இந்திய அரசியலில் தேர்தல் களம் சூடுபிடித்துள்ள நிலையில், தேசிய அளவில் பிரதமர் ரேஸில் நடிகர் விஜய் முன்னுக்கு வருவது குறித்த விவாதங்கள் அரசியல் வட்டாரத்தில் பெரும் பரபரப்பை ஏற்படுத்தியுள்ளன. பிரபல கருத்துக்கணிப்பு நிறுவனமான ‘சி-ஓட்டர்ஸ்’ (C-Voters) வெளியிட்டுள்ள ‘மூட் ஆஃப் தி நேஷன்’ (Mood of the Nation) முடிவுகள் அரசியல் கட்சிகள் மத்தியில் புதிய திருப்பங்களை ஏற்படுத்தியுள்ளன.
தேசிய அளவில் வலுப்பெறும் விஜய் முகம்
சமீபத்தில் வெளியிடப்பட்ட சி-ஓட்டர்ஸ் கருத்துக்கணிப்பு முடிவுகளின்படி, பிரதமர் நரேந்திர மோடி முதலிடத்திலும், காங்கிரஸ் மூத்த தலைவர் ராகுல் காந்தி இரண்டாம் இடத்திலும் உள்ள நிலையில், தமிழக அரசியல் தாண்டி தேசிய அளவில் நடிகர் விஜய் குறிப்பிடத்தக்க சதவீத வாக்குகளைப் பெற்று முன்னிலைக்கு வந்துள்ளார். குறிப்பாக, வட மாநிலங்களில் சமூக வலைதளங்கள் மற்றும் ‘ரீல்ஸ்’ (Reels) மூலமாக விஜய்யை ஒரு தேசிய தலைவராக முன்னிறுத்தும் உத்திகள் பெரிய அளவில் மக்களிடம் தாக்கத்தை ஏற்படுத்தி வருவதாக அரசியல் விமர்சகர்கள் சுட்டிக்காட்டுகின்றனர். இதற்காகப் பிரத்யேக சமூக வலைதளக் குழுக்கள் பல கோடிகளைச் செலவிட்டு வருவதாகவும் தகவல்கள் வெளியாகி உள்ளன.
டெல்லி காங்கிரஸ் மேடையில் அதிர்ச்சி அலைகள்
வட இந்திய ஊடகங்களிலும், சமூக வலைதளங்களிலும் விஜய் குறித்த விவாதங்களும் கருத்துக்கணிப்புகளும் பரவி வருவது காங்கிரஸ் தலைமையைக் கடுமையாக உலுக்கியுள்ளது. இந்தியா கூட்டணியின் பிரதமர் முகமாக ராகுல் காந்தி முன்னிறுத்தப்படும் நிலையில், மற்றொரு கூட்டணிக் கட்சியின் தலைவரான விஜய் தேசிய அளவில் தேசியத் தலைவர்களுக்கு இணையாகப் பேசப்படுவது காங்கிரஸ் தலைவர்களிடையே பெரும் அதிருப்தியை ஏற்படுத்தியுள்ளது.
இதனைத் தொடர்ந்து, காங்கிரஸ் கட்சியின் முக்கியத் தலைவர்களான மாணிக்கம் தாகூர் மற்றும் பிரவீண் சக்கரவர்த்தி ஆகியோரிடம் கட்சித் தலைமை விளக்கம் கேட்டுள்ளதாகவும், தேசிய அரசியலில் ஏற்பட்டுள்ள இந்தச் சூழல் காங்கிரஸ் – தவெக கூட்டணியில் புதிய உரிசல்களை உருவாக்கக்கூடும் என்றும் டெல்லி வட்டாரங்கள் தெரிவிக்கின்றன.
தமிழக அரசியலில் தொடரும் சவால்கள்
மறுபுறம், தமிழகத்தில் விலைவாசி உயர்வு, சட்டம் ஒழுங்கு பிரச்சினைகள் மற்றும் பல்வேறு தரப்பினரின் போராட்டங்கள் குறித்து எதிர்க்கட்சிகள் தொடர்ந்து குரல் எழுப்பி வருகின்றன. எனினும், நவீன ஊடகங்களின் தாக்கம் மற்றும் சமூக வலைதளங்களின் பிரச்சாரங்கள் பொதுமக்களின் அரசியல் பார்வையை மாற்றி அமைத்து வருவதாகவும் அரசியல் களத்தில் விவாதிக்கப்படுகிறது.
தேசிய அளவில் விஜய்யின் இந்த அசுர வளர்ச்சி காங்கிரஸ் கட்சிக்கு நெருக்கடியைக் கொடுத்துள்ளதோடல்லாமல், வரவிருக்கும் காலங்களில் தேசிய மற்றும் மாநில அரசியலில் பெரும் மாற்றங்களை ஏற்படுத்துமா என்ற எதிர்பார்ப்பையும் ஏற்படுத்தியுள்ளது.