அரசு வாகனத்திற்கு ஓட்டுநர் இல்லை: இருசக்கர வாகனத்தில் சட்டப்பேரவைக்கு வந்த என்.ஆர்.காங்கிரஸ் எம்.எல்.ஏ. வையாபுரி மணிகண்டன்!

புதுச்சேரி சட்டப்பேரவைக்கு ஆளுங்கட்சியைச் சேர்ந்த சட்டமன்ற உறுப்பினர் ஒருவர் கார் இருந்தும் ஓட்டுநர் இல்லாததால் இருசக்கர வாகனத்தில் வருகை தந்த சம்பவம் பேரவை வளாகத்தில் பெரும் பரபரப்பையும் கவனத்தையும் ஈர்த்துள்ளது.

புதுச்சேரி யூனியன் பிரதேசத்தில் ஆளுங்கட்சி மற்றும் எதிர்க்கட்சியைச் சேர்ந்த அனைத்து சட்டமன்ற உறுப்பினர்களுக்கும் (MLA) சட்டப்பேரவை அலுவல் பயன்பாட்டிற்காக அரசு சார்பில் கார்கள் வழங்கப்பட்டுள்ளன.

காரும் இல்லை, ஓட்டுநரும் இல்லை: பைக் பயணம் ஏன்?
இந்நிலையில், எம்.எல்.ஏ-க்களுக்கு அரசு சார்பில் கார்கள் ஒதுக்கப்பட்டிருந்தபோதிலும், அந்த வாகனங்களை இயங்குவதற்குத் தேவையான அரசு ஓட்டுநர்கள் (Drivers) முறைப்படி நியமிக்கப்படவில்லை என்ற குற்றச்சாட்டு எழுந்துள்ளது. இதன் காரணமாக, பேரவைக் கூட்டத்தில் பங்கேற்பதற்காக ஆளும் என்.ஆர்.காங்கிரஸ் கட்சியைச் சேர்ந்த முத்தியால்பேட்டை தொகுதி சட்டமன்ற உறுப்பினர் வையாபுரி மணிகண்டன், இன்று தனது சொந்த இருசக்கர வாகனத்திலேயே சட்டப்பேரவை வளாகத்திற்கு வந்து இறங்கினார். சட்டமன்ற உறுப்பினர் ஒருவர் பைக் ஓட்டி பேரவைக்கு வந்ததைக் கண்டு அங்கிருந்த பாதுகாப்பு ஊழியர்களும் அதிகாரிகளும் ஆச்சரியமடைந்தனர்.

அதிகாரிகள் மீது அதிரடி குற்றச்சாட்டு
செய்தியாளர்களிடம் பேசிய எம்.எல்.ஏ வையாபுரி மணிகண்டன், அரசு அதிகாரிகளின் நடவடிக்கைகளுக்கு எதிராகத் தனது கடும் கண்டனத்தைப் பதிவு செய்தார். “உயர் அரசு அதிகாரிகள் பலர் தங்களது அதிகாரப் பயன்பாட்டிற்காக ஒன்றுக்கும் மேற்பட்ட ஓட்டுநர்களை வைத்துக்கொண்டு ஆடம்பரமாகப் பயணித்து வருகின்றனர். ஆனால், மக்களால் தேர்ந்தெடுக்கப்பட்ட சட்டமன்ற உறுப்பினர்களுக்கு ஒதுக்கப்பட்ட கார்களுக்கு ஒரு ஓட்டுநரைக் கூட நியமிக்காமல் அதிகாரிகள் இழுத்தடிப்பு செய்து வருகின்றனர்” என்று குற்றம்சாட்டினார்.

“சாமி வரம் கொடுத்தாலும் பூசாரி வரம் தரவில்லை!”
அரசு நிர்வாகத்தின் செயல்பாடுகள் குறித்துச் சுட்டிக்காட்டி அவர் பேசுகையில்,  “சட்டமன்ற உறுப்பினர்களுக்குக் கார் மற்றும் ஓட்டுநர் வசதிகளை செய்து தர வேண்டும் எனச் ‘சாமி’யாக இருக்கும் முதல்வர் (முதலமைச்சர்) வரம் கொடுத்தாலும், ‘பூசாரி’யாகச் செயல்படும் அரசு அதிகாரிகள் வரம் கொடுக்க மறுக்கிறார்கள்” என்று பழமொழியைக் குறிப்பிட்டு அதிகாரிகளை விமரிசித்தார். ஆளுங்கட்சி சட்டமன்ற உறுப்பினரே அரசு அதிகாரிகளின் அலட்சியப் போக்கைக் கண்டித்து இருசக்கர வாகனத்தில் பேரவைக்கு வந்த சம்பவம் புதுச்சேரி அரசியலில் பெரும் விவாதப் பொருளாக மாறியுள்ளது.

₹22,000 கோடி கடனில் ‘மாஸ்’ ட்விஸ்ட்! சுபாஷ் சந்திராவுக்கு 99.97% தள்ளுபடி.. கதறும் முன்னணி வங்கிகள்!