கணினிகளை முடக்கிய ஹேக்கர்கள்.. கைகொடுத்த ‘பழைய ஆபரேஷன்’! அமெரிக்காவில் நடந்தது என்ன?

30-க்கும் மேற்பட்ட நீர் சுத்திகரிப்பு நிலையங்கள் குறிவைப்பு: கணினிகள் முடங்கியதால் கையால் இயக்கும் முறைக்கு மாறிய அதிகாரிகள்!அமெரிக்காவின் பல்வேறு நகரங்களில் உள்ள குடிநீர் மற்றும் கழிவுநீர் சுத்திகரிப்பு நிலையங்களின் டிஜிட்டல் அமைப்புகளில் கடுமையான சைபர் ஊடுருவல்கள் நடந்துள்ளதாக அமெரிக்காவின் மத்திய புலனாய்வு அமைப்பான எஃப்பிஐ (FBI) மற்றும் சுற்றுச்சூழல் பாதுகாப்பு நிறுவனம் (EPA) அதிகாரப்பூர்வமாக எச்சரித்துள்ளன.  குறிப்பாக, மினசோட்டா மாகாணம் உட்பட 30-க்கும் மேற்பட்ட நீர் வசதி அமைப்புகள் இந்தத் தாக்குதல்களால் குறிவைக்கப்பட்டுள்ளதாகத் தகவல்கள் வெளியாகியுள்ளன.

ஹேக்கர்களின் கைவரிசையும் முடங்கிய அமைப்புகளும்
அமெரிக்காவில் உள்ள பல நீர் மற்றும் கழிவுநீர் நிறுவனங்கள் தங்களது டிஜிட்டல் அமைப்புகளில் சந்தேகத்திற்கிடமான சைபர் நடவடிக்கைகள் நடப்பதாக எஃப்பிஐ அமைப்பிடம் புகாரளித்துள்ளன. இணையத்துடன் இணைக்கப்பட்ட தொலைதூரக் கட்டுப்பாட்டு சாதனங்களுக்குள் (Remote Control Devices) சட்டவிரோதமாக ஊடுருவிய ஹேக்கர்கள், அவற்றின் ஐபி முகவரிகளையும் (IP Addresses) கடவுச்சொற்களையும் (Passwords) மாற்றி முறைகேடுகளில் ஈடுபட்டுள்ளனர்.

சில நீர் அமைப்புகளின் டிஜிட்டல் செயல்பாடுகளே இதனால் கடுமையாகப் பாதிக்கப்பட்டதால், அதிகாரிகள் வேறு வழியின்றி மீண்டும் கையால் இயக்கும் மேனுவல் (Manual) செயல்பாட்டு முறைக்கு மாற வேண்டிய கட்டாயத்திற்குத் தள்ளப்பட்டுள்ளனர்.

ஈரான் ஆதரவு ஹேக்கர்கள் பின்னணியா?
இந்தத் தாக்குதல்களுக்குப் பின்னால் ஈரான் ஆதரவு ஹேக்கர்கள் செயல்பட்டிருக்கலாம் எனச் சந்தேகிக்கப்பட்டாலும், அமெரிக்க அரசு இதுவரை எந்த ஒரு குறிப்பிட்ட நாட்டையோ அல்லது அமைப்பையோ அதிகாரப்பூர்வமாகக் குற்றஞ்சாட்டவில்லை.  மினசோட்டா நீர் அமைப்புகளில் ஏற்பட்டுள்ள பாதிப்புகள் குறித்துத் தீவிர விசாரணை நடைபெற்று வருவதாகத் தெரிவித்துள்ள அதிகாரிகள், தற்போது வரை பொதுமக்களுக்கான குடிநீர் விநியோகத்தில் எந்தவிதமான நச்சுத்தன்மையோ அல்லது மாசோ ஏற்பட்டதற்கான ஆதாரங்கள் இல்லை என்றும் உறுதிப்படுத்தியுள்ளனர்.

அமெரிக்க அரசியலில் வெடித்த விவாதம்
இந்தச் சைபர் தாக்குதல் விவகாரம் அமெரிக்க அரசியலில் பெரும் விவாதத்தையும் புயலையும் கிளப்பியுள்ளது. மினசோட்டா மாகாண நிர்வாகத்தின் மெத்தனப்போக்கும் திறமையின்மையுமே இந்தத் தாக்குதலுக்குக் காரணம் என அதிபர் டொனால்ட் ட்ரம்ப் கடுமையாக விமர்சித்துள்ளார். மேலும், போதிய ஆதாரங்களின்றி ஈரான் மீது உடனடியாகப் பழிசுமத்துவதையும் அவர் கேள்விக்குள்ளாக்கியுள்ளார். இதற்கிடையே, தாக்குதலுக்கு யார் காரணம் என்பது குறித்துத் தீவிர விசாரணை நடந்து வருவதாகவும், நவீன காலப் போர்களில் சைபர் தாக்குதல்கள் மிக முக்கிய ஆயுதமாக உருவெடுத்துள்ளதாகவும் மினசோட்டா ஆளுநர் டிம் வால்ஸ் (Tim Walz) தெரிவித்துள்ளார்.

தொடரும் அச்சுறுத்தல் – எஃப்பிஐ எச்சரிக்கை
மினசோட்டாவைத் தொடர்ந்து விஸ்கான்சின் மாகாணத்திலும் இதே போன்ற சைபர் அச்சுறுத்தல்கள் நிலவுவது கண்டறியப்பட்டுள்ளது. இதன் காரணமாக, நாட்டின் மிக முக்கியமான உள்கட்டமைப்பு பாதுகாப்பை உடனடியாக பலப்படுத்துமாறு அனைத்து நீர் நிறுவனங்களுக்கும் எஃப்பிஐ மற்றும் இபிஏ அமைப்புகள் கூட்டாக அறிவுறுத்தியுள்ளன.

ஈரான் மீதான ராணுவத் தாக்குதல்களை ரத்து செய்தார் டொனால்ட் டிரம்ப்: ஹோர்முஸ் ஜலசந்தி ஒப்பந்தம் குறித்து தீவிரப் பேச்சுவார்த்தை!