இந்தியாவில் விரைவில் தாக்கல் செய்யப்படவுள்ள தொகுதி மறுசீரமைப்பு (டிலிமிடேஷன்) மசோதா மற்றும் பெண்கள் இட ஒதுக்கீடு மசோதா குறித்தும், இதுதொடர்பாக எதிர்க்கட்சிகள் எழுப்பி வரும் அச்சங்கள் குறித்தும் பிரபல ஊடகவியலாளர் ரங்கராஜ் பாண்டே விரிவான பகுப்பாய்வை முன்வைத்துள்ளார்.
சிறப்பு நாடாளுமன்றக் கூட்டத்தொடரும் விவாதமும்
சுதந்திர தினக் கொண்டாட்டங்களுக்குப் பிறகு ஆகஸ்ட் மாத மத்தியில் 3 முதல் 4 நாட்களுக்கு நாடாளுமன்றத்தின் சிறப்புக் கூட்டத்தொடரைக் கூட்டி, தொகுதி மறுசீரமைப்பு மற்றும் பெண்கள் இட ஒதுக்கீடு மசோதாக்களை ஒரே நேரத்தில் நிறைவேற்ற மத்திய அரசு தீவிர ஆலோசனையில் ஈடுபட்டுள்ளதாகத் தகவல்கள் வெளியாகியுள்ளன. இந்த மசோதாக்கள் குறித்து அனைத்துக் கட்சிகளுடனும் விரிவான விவாதங்களை நடத்தி, இரு அவைகளிலும் ஒருமித்த கருத்துடன் நிறைவேற்ற மத்திய அரசு அழைப்பு விடுத்துள்ளதாகவும் அவர் சுட்டிக்காட்டினார். எதிர்க்கட்சித் தலைவர் ராகுல் காந்தி உள்ளிட்டோருடன் மத்திய அமைச்சர்கள் இதுகுறித்து ஆலோசனைகளை நடத்தியுள்ளதும் குறிப்பிடத்தக்கது.
தென் மாநிலங்களுக்கு எதிரா தொகுதி மறுசீரமைப்பு? – உண்மையான நிலவரம் என்ன?
மக்கள்தொகை பெருக்கத்திற்கேற்ப நாடாளுமன்ற மற்றும் சட்டமன்ற உறுப்பினர்களின் எண்ணிக்கையை உயர்த்துவது தவிர்க்க முடியாதது என்று குறிப்பிட்ட ரங்கராஜ் பாண்டே, தமிழ்நாட்டில் மக்கள்தொகை பன்மடங்கு அதிகரித்துள்ள நிலையில், அதற்கேற்ப மக்கள் பிரதிநிதிகளின் எண்ணிக்கையும் அதிகரிக்கப்பட வேண்டியது அவசியமானது என்றார்.
ஆனால், காங்கிரஸ் உள்ளிட்ட எதிர்க்கட்சிகள் தொகுதி மறுசீரமைப்பால் தென் மாநிலங்களின் நாடாளுமன்றத் தொகுதிகளின் எண்ணிக்கை குறைந்துவிடும் என்றும், இது தென் மாநிலங்கள் மீதான தாக்குதல் என்றும் பொதுமக்களிடையே பீதியைக் கிளப்பி வருவதாக அவர் குற்றம் சாட்டினார்.
எந்த மாநிலத்திற்கும் இழப்பு வராது
தொகுதி மறுசீரமைப்பால் எந்தவொரு மாநிலத்திற்கும் எந்தவித இழப்பும் ஏற்படாது என்றும், அனைத்து மாநிலங்களுக்கும் மக்கள்தொகை விகிதாச்சாரத்தின் அடிப்படையில் சீரான முறையில்தான் தொகுதிகளின் எண்ணிக்கை உயர்த்தப்படவுள்ளது என்றும் அவர் தெளிவுபடுத்தினார். உதாரணமாக, உத்தரப் பிரதேசம் போன்ற மாநிலங்களுக்கு எந்த விகிதத்தில் தொகுதிகள் அதிகரிக்கப்படுகிறதோ, அதே விகிதாச்சாரத்தில்தான் தமிழ்நாட்டிற்கும் தொகுதிகள் உயர்த்தப்படும் என்பதால், இதில் எந்தவிதப் பாதிப்பும் இருக்காது என்று அவர் உறுதியாகத் தெரிவித்தார்.
மக்களுக்கு மத்தியில் தேவையற்ற அச்சத்தையும், பூச்சாண்டியையும் காட்டுவதை விட்டுவிட்டு, நாடாளுமன்றத்தில் நடைபெறும் விவாதங்களில் எதிர்க்கட்சிகள் கலந்துகொண்டு தங்களது வாதங்களை முன்வைக்க வேண்டும் என்பதே தேசத்தின் எதிர்பார்ப்பாக உள்ளது என அவர் வலியுறுத்தியுள்ளார்.
உதயநிதி ஸ்டாலின் கைது: இது மக்கள் கவனத்தைத் திசைதிருப்பும் அரசியல் நாடகமா? – என்.ஆர். இளங்கோ பேட்டி!