நடந்து முடிந்த நாடாளுமன்றத் தேர்தல்கள் மற்றும் பல்வேறு மாநில சட்டமன்றத் தேர்தல்களில் தலைமைத் தேர்தல் ஆணையத்தின் செயல்பாடுகள் குறித்தும், தேர்தல் முறைகேடுகள் குறித்தும் எழுந்துள்ள குற்றச்சாட்டுகள் தற்போது தீவிர விவாதப் பொருளாக மாறியுள்ளன.
இந்நிலையில், இதுகுறித்து தி.மு.க. மாணவர் அணி துணைச் செயலாளர் தமிழ். கா. அமுதரசன் அவர்கள் ஊடகம் ஒன்றுக்கு அளித்த பேட்டியில் பல அதிர்ச்சிகரமான தகவல்களை வெளிப்படுத்தியுள்ளார்.
தேர்தல் ஆணையம் மீதான கடுமையான குற்றச்சாட்டுகள்:
பா.ஜ.க. ஆட்சிக்கு வந்ததிலிருந்து சுதந்திரமாக இயங்க வேண்டிய பல அமைப்புகள் தங்களது தன்னாளுமையை இழந்து வருவதாகக் குற்றம் சாட்டிய அவர், தேர்தல் ஆணையமும் மத்திய அரசின் கட்டுப்பாட்டுக்குள் செயல்படுவதாகத் தெரிவித்தார்.
தலைமைத் தேர்தல் ஆணையர் ஞானேஷ் குமார் மீது கடுமையான விமர்சனங்களை முன்வைத்த அவர், அவர் பொறுப்பேற்ற பிறகு நடைபெற்ற தேர்தல்களில் பல்வேறு குளறுபடிகள் நடந்துள்ளதாகக் குறிப்பிட்டார்.
குறிப்பாக, தேர்தல் ஆணையத்தின் தன்னிச்சையான மற்றும் ஒருபக்கச் சார்பான முடிவுகளால்தான் பல மாநிலங்களில் எதிர்க்கட்சித் தலைவர்கள் தோற்கடிக்கப்பட்டதாகவும் அவர் குற்றம் சாட்டினார்.
தேர்தல் ஆணையர் நியமனத்தில் சட்டத் திருத்தம்:
முன்பு தலைமை தேர்தல் ஆணையரை நியமிக்கும் குழுவில் உச்சநீதிமன்றத் தலைமை நீதிபதி, பிரதமர் மற்றும் எதிர்க்கட்சித் தலைவர் இடம்பெற்றிருந்ததாகவும், ஆனால் மோடி அரசு 2023-ல் கொண்டுவந்த புதிய சட்டத்தின் மூலம் அந்த நியமன முறையை மாற்றி, ஆளுங்கட்சியினரே பெரும்பான்மையாக இருக்கும் வகையில் மாற்றியமைத்ததாகவும் அமுதரசன் சுட்டிக்காட்டினார்.
இதன் காரணமாகவே நடுநிலையான தன்மை கேள்விக்குறியாகி உள்ளதாகத் தெரிவித்தார்.
இடைத்தேர்தல் களமும் பணப் பட்டுவாடா புகார்களும்:
வரவிருக்கும் இடைத்தேர்தல்கள் குறித்துப் பேசுகையில், த.வெ.க. தரப்பினர் தாங்கள் பணம் கொடுக்காமல் வெற்றி பெறுவதாகக் கூறிக்கொள்வதைச் சுட்டிக்காட்டிய அவர், ஆனால் தற்போது பொதுவெளியில் பணம் விநியோகம் செய்யப்படும் வீடியோ ஆதாரங்கள் மற்றும் சட்டமன்ற உறுப்பினர்களின் ஒப்புதல்கள் வெளிவந்து கொண்டிருப்பதாகத் தெரிவித்தார்.
தாராபுரம், மதுராந்தகம் உள்ளிட்ட பகுதிகளில் மக்கள் வேட்பாளர்களை விரட்டி அடிப்பதற்கான காரணமே கள நிலவரம் அவர்களுக்கு எதிராக மாறுவதை உணர்த்துவதாகக் குறிப்பிட்டார்.
ஆளுங்கட்சியின் அச்சமும் எதிர்க்கட்சிகளின் விமர்சனமும்:“த.வெ.க.-வுக்கு மக்களிடையே மிகப்பெரிய செல்வாக்கு இருப்பதாகக் கூறப்பட்டாலும், இடைத்தேர்தல் களத்தில் ஆளும் தரப்பு ஏன் இவ்வளவு அமைச்சர்களை இறக்கி வேலை பார்க்க வேண்டும், ஏன் காவல்துறை பாதுகாப்புடன் வேட்பாளர்களை அனுப்ப வேண்டும்?” என்ற கேள்வியை அவர் முன்வைத்தார்.
மேலும், எதிர்க்கட்சிகள் மீது திசைதிருப்பும் நோக்கோடு பல்வேறு குற்றச்சாட்டுகள் முன்வைக்கப்பட்டாலும், மக்கள் உண்மையை உணர்ந்து தகுந்த பதிலடி தருவார்கள் என்று அவர் தனது பேட்டியில் தெரிவித்தார்.
திவ்யா சத்யராஜைப் பற்றிப் பேச பயில்வான் ரங்கநாதனுக்குத் தடை: சென்னை உயர்நீதிமன்றம் அதிரடி உத்தரவு!