பாகிஸ்தான் முன்னாள் பிரதமர் இம்ரான் கானின் உடல்நிலை குறித்த கவலைகள் அதிகரித்து வரும் சூழலில், அவரை உடனடியாக மருத்துவமனைக்கு மாற்ற அந்நாட்டு உச்ச நீதிமன்றம் அதிரடி உத்தரவு பிறப்பித்துள்ளது.
நீதிமன்றத்தின் தலையீடு
ஊழல் உள்ளிட்ட பல்வேறு வழக்குகளில் தண்டனை பெற்று, கடந்த இரண்டு ஆண்டுகளுக்கும் மேலாக அடியாலா தனிமைச் சிறையில் அடைக்கப்பட்டுள்ளவர் இம்ரான் கான். சிறையில் அவரது உடல்நிலை கடுமையாகப் பாதிக்கப்பட்டிருப்பதாகக் கூறி, அவரை மருத்துவமனைக்கு மாற்றக் கோரி அவரது தரப்பினர் உச்ச நீதிமன்றத்தில் வழக்கு தொடர்ந்திருந்தனர்.
இந்த வழக்கினை நீதிபதி ஷாஹித் வாஹித் தலைமையிலான, நீதிபதிகள் நஹீம் அக்தர் ஆப்கான் மற்றும் இஷ்டியாக் இப்ராஹிம் ஆகியோர் அடங்கிய மூன்று பேர் கொண்ட அமர்வு விசாரித்தது. வழக்கை விசாரித்த நீதிபதிகள், வரும் 48 மணி நேரத்திற்குள் இம்ரான் கானை இஸ்லாமாபாத்தில் உள்ள ஷிபா சர்வதேச மருத்துவமனைக்கு மாற்ற வேண்டும் என்று பாகிஸ்தான் அரசுக்கு உத்தரவிட்டுள்ளனர்.
குடும்பத்தினருடன் சந்திக்க அனுமதி
மருத்துவமனை மாற்றத்துடன் சேர்த்து, இம்ரான் கானைச் சந்திப்பதில் அவரது குடும்பத்தினர் மற்றும் வழக்கறிஞர்களுக்கு விதிக்கப்பட்டிருந்த கடும் கட்டுப்பாடுகளைத் தளர்த்தவும் நீதிமன்றம் உத்தரவிட்டுள்ளது. அதன்படி, இனி வாரம் ஒருமுறை அவரது குடும்பத்தினர் அவரை நேரில் சந்திக்க அனுமதி அளிக்க வேண்டும் என்று அரசுக்கு அறிவுறுத்தப்பட்டுள்ளது. மேலும், இம்ரான் கானின் தனிப்பட்ட மருத்துவர் மற்றும் அவரது சகோதரி உஸ்மா கான் ஆகியோர் அடங்கிய சிறப்பு மருத்துவக் குழுவை அமைக்கவும் உத்தரவிடப்பட்டுள்ளது.
வதந்திகளுக்கு முற்றுப்புள்ளி
சமீபகாலமாக, இம்ரான் கான் சிறையிலேயே மரணமடைந்துவிட்டதாக இணையத்தில் தவறான தகவல்கள் வைரலாகி வந்தன. இதை பாகிஸ்தான் அரசின் தகவல் மற்றும் ஒளிபரப்பு அமைச்சகம் மறுத்திருந்தது. இந்தச் சூழலில், உச்ச நீதிமன்றத்தின் இந்த உத்தரவு, இம்ரான் கானின் உடல்நிலை குறித்த தேவையற்ற வதந்திகளுக்கு முற்றுப்புள்ளி வைத்துள்ளது.
அதேவேளையில், இம்ரான் கானின் மருத்துவ அறிக்கைகளை ஊடகங்களில் வெளியிடுவதையோ அல்லது இதனை வைத்து அரசியல் ஆதாயம் தேட முயற்சிப்பதையோ தவிர்க்க வேண்டும் என்றும் நீதிமன்றம் எச்சரித்துள்ளது. இம்ரான் கானை மருத்துவமனைக்கு மாற்றும் இந்த நீதிமன்ற உத்தரவு, அவருக்கு ஆதரவானவர்களிடையே பெரும் நிம்மதியை ஏற்படுத்தியுள்ளது.
உக்ரைனுக்கு ஆயுத உதவி போன்ற பிரிட்டனின் ஈடுபாடு நேரடி போர்தான்: ரஷ்யா கடும் எச்சரிக்கை!