நாடாளுமன்றக் கூட்டத்தொடர்களில் பெரும் விவாதப் பொருளாக உருவெடுத்துள்ள ‘தொகுதி மறுவரையறை’ (Delimitation) விவகாரம் குறித்து முன்னாள் தலைமைத் தேர்தல் ஆணையர் எஸ்.ஒய். குரேஷி விரிவான விளக்கங்களை அளித்துள்ளார்.
தென்மாநிலங்களின் உரிமையும் 50 ஆண்டு காலத் தடையும்
இந்திய அரசியலமைப்புச் சட்டத்தின் விதிகள் 81 மற்றும் 82-ன் படி, ஒவ்வொரு மக்கள் தொகை கணக்கெடுப்பிற்குப் பிறகும் லோக்சபா தொகுதிகள் மறுவரையறை செய்யப்பட வேண்டும். இருப்பினும், மக்கள் தொகையைக் வெற்றிகரமாகக் கட்டுப்படுத்திய தென்மாநிலங்கள் லோக்சபாவில் தங்களது பிரதிநிதித்துவத்தையும் அதிகாரத்தையும் இழந்துவிடக் கூடாது என்பதற்காக, 1976-ல் அப்போதைய இந்திரா காந்தி அரசால் தொகுதி மறுவரையறை 25 ஆண்டுகளுக்கு முடக்கப்பட்டது.
அதன்பின்னர் 2001-ல் வாஜ்பாய் அரசும் இதே காரணத்தைச் சுட்டிக்காட்டி மேலும் 25 ஆண்டுகள் (2026 வரை) தள்ளிப்போட்டது. தற்போது 2026-க்குப் பிறகான மக்கள் தொகை கணக்கெடுப்பின்படி மீண்டும் தொகுதி மறுவரையறை செய்ய முற்படும் போது, தென்மாநிலங்களின் அதிகாரம் பறிபோகும் என்ற அச்சமும் எதிர்ப்பும் மீண்டும் மேலெழுந்துள்ளது.
50% சீட்டுகள் உயர்வு நியாயமான தீர்வாகுமா?
அனைத்து மாநிலங்களுக்கும் சமமாக 50% லோக்சபா சீட்டுகளை உயர்த்தினால் (உதாரணமாகத் தமிழகத்திற்கு 40-லிருந்து 60; உத்தரப்பிரதேசத்திற்கு 80-லிருந்து 120) அது விகிதாச்சார ரீதியாகச் சரியாகத் தோன்றினாலும், ‘ஒட்டுமொத்த எம்பிக்களின் எண்ணிக்கை’ (Absolute Numbers) அடிப்படையில் வடமாநிலங்களின் ஆதிக்கமே ஓங்கும். நாடாளுமன்றத்தில் சட்டங்கள் மற்றும் மசோதாக்கள் நிறைவேற்றப்பட விகிதாச்சாரத்தை விட எம்பிக்களின் மொத்த எண்ணிக்கையே பிரதானம் என்பதால், இந்த சீட்டுகள் உயர்வு முறை தென்மாநிலங்களின் குரலை ஒடுக்கிவிடும் என்று எஸ்.ஒய். குரேஷி சுட்டிக்காட்டியுள்ளார்.
மக்களவை எம்பி சீட்டுகளை உயர்த்தாமல் மறுவரையறை செய்ய வழிமுறைகள்
தொகுதி மறுவரையறை என்பதை லோக்சபா சீட்டுகளின் எண்ணிக்கையை உயர்த்துவதோடு (543-லிருந்து 800 ஆக) பிணைக்க வேண்டிய அவசியமில்லை. 2001 மக்கள் தொகை கணக்கெடுப்பின் போது லோக்சபாவின் 543 என்ற மொத்த சீட்டுகளின் எண்ணிக்கையை மாற்றாமல், மாநில எல்லைகளுக்குள் மட்டுமே தொகுதிகள் மறுசீரமைக்கப்பட்டன. அதேபோல, அமெரிக்காவில் கடந்த 100 ஆண்டுகளாகப் பிரதிநிதிகள் சபையின் எண்ணிக்கை 435 ஆக மாறாமல் உள்ளது. சுவிட்சர்லாந்து, ஹங்கேரி மற்றும் இத்தாலி ஆகிய நாடுகளிலும் எம்பிக்களின் எண்ணிக்கை உயர்த்தப்படாமல் கட்டுப்படுத்தப்பட்டுள்ளது.
எம்.எல்.ஏ-க்களின் எண்ணிக்கையை உயர்த்தலாம்
மக்களுடன் நேரடியாகத் தொடர்பில் இருப்பது எம்.எல்.ஏ-க்களும் உள்ளாட்சிப் பிரதிநிதிகளுமே தவிர எம்பிக்கள் அல்ல. எனவே, மக்களாட்சியை வலுப்படுத்த லோக்சபா எம்பிக்களின் எண்ணிக்கையை உயர்த்துவதற்குப் பதிலாக, ஒவ்வொரு மாநில சட்டமன்றங்களுக்குள்ளும் எம்.எல்.ஏ-க்களின் எண்ணிக்கையை உயர்த்தலாம். சிறிய அளவிலான தொகுதிகளாகப் பிரிக்கப்படும் போது மக்களுக்கான சேவை இன்னும் சிறப்பாகச் சென்றடையும்.
மேலும், மகளிர் இடஒதுக்கீட்டை லோக்சபா சீட்டுகளின் உயர்வுடன் முடிச்சுப் போடுவதும் தவறானது. சீட்டுகளை 800 ஆக உயர்த்தினாலும் வடமாநிலப் பெண்களுக்கே அதிக வாய்ப்பு கிடைத்து தென்மாநிலப் பெண்களுக்குப் பாதிப்பு ஏற்படும். எனவே, தற்போதைய லோக்சபா மொத்த சீட்டுகளின் எண்ணிக்கையான 543 என்பதை மாற்றாமல் அப்படியே பராமரித்துக்கொண்டு, மாநிலங்களுக்குள் மட்டும் தொகுதி மறுவரையறை செய்வதே உண்மையான “நீதியான தொகுதி மறுவரையறை” (Fair Delimitation) ஆகும் என்று எஸ்.ஒய். குரேஷி வலியுறுத்தியுள்ளார்.
நாடாளுமன்றக் கூட்டத்தொடர் நிலுவை: தொகுதி மறுவரையறை மசோதாவை நிறைவேற்ற மத்திய அரசு தீவிர முயற்சி!