சிவாலயங்களில் திருவெம்பாவையும் ஒலிக்க, ஊர் முழுவதும் பஜனைப் பாடல்கள் பக்தி மணம் பரப்பும்.
மார்கழி அதிகாலையில் ஓசோன் படலம் பூமிக்கு மிக அருகில் இருப்பதால், அந்த நேரத்தில் வீசும் காற்றில் அதிகப்படியான ஆக்சிஜன் இருக்கும். இது நுரையீரலுக்கும், ரத்த ஓட்டத்திற்கும், சருமத்திற்கும் பெரும் நன்மையைத் தரும்.
அதிகாலை எழுந்து கோலமிடுவதும், பாடல்கள் பாடுவதும் மன அழுத்தத்தைக் குறைத்து நேர்மறை எண்ணங்களை உருவாக்கும்.
மார்கழியில் செய்ய வேண்டியவை
அதிகாலை 4.00 மணி முதல் 6.00 மணிக்குள் (பிரம்ம முகூர்த்தம்) எழுந்து நீராடுவது உடலுக்கும் ஆன்மாவிற்கும் புத்துணர்ச்சி தரும்.
அதிகாலையிலேயே வாசலைச் சுத்தம் செய்து வண்ணக் கோலமிட்டு, அதன் நடுவில் சாணப் பிள்ளையார் வைத்து பூசணிப் பூ வைப்பது மங்களகரமானது. வாசலின் இருபுறமும் அகல் விளக்குகள் ஏற்றுவது மகாலட்சுமியை வரவேற்கும் செயலாகும்.
திருப்பாவை, திருவெம்பாவை மற்றும் திருப்பள்ளியெழுச்சி பாடல்களைப் பாடுவது அல்லது கேட்பது பெரும் புண்ணியத்தைத் தரும்.
மார்கழியில் அன்னதானம் செய்வதும், ஏழைகளுக்குப் போர்வை போன்ற குளிர்கால உடைகளை வழங்குவதும் சிறந்தது.
ஜாதகம் பார்ப்பது, திருமணப் பேச்சுவார்த்தை நடத்துவது, நிலம்/வீடு வாங்க முன்பணம் கொடுப்பது மற்றும் பத்திரப் பதிவு செய்வது போன்றவற்றைச் செய்யலாம். கர்ப்பிணிப் பெண்களுக்குச் சீமந்தம் செய்யவும் தடையில்லை.
மார்கழியில் செய்யக்கூடாதவை
திருமணம், நிச்சயதார்த்தம், புதுமனை புகுவிழா (கிரகப்பிரவேசம்), காது குத்துதல் போன்ற விசேஷங்களைத் தவிர்க்க வேண்டும். இம்மாதம் இறைவனுக்கு அர்ப்பணிக்கப்பட்டதால், மனிதர்களின் கொண்டாட்டங்களுக்கு முக்கியத்துவம் தரப்படுவதில்லை.
சூரிய உதயத்திற்குப் பிறகு தூங்குவது ஆரோக்கியத்தைக் கெடுக்கும்; ஆன்மீக ரீதியாக இது தரித்திரத்தைத் தரும் என்று சொல்லப்படுகிறது.
சோம்பல் காரணமாக முந்தைய நாள் இரவே கோலம் போடுவதைத் தவிர்க்க வேண்டும். அதிகாலை பனியில் கோலமிடுவதுதான் ஆரோக்கிய ரகசியம்.
நோன்பு இருக்கும் கன்னிப்பெண்கள் பால் மற்றும் நெய் சேர்த்த உணவுகளைத் தவிர்ப்பது வழக்கமாக உள்ளது (இது புலனடக்கத்தைக் குறிக்கும்).
மார்கழியில் பொதுவாகப் புதுப் பயிர் விதைப்பதைத் தவிர்ப்பார்கள் (தை பிறந்தால் தான் வழி பிறக்கும் என்பது பழமொழி).
வீடு மாறுதல் அல்லது அலுவலகத்தை இடமாற்றம் செய்வதை இம்மாதத்தில் தவிர்க்கலாம்.
மார்கழி என்பது நம்மை நாமே சுத்திகரித்துக் கொள்ளும் மாதம். அதிகாலை எழுதல், பக்திப் பாடல்கள் பாடுதல், ஆலயங்களுக்குச் செல்லுதல் ஆகியவற்றின் மூலம் நம் உடலையும் மனதையும் செம்மைப்படுத்தலாம்.
பஞ்சமுக ஆஞ்சநேயர்: ஐம்புலன்களையும் ஐம்பூதங்களையும் காக்கும் மகாசக்தி!