உலகப்புகழ் பெற்ற ஹாலிவுட் இயக்குனர் கிறிஸ்டோபர் நோலன், தனது வரவிருக்கும் ‘தி ஒடிசி’ (The Odyssey) படத்தின் விளம்பரப் பணிகளுக்காக இந்தியா வருகை தந்திருந்தார். அவருடன் பிரபல ஹாலிவுட் நடிகர்களான டாம் ஹாலண்ட் (Tom Holland) மற்றும் மேட் டாமன் ஆகியோரும் உடனிருந்தனர். இந்நிலையில், மும்பையின் மிகவும் பழமை வாய்ந்த மற்றும் புகழ்பெற்ற 108 ஆண்டுகள் பழமையான ‘ஒலிம்பியா’ உணவகத்திற்கு இந்த ஹாலிவுட் பிரபலங்கள் தேநீர் அருந்தச் சென்றது அப்பகுதியில் பெரும் உற்சாகத்தை ஏற்படுத்தியது.
உணவு பாதுகாப்புத் துறையின் அதிரடி சோதனை
இதற்கிடையே, பிரபலங்கள் சென்று வந்த அதே 108 ஆண்டுகள் பழமை வாய்ந்த ஒலிம்பியா உணவகத்தில் உள்ள சுகாதாரக் குறைபாடுகள் மற்றும் முறைகேடுகள் குறித்து கடந்த 16-ஆம் தேதி அன்று உணவு பாதுகாப்புத் துறைக்குக் கடுமையான புகார்கள் பறந்தன. அந்தப் புகாரில் உணவகத்தின் சுகாதாரமற்ற உணவு தயாரிப்பு முறைகள் விரிவாகச் சுட்டிக்காட்டப்பட்டிருந்தன.
இதையடுத்து, சம்பந்தப்பட்ட உணவகத்திற்கு விரைந்த உணவுப் பாதுகாப்புத் துறை அதிகாரிகள் தீவிர சோதனையில் ஈடுபட்டனர். இந்தச் சோதனையின் முடிவில் பல அதிர்ச்சி தரும் உண்மைகள் வெளிச்சத்திற்கு வந்தன.
சுகாதாரமற்ற சூழல்: உணவு தயாரிக்கப்படும் இடத்திற்கும், சிறுநீர் கழிக்கும் பகுதிக்கும் இடையே முறையான தடுப்புகள் எதுவும் இல்லை என்பது கண்டறியப்பட்டது. கை கழுவும் இடமும் சமையலறையும் சுத்தமின்றி அசுத்தமாகப் பராமரிக்கப்பட்டு வந்தன.
- உணவுப் பொருள்களில் அலட்சியம்: சைவ மற்றும் அசைவ உணவுகள் எவ்விதப் பாதுகாப்பு முறைகளும் இன்றி முறையாகப் பிரித்து வைக்கப்படாமல் ஒன்றாகவே கையாளப்பட்டுள்ளன.
- கரப்பான் பூச்சிகள் தொல்லை: சமையலறையின் பல்வேறு பகுதிகளிலும் கரப்பான் பூச்சிகள் நடமாட்டம் இருந்தது அதிகாரிகளைப் பற்றவைத்தது.
- பாதுகாப்பு உபகரணங்கள் இல்லை: சமையல் மற்றும் பரிமாறும் ஊழியர்களுக்குத் தேவையான கையுறைகள், தலைக்கவசங்கள் மற்றும் முறையான பாதுகாப்பு ஆடைகள் எதுவும் வழங்கப்படவில்லை.
உரிமம் ரத்து மற்றும் சீல் வைப்பு நடவடிக்கை
வாடிக்காளர்களின் ஆரோக்கியத்துடன் விளையாடும் வகையில் செயல்பட்ட இந்தச் சுகாதாரக் கேடுகள் காரணமாக, அதிகாரிகள் உடனடியாக அந்த உணவகத்தின் உரிமத்தை ரத்து செய்தனர். மேலும், உணவகத்திற்குப் பூட்டிச் சீல் வைத்தனர். சமையலறை மற்றும் உணவுக் கூடங்களில் உள்ள இந்தத் தவறுகள் அனைத்தும் முழுமையாகச் சரிசெய்யப்பட்டு மீண்டும் முறைப்படி விண்ணப்பித்தால், அதிகாரிகள் மறு ஆய்வு செய்த பின்னரே உணவகம் மீண்டும் திறக்கப்பட வாய்ப்புள்ளது என்று கூறப்படுகிறது.
இணையவாசிகளின் கருத்துக்களும் அதிர்ச்சியும்
ஹாலிவுட் பிரபலங்கள் விசிட் அடித்த பிரபல உணவகம் சீல் வைக்கப்பட்ட செய்தி சமூக வலைத்தளங்களில் தீயாய் பரவி பெரும் அதிர்ச்சியை ஏற்படுத்தியுள்ளது. இதுகுறித்து கருத்து தெரிவித்துள்ள இணையவாசி ஒருவர், “விலை அதிகமாக இருந்தாலும் உயர்தரமான உணவகங்களுக்கு நாம் செல்வது அங்குச் சுத்தமான மற்றும் பாதுகாப்பான உணவு கிடைக்கும் என்ற நம்பிக்கையில்தான். ஆனால், அங்கும் சுகாதாரமும் பாதுகாப்பும் இல்லை என்பதை அறியும் போது பெரும் அதிர்ச்சியாக உள்ளது. சொல்லப்போனால், இந்த உயர்தர உணவகங்கள் நமக்குப் பாதுகாப்பானதாக இருக்காதோ என்ற அச்சமும் ஏற்படுகிறது” என்று தனது ஆதங்கத்தையும் வருத்தத்தையும் வெளிப்படுத்தியுள்ளார்.
உயர்தர மற்றும் பாரம்பரியமிக்க உணவகங்களில் இதுபோன்ற சுகாதாரக் கேடுகள் தொடராமல் இருக்க, உணவுப் பாதுகாப்புத் துறை தணிக்கைகளை இன்னும் தீவிரப்படுத்த வேண்டும் என்பதே பொதுமக்களின் எதிர்பார்ப்பாக உள்ளது.
ரஷியா மீது 450 ட்ரோன்களை ஏவி உக்ரைன் தாக்குதல்! மாஸ்கோ எண்ணெய் சுத்திகரிப்பு ஆலையில் சேதம்