சென்னை யானைக்கவுனி பாலம் அருகே உள்ள சால்ட் கொட்டாய் பகுதியில் நிலவும் கடுமையான சாலைச் சேதத்தைக் கண்டித்தும், அதிகாரிகளின் மெத்தனப் போக்கை எதிர்த்தும் மேத்யூ ரயில்வே குடியிருப்பு வாசிகள் 50-க்கும் மேற்பட்ட தண்ணீர் லாரிகளைச் சிறைபிடித்துப் போராட்டத்தில் ஈடுபட்டனர். இச்சம்பவத்தால் அப்பகுதியில் சிறிது நேரம் பரபரப்பு ஏற்பட்டது.
குடியிருப்புவாசிகளின் கடும் அவதி
யானைக்கவுனி பாலத்தின் கீழே சால்ட் கொட்டாய் பகுதியில் சென்னை பெருநகர குடிநீர் வழங்கல் மற்றும் கழிவுநீரக அகற்று வாரியத்தின் (மெட்ரோ வாட்டர்) நீரேற்று நிலையமும், அதனை ஒட்டி மேத்யூ ரயில்வே குடியிருப்பும் அமைந்துள்ளன. இப்பகுதியில் ரயில்வே பாதுகாப்புப் படை (RPF) காவலர்கள், ரயில்வே காவலர்கள் மற்றும் தொழில்நுட்பப் பணியாளர்கள் என நூற்றுக்கும் மேற்பட்ட குடும்பங்கள் வசித்து வருகின்றன.
இப்பகுதி வழியாகத் தினசரி 200-க்கும் மேற்பட்ட தண்ணீர் லாரிகள் வந்து செல்வதால், அப்பகுதியில் உள்ள சாலைகள் முற்றிலும் குண்டும் குழியுமாகச் சேதமடைந்துள்ளன. இதனால் நேற்று பெய்த கனமழையின் காரணமாகச் சாலையில் மழைநீருடன் சாக்கடை நீரும் சேர்ந்து பெருக்கெடுத்து ஓடியது. நடந்து கூட செல்ல முடியாத அளவுக்கு மோசமான நிலை ஏற்பட்டுள்ளதால், பள்ளி மாணவர்களும் முதியவர்களும் கடும் அவதிக்குள்ளாகினர்.
பலமுறை கோரிக்கை வைத்தும் அலட்சியம்
சாலைச் சீரமைப்புப் பணிகள் குறித்து சம்பந்தப்பட்ட அதிகாரிகளின் கவனத்திற்குப் பலமுறை புகார்கள் அனுப்பப்பட்டும், எந்தவித நடவடிக்கையும் எடுக்கப்படவில்லை எனக் குடியிருப்புவாசிகள் குற்றம் சாட்டுகின்றனர். பழுதடைந்த சாலைகளால் அப்பகுதியில் அடிக்கடி விபத்துகள் ஏற்படுவதாகவும் அவர்கள் வேதனை தெரிவித்தனர்.
லாரிகள் சிறைபிடிப்பு மற்றும் பேச்சுவார்த்தை
அதிகாரிகளின் தொடர் அலட்சியத்தைக் கண்டித்து ஆத்திரமடைந்த ரயில்வே குடியிருப்பு வாசிகள் திடீரெனச் சாலையில் இறங்கிப் போராட்டத்தில் ஈடுபட்டதுடன், அவ்வழியாக வந்த 50-க்கும் மேற்பட்ட தண்ணீர் லாரிகளைச் சிறைபிடித்தனர்.
இதுகுறித்துத் தகவலறிந்த பெரியமேடு காவல் நிலைய போலீசார் உடனடியாகச் சம்பவ இடத்திற்கு விரைந்து சென்று, போராட்டத்தில் ஈடுபட்டவர்களுடன் பேச்சுவார்த்தை நடத்தினர். மேலும், லாரிகள் சிறைபிடிக்கப்பட்ட விவகாரம் குறித்து மெட்ரோ வாட்டர், மாநகராட்சி மற்றும் காவல் துறை உயர் அதிகாரிகளுக்குத் தகவல் தெரிவிக்கப்பட்டது.
போராட்டம் விலக்கிக் கொள்ளப்பட்டது
இதையடுத்து, சேதமடைந்த சாலையைச் சீரமைக்கும் பணிகள் உடனடியாகப் போர்க்கால அடிப்படையில் தொடங்கப்படும் என அதிகாரிகள் தரப்பில் உறுதியளிக்கப்பட்டது. அதிகாரிகளின் உறுதிமொழியை ஏற்றுக்கொண்ட குடியிருப்புவாசிகள் தங்கள் போராட்டத்தைக் கைவிட்டுத் தற்காலிகமாகக் கலைந்து சென்றனர்.