தமிழக சட்டமன்றத் தேர்தல் களம் சூடுபிடித்துள்ள நிலையில், தேசிய ஜனநாயகக் கூட்டணியில் தொகுதிப் பங்கீடு தொடர்பான இழுபறிகள் நீடித்து வருகின்றன. குறிப்பாக, புதிய நீதிக் கட்சிக்கு உரிய இடங்கள் ஒதுக்கப்படாததால் அக்கட்சியின் நிறுவனர் ஏ.சி. சண்முகம் அதிருப்தியில் இருப்பதாகத் தகவல்கள் வெளியாகின.
எடப்பாடி இல்லத்தில் திடீர் சந்திப்பு
இந்தச் சூழலில், இன்று காலை சென்னை கிரீன்வேஸ் சாலையில் உள்ள அதிமுக பொதுச்செயலாளர் எடப்பாடி பழனிசாமியின் இல்லத்திற்கு புதிய நீதிக் கட்சித் தலைவர் ஏ.சி.சண்முகம் வருகை தந்தார். கூட்டணியில் தங்களுக்கு வழங்கப்பட்ட இடங்கள் மற்றும் தொகுதிகள் குறித்து அவர் ஈபிஎஸ் உடன் தீவிர ஆலோசனை நடத்தியதாகக் கூறப்படுகிறது.
பாஜக தலைமையிலான கூட்டணியில் இருந்தாலும், அதிமுகவுடன் பேசி கூடுதல் இடங்களைப் பெறவோ அல்லது தேர்தல் வியூகங்கள் குறித்தோ இந்தச் சந்திப்பு அமைந்திருக்கலாம் என அரசியல் வட்டாரங்கள் தெரிவிக்கின்றன.
ஜான் பாண்டியனும் வருகை
ஏ.சி. சண்முகத்தைத் தொடர்ந்து, தமிழக மக்கள் முன்னேற்றக் கழகத்தின் தலைவர் ஜான் பாண்டியனும் எடப்பாடி பழனிசாமியைச் சந்திக்க அவரது இல்லத்திற்கு வந்தார். ஏற்கனவே ஜான் பாண்டியனுக்கு ராஜபாளையம் தொகுதி ஒதுக்கப்பட்டிருந்தாலும், தேர்தல் பணிகள் மற்றும் கூட்டணி ஒருங்கிணைப்பு குறித்து அவரும் ஆலோசனை மேற்கொண்டார்.
கூட்டணிக்குள் குழப்பமா?
தேசிய ஜனநாயகக் கூட்டணியில் அதிமுக, பாஜக, பாமக உள்ளிட்ட கட்சிகள் இணைந்து செயல்படும் வேளையில், சிறிய கட்சிகளுக்கான தொகுதி ஒதுக்கீட்டில் நிலவும் அதிருப்தி கூட்டணியின் வெற்றியைப் பாதிக்குமோ என்ற கேள்வி எழுந்துள்ளது.
”கூட்டணிக்குள் எந்தப் பிளவும் இல்லை; வெற்றிக்கான ஆலோசனைகளே நடைபெறுகின்றன” என அதிமுக தரப்பில் கூறப்பட்டாலும், இந்தத் தொடர் சந்திப்புகள் தமிழக அரசியலில் பெரும் பரபரப்பை ஏற்படுத்தியுள்ளன.