ஜப்பானில் நடைபெற்று வரும் 2026 ஆசிய விளையாட்டுப் போட்டிகளில் இந்தியாவுக்கு அடுத்தடுத்து தங்கப் பதக்கங்கள் கிடைத்து வருகின்றன. குறிப்பாக குத்துச்சண்டை வீரர் அங்குஷ் பங்கால் மற்றும் மல்யுத்த வீரர் சுஜீத் கல்கல் ஆகியோர் சுமார் ஒரு நிமிட இடைவெளியில் தங்களது இறுதிப் போட்டிகளில் வெற்றி பெற்று தங்கப் பதக்கங்களை வென்றனர்.
அங்குஷ் பங்கால் வென்ற தங்கம்
ஆண்களுக்கான 80 கிலோ எடைப்பிரிவு குத்துச்சண்டை இறுதிப் போட்டியில் இந்தியாவின் அங்குஷ் பங்கால், தென் கொரியாவின் கிம் மின்சியோங்கை எதிர்கொண்டார். இந்தப் போட்டியில் சிறப்பாக செயல்பட்ட அங்குஷ், 4-0 என்ற நடுவர் தீர்ப்பில் வெற்றி பெற்று தங்கப் பதக்கத்தை கைப்பற்றினார்.
மூன்று சுற்றுகளிலும் அங்குஷ் தனது வேகம் மற்றும் எதிர்த்தாக்குதல் உத்திகளை சிறப்பாக பயன்படுத்தினார். முதல் சுற்றில் 4-1, இரண்டாவது சுற்றில் 5-0, மூன்றாவது சுற்றில் 4-1 என்ற கணக்கில் நடுவர்களின் ஆதரவை பெற்றதாக தகவல்கள் தெரிவிக்கின்றன.
அடுத்த நிமிடத்திலேயே சுஜீத் கல்கலின் தங்கம்
அங்குஷின் வெற்றியைத் தொடர்ந்து, ஆண்களுக்கான 65 கிலோ ஃப்ரீஸ்டைல் மல்யுத்த இறுதிப் போட்டியில் இந்தியாவின் சுஜீத் கல்கல் களமிறங்கினார். தஜிகிஸ்தானின் அப்துல்மஜித் குடியேவை எதிர்கொண்ட அவர், ஒரு கட்டத்தில் 2-9 என்ற புள்ளிகள் கணக்கில் பின்தங்கியிருந்தார்.
ஆனால் போட்டியின் இறுதிக் கட்டத்தில் சுஜீத் அபாரமாக மீண்டு வந்தார். அடுத்தடுத்து டேக்-டவுன்களை பதிவு செய்து புள்ளிகளை சேர்த்த அவர், இறுதியில் 10-9 என்ற பரபரப்பான கணக்கில் வெற்றி பெற்று தங்கப் பதக்கத்தை வென்றார்.
இதன் மூலம் 2026 ஆசிய விளையாட்டுப் போட்டிகளில் இந்தியாவுக்கான மல்யுத்தத்தின் முதல் தங்கப் பதக்கத்தை சுஜீத் கல்கல் வென்றார்.
குத்துச்சண்டையில் 3 தங்கங்கள்
இதற்கு முன்பாக இந்திய குத்துச்சண்டை வீராங்கனைகள் லவ்லினா போர்கோஹைன் மற்றும் பர்வீன் ஹூடா ஆகியோரும் தங்களது இறுதிப் போட்டிகளில் வெற்றி பெற்று தங்கப் பதக்கங்களை வென்றிருந்தனர்.
பெண்களுக்கான 75 கிலோ பிரிவில் லவ்லினா போர்கோஹைன் சீனாவின் பாவ் ஸியை வீழ்த்தி தங்கம் வென்றார். 65 கிலோ பிரிவில் பர்வீன் ஹூடா, சீன தைபேயின் சென் நியென்-சின்னை 3-2 என்ற கணக்கில் வீழ்த்தி தங்கப் பதக்கம் பெற்றார். இதன் மூலம் ஒரே நாளில் இந்திய குத்துச்சண்டைக்கு மூன்று தங்கப் பதக்கங்கள் கிடைத்துள்ளன.
இந்தியாவின் தங்கப் பதக்க எண்ணிக்கை உயர்வு
அங்குஷ் பங்கால் மற்றும் சுஜீத் கல்கலின் வெற்றிகளுடன் இந்தியாவின் தங்கப் பதக்க எண்ணிக்கை 15 ஆக உயர்ந்தது. மொத்த பதக்க எண்ணிக்கையும் 75 ஆக உயர்ந்ததாக அக்டோபர் 2-ம் தேதியன்று வெளியான தகவல்கள் தெரிவிக்கின்றன.
குத்துச்சண்டை, மல்யுத்தம், வில்வித்தை உள்ளிட்ட பல்வேறு விளையாட்டுகளில் இந்திய வீரர்கள் பதக்கங்களை வென்று வரும் நிலையில், ஆசிய விளையாட்டின் இறுதிக்கட்டத்தில் இந்தியாவின் பதக்க வேட்டை தொடர்ந்து வருகிறது.
2027 ஒருநாள் உலகக் கோப்பை அட்டவணை அறிவிப்பு.. அக்டோபர் 7-ல் ஆஸ்திரேலியாவுடன் இந்தியா மோதல்