- Advertisement -
சென்னையில் நடைபெற்ற 12-வது தேசிய கைத்தறி நாள் விழாவில், ‘HANDTEX 2026’ கைத்தறிக் கண்காட்சியைத் தமிழ்நாடு முதலமைச்சர் விஜய் தொடங்கி வைத்தார்.
பாரம்பரிய ரகங்களின் அணிவகுப்பு:
சென்னை கலைவாணர் அரங்கில் நடைபெற்ற இந்த விழாவில் அமைக்கப்பட்ட கைத்தறிக் கண்காட்சியில், கைத்தறி நெசவாளர் கூட்டுறவு சங்கங்கள் உற்பத்தி செய்த பல்வேறு பாரம்பரிய ஆடைகள் காட்சிப்படுத்தப்பட்டிருந்தன. இதில்:
- காஞ்சிபுரம், ஆரணி மற்றும் திருபுவனம் பட்டுச் சேலைகள்
- கோவை கோரா மற்றும் நெகமம் பருத்திச் சேலைகள்
- சேலம் வெண்பட்டு வேட்டிகள்
உள்ளிட்ட பல பிரத்யேக நெசவு ரகங்கள் இடம்பெற்றுப் பார்வையாளர்களைக் கவர்ந்தன.
‘வெற்றித் தறி’ புதிய விற்பனையகம் தொடக்கம்:
தமிழக நெசவாளர்களின் கைத்தறித் தயாரிப்புகளை உலகளவில் சந்தைப்படுத்தும் நோக்கில், கோ-ஆப்டெக்ஸ் (Co-optex) நிறுவனத்தின் புதிய “வெற்றித் தறி” விற்பனையகம் மற்றும் அதன் மின்-வணிகத்தளத்தினையும் (E-Commerce Platform) முதலமைச்சர் தொடங்கி வைத்தார்.
புவிசார் குறியீடு பெற்ற ஆடைகள்:
விழாவின் கருப்பொருள் காட்சி அரங்கில் (Theme Pavilion), மாநில அளவில் விருதுபெற்ற நெசவாளர்கள் மற்றும் வடிவமைப்பாளர்கள் உருவாக்கிய கைத்தறித் தயாரிப்புகள் இடம்பெற்றன. மேலும், புவிசார் குறியீடு (GI Tag) பெற்ற மதுரை சுங்குடி சேலைகள், செட்டிநாடு கண்டாங்கிச் சேலைகள் உள்ளிட்ட பாரம்பரிய நெசவுப் பொருட்களும் காட்சிப்படுத்தப்பட்டிருந்தன.
சிறந்த நெசவாளர்களுக்கு விருதுகள் மற்றும் பரிசுத் தொகை:
2025-2026-ஆம் ஆண்டிற்கான சிறந்த நெசவாளர் மற்றும் வடிவமைப்பாளர் விருதுகளுக்குத் தேர்வான 11 விருதாளர்களுக்கு, மொத்தம் ரூ.22.25 லட்சத்திற்கான காசோலைகள் மற்றும் பாராட்டுச் சான்றிதழ்களை முதலமைச்சர் வழங்கிச் சிறப்பித்தார்.
மேகதாது விவகாரத்தில் தமிழகத்தை விற்கும் தவெகவின் சந்தர்ப்பவாத அரசியல் – சீமான் ஆவேசம்!