மனோன்மணியம் சுந்தரனார் பல்கலைக்கழக பட்டமளிப்பு விழாவில் தமிழ்த்தாய் வாழ்த்து பாடல் முன்னுரிமை இழந்த விவகாரம் தமிழக அரசியலில் தொடர்ந்து சர்ச்சையை ஏற்படுத்தி வரும் நிலையில், திரைப்பட இயக்குநரும் இசையமைப்பாளருமான ஜேம்ஸ் வசந்தன் கடுமையான கண்டனங்களை முன்வைத்துள்ளார்.
தமிழ்த்தாய் வாழ்த்து தொடர்பாக எழுந்த சர்ச்சை ஒரு அரசியல் கட்சிக்கான பிரச்சினை அல்ல; அது தமிழ்நாட்டின் மொழி, பண்பாடு மற்றும் அடையாளம் சார்ந்த உரிமைப் பிரச்சினை எனக் குறிப்பிட்டார். பட்டமளிப்பு விழாவிற்கு முன்னரே ஆளுநர் அலுவலகத்தின் அழுத்தம் இருப்பதாக துணைவேந்தர் வெளிப்படையாக தெரிவித்திருந்தபோதிலும், அதைத் தடுக்க வேண்டிய பொறுப்பில் இருந்தவர்கள் அமைதியாக இருந்தது வருத்தமளிப்பதாக அவர் கூறினார்.
விழா முடிந்த பிறகு சமூக வலைதளங்களில் கருத்து தெரிவிப்பதால் எந்தப் பயனும் இல்லை என்றும், அப்போதே உரிய நடவடிக்கை எடுத்திருக்க வேண்டும் என்றும் அவர் வலியுறுத்தினார். தமிழ்மொழி மற்றும் தமிழர்களின் மரியாதைக்கு எதிராக நடைபெறும் செயல்களைத் தட்டிக்கேட்காமல் மௌனம் காக்கும் அனைவரும் வரலாற்றின் முன் பதில் சொல்ல வேண்டிய சூழல் உருவாகும் என்றும் அவர் விமர்சித்தார். மேலும், தமிழகத்தில் தற்போது நடைபெறும் ஆட்சி மத்திய அரசின் செல்வாக்கில் இயங்குவதாகக் குற்றம்சாட்டிய ஜேம்ஸ் வசந்தன், மக்களின் வாக்குகளால் ஆட்சிக்கு வந்தவர்கள் மாநில உரிமைகளைப் பாதுகாக்காமல் செயல்பட்டால் தமிழ்நாட்டின் நலன்கள் பாதிக்கப்படும் என்றார்.
திரைத்துறையிலிருந்து அரசியலுக்கு வருபவர்கள் குறித்து கருத்து தெரிவித்த அவர், சினிமா புகழை மட்டுமே நம்பி அரசியலில் அதிகாரத்தைப் பெற முயல்வது ஆரோக்கியமான ஜனநாயகத்திற்கு உகந்ததல்ல என்றும், அதிகாரத்திற்காக மாநிலத்தின் உரிமைகளை விட்டுக்கொடுக்கும் அரசியலை மக்கள் இனி ஏற்றுக்கொள்ள மாட்டார்கள் என்றும் கூறினார். தமிழகத்தின் மொழி, கலாசாரம் மற்றும் மாநில உரிமைகள் தொடர்பான விவகாரங்களில் அரசும் அரசியல் கட்சிகளும் உறுதியான நிலைப்பாட்டை எடுக்க வேண்டிய அவசியம் இருப்பதாகவும், தமிழர்களின் உணர்வுகளை மதிக்கும் வகையில் செயல்பட வேண்டும் என்றும் ஜேம்ஸ் வசந்தன் தனது பேட்டியில் வலியுறுத்தினார்.
“கடந்த ஆட்சியின் அறநிலையத்துறை ஊழல்: விரைவில் வெள்ளை அறிக்கை!” — திருச்சியில் அமைச்சர் ரமேஷ் பேட்டி!