தமிழகத்தில் புதிதாகப் பொறுப்பேற்றுள்ள தமிழக வெற்றிக் கழகத்தின் (தவெக) ஆட்சி நிர்வாகத்தில் நிலவும் தடுமாற்றங்கள் மற்றும் கூட்டணிக் கட்சிகளுக்கு இடையே வெடித்துள்ள கடுமையான முரண்பாடுகள் குறித்து திராவிட வெற்றி கழகத்தின் முதன்மைச் செயலாளர் தோழர் வள்ளம் பசீர் தனது கருத்துக்களை முன்வைத்துள்ளாா். 
அதிகாரப் பொறுப்பும் நிர்வாகத் தடுமாற்றமும்
தவெக தமிழகத்தில் ஆட்சியமைத்ததில் இருந்தே பல்வேறு அதிரடியான மற்றும் சர்ச்சைக்குரிய முடிவுகளை எடுத்து வருவதாகச் சுட்டிக்காட்டிய வள்ளம் பசீர், பரந்தூர் விமான நிலையத் திட்டம் மற்றும் செம்மஞ்சேரி விளையாட்டு நகரம் அமைக்கும் திட்டம் ஆகியவை ரத்து செய்யப்பட்டதை மேற்கோள் காட்டினார். மேலும், முன்னாள் முதலமைச்சர் மு.க.ஸ்டாலினுக்கு வழங்கப்பட்டு வந்த பாதுகாப்பை ஒரே நாளில் வாபஸ் பெற்ற நடவடிக்கை அரசின் அராஜகப் போக்கையே காட்டுகிறது என்றார். எதிர்பாராத வகையில் கிடைத்த அதிகாரப் பொறுப்பினால் அடுத்து என்ன செய்வதென்று தெரியாமல் முதல்வர் விஜய் தடுமாறி வருவதாகவும், தனது வழக்கமான தனிமை வாழ்க்கையிலிருந்து வெளியே வந்து கூட்டணிக் கட்சிகளை அரவணைத்துச் செல்லும் தலைமைப் பண்பு அவரிடம் இல்லை என்றும் அவர் விமர்சித்தார்.
கூட்டணிக்குள் வெடித்துள்ள உச்சக்கட்ட மோதல்
சட்டமன்றத்தில் பாஜக அல்லது பிரதமர் மோடியின் கொள்கைகளைக் கூட்டணிக் தலைவர்கள் விமர்சிக்க முற்படும் போது, தவெகவின் அமைச்சர்களே அவர்களைப் பேசவிடாமல் தடுப்பது கூட்டணித் தலைவர்களிடையே பெரும் நெருக்கடியை உருவாக்கியுள்ளது. மாலதிமுக பொதுச்செயலாளர் வைகோவின் புத்தக வெளியீட்டு விழாவிற்கு வருவதாகக் கூறிவிட்டு கடைசி நேரத்தில் விஜய் வர மறுத்ததும், வைகோவை கூட்டணியின் ஒருங்கிணைப்பாளராக நியமிக்கத் தயங்குவதும் கூட்டணிக்குள்ளான அதிருப்தியை அதிகரித்துள்ளது.
மறுபுறம், விஜய்யைப் பிரதமர் வேட்பாளராகத் தவெகவினர் முன்னிறுத்துவதை காங்கிரஸ் கடுமையாக எதிர்த்து வருகிறது. ராகுல் காந்தியைப் பிரதமர் வேட்பாளராக ஏற்கத் தவறினால் அமைச்சரவையில் இருந்து பதவி விலகத் தயங்க மாட்டோம் என்று சுற்றுலாத்துறை அமைச்சர் ராஜேஷ் குமார் பகிரங்கமாக எச்சரித்துள்ளது கூட்டணியின் உடைவை வெளிச்சம்போட்டுக் காட்டியுள்ளது.
பாஜகவின் வியூகத்தில் வீழ்ந்ததா காங்கிரஸ்?
கூட்டணியில் உள்ள கம்யூனிஸ்ட் கட்சிகள் அரசின் தவறுகளைத் தொடர்ச்சியாகச் சுட்டிக்காட்டி வருகின்றன என்றும், அதனால் தான் அவர்கள் ஆட்சியில் பங்கேற்காமல் வெளியிலிருந்தே ஆதரவு அளித்து வருவதாகவும் அவர் தெளிவுபடுத்தினார். திமுக கூட்டணியை விட்டு விலகி விஜய்யுடன் காங்கிரஸ் கை கோர்த்தது பாஜகவின் திட்டத்திற்கு மிகவும் சாதகமாக அமைந்துவிட்டது என்று குறிப்பிட்ட வள்ளம் பசீர், “காங்கிரஸ் இல்லாத இந்தியா”வை உருவாக்கத் துடிக்கும் பாஜகவின் வியூகத்திற்குள் காங்கிரஸ் தானே போய் விழுந்து தனக்கான குழியைப் பறித்துக் கொண்டுள்ளதாகச் சாடினார். இதன்மூலம் தமிழகத்தில் பாஜக தனது அரசியல் காய்களை மிக இலகுவாக நகர்த்தி வருவதாகத் தனது பேட்டியில் அவர் நிறைவு செய்தார்.