தமிழகத்தில் புதிய ஆட்சியை அமைத்துள்ள தவெக அரசின் 60 நாட்கால நிர்வாகம் வெறும் ஊடக பிம்பக் கட்டமைப்பாகவும், ‘ரீல்ஸ்’ நாடகமாகவும் மட்டுமே உள்ளது என்றும், பெரும் ஊழல் புகார்களை மூடிமறைக்கவே எளிய கட்சி நிர்வாகிகள் மீதான கைது நடவடிக்கைகள் அரங்கேற்றப்படுவதாகவும் அரசியல் விமர்சகரும் வழக்கறிஞருமான சுசீல் ராஜ்குமார் பரபரப்பான குற்றச்சாட்டுகளை முன்வைத்துள்ளார்.
இணைய ஊடக நேர்காணல் ஒன்றில் தவெக அரசின் செயல்பாடுகள் குறித்து அவர் தெரிவித்துள்ள செய்தி விவரங்கள் வருமாறு:
₹100 கோடி மதிப்பிலான பழனி கோவில் நில ஊழல்:
தவெக அரசு ஊழலுக்கு எதிராகச் செயல்படுவதாகக் கூறிக்கொள்ளும் பிம்பத்தை உடைக்கும் வகையில் பழனியில் மிகப்பெரிய முறைகேடு நடந்துள்ளதாகச் சுசீல் ராஜ்குமார் சுட்டிக்காட்டியுள்ளார்.
”பழனியில் சுமார் 1.40 ஏக்கர் பரப்பளவு கொண்ட, ₹100 கோடி மதிப்புமிக்க முருகன்கோவில் நிலத்தை, நீதிமன்றத் தீர்ப்புகளை மறைத்து வெறும் ₹2 கோடிக்குத் தனியார் ஒருவருக்குத் தவறான முறையில் சார் பதிவாளர் அலுவலகம் மூலம் பதிவு செய்து கொடுத்துள்ளனர்.
இந்த நிலப்பதிவைத் தடுப்பதற்காகக் கடிதம் எழுதிய கோவிலின் செயல் அலுவலரை அவசரமாகச் சென்னைக்கு இடமாற்றம் செய்துள்ளனர். மேலும், குறிப்பிட்ட பதிவன்று சார்பதிவாளர் விடுப்பில் செல்ல, கொடைக்கானலில் இருந்து மற்றொரு சார்பதிவாளரை வரவழைத்து இரவோடு இரவாக இப்பதிவு நடத்தப்பட்டுள்ளது.
இவ்வளவு பெரிய முறைகேடு மேல்மட்ட அமைச்சர்கள் மற்றும் அதிகாரிகளின் பின்னணி இல்லாமல் சாத்தியமில்லை. இந்த ₹100 கோடி ஊழலை மறைக்கவே, மிகக் குறைந்த தொகை லஞ்சம் வாங்கிய ஊராட்சித் தலைவர் மீதான கைது நடவடிக்கையைத் தவெக அரசு பெரிதுபடுத்திக் காட்டுகிறது. தார்மீக நேர்மை இருந்தால் முதலமைச்சர் விஜய் இந்த வழக்கைச் சிபிசிஐடி-க்கு (CBCID) மாற்றுவதை விடுத்து, சிபிஐ (CBI) விசாரணைக்கு உத்தரவிட வேண்டும்” என்று அவர் வலியுறுத்தினார்.
“நேரடி குதிரை பேரத்தில் ஈடுபட்டது தவெக-தான்”:
திமுக மற்றும் அதிமுகவினர் எம்.எல்.ஏ-க்களை விலைக்கு வாங்க முயல்வதாகக் கூறப்படும் குற்றச்சாட்டுகளுக்குப் பதிலளித்த அவர், “சட்டமன்றத்தில் பெரும்பான்மையை நிரூபிக்க வேண்டிய கட்டாயம் தவெக-விற்குத்தான் உள்ளது. அதிமுகவில் இருந்து பிரிந்து செயல்படும் 25 எம்.எல்.ஏ-க்களை முதலமைச்சர் விஜய் நேரில் சென்று சந்தித்து ஆதரவு கோரினார். இது நேரடியான குதிரை பேர நடவடிக்கை இல்லையா? தவெக அரசு செய்து வரும் குதிரை பேரங்களை மறைக்கவே, பிற கட்சியினர் மீதான போன் ஆடியோ விவகாரங்கள் பெரிதாக்கப்பட்டு வழக்குகள் பாய்கின்றன” என்று சாடினார்.
60 நாட்களில் 9 ஆணவக் கொலைகள் – சீர்குலைந்த சட்ட ஒழுங்கு:
தவெக ஆட்சிப் பொறுப்பேற்ற இந்த குறுகிய 60 நாட்களுக்குள் தமிழகத்தில் இதுவரை இல்லாத அளவாக 9 ஆணவக் கொலைகள் அரங்கேறியுள்ளதாகக் குறிப்பிட்ட அவர், கும்மிடிப்பூண்டி மற்றும் கோயம்புத்தூரில் சிறுமிகளுக்கு எதிரான பாலியல் வன்கொடுமைகள் மற்றும் தொடர்ந்து நிகழ்ந்து வரும் சிறை மரணங்கள் தவெக ஆட்சியில் சட்ட ஒழுங்கு முற்றிலும் சீர்குலைந்துள்ளதைக் காட்டுகிறது என்றார். முந்தைய ஆட்சியில் நிகழ்ந்த சிறை மரணங்களின் போது நேரில் சென்று கண்டனம் தெரிவித்த விஜய், இப்போது முதலமைச்சராகப் பொறுப்பேற்ற பின் இத்தகைய கொடூர சம்பவங்களுக்கு மௌனம் சாதிப்பது ஏன் என்றும் அவர் கேள்வி எழுப்பினார்.
கொள்கையற்ற மும்மொழிக் கொள்கை அணுகுமுறை:
மத்திய அரசு தமிழகத்தில் மும்மொழிக் கொள்கையைத் திணிக்க முயலும் சூழலில், தவெக அரசின் கல்வி அமைச்சர் தனியார் சிபிஎஸ்சி (CBSE) பள்ளிகளுக்குத் தாராளமாக அனுமதி வழங்கி வருவதை அவர் சாடினார். சிபிஎஸ்சி பள்ளிகள் அதிகரித்தால் மும்மொழிக் கொள்கை தானாக நுழைந்து கல்வி மீதான மாநில அரசின் கட்டுப்பாடு பறிபோகும் என்றும், தமிழகத்தின் உயிர்நாடிப் பிரச்சினையான இருமொழிக் கொள்கையைக் காக்கத் துணிச்சல் இல்லாமல் விஜய் அரசு வேடிக்கை பார்ப்பதாகவும் வழக்கறிஞர் சுசீல் ராஜ்குமார் தனது நேர்காணலில் விரிவாகத் தெரிவித்துள்ளார்.