நாடு முழுவதும் பல்வேறு பிரச்சினைகளை முன்வைத்து நடைபெறும் போராட்டங்களை ஒருங்கிணைக்கும் வகையில் ‘சத்யாகிரகா’ என்ற புதிய டிஜிட்டல் தளத்தை மக்களவை எதிர்க்கட்சித் தலைவர் ராகுல் காந்தி அக்டோபர் 3-ம் தேதி தொடங்கியுள்ளார்.
இந்த தளத்தின் மூலம் போராட்டங்களில் ஈடுபட்டுள்ள தனிநபர்கள் மற்றும் அமைப்புகள் தங்களது போராட்டம் தொடர்பான விவரங்களை பதிவு செய்யலாம். மேலும், தங்களது பிரச்சினையைப் போன்றே மற்ற பகுதிகளில் நடைபெறும் போராட்டங்களை ஊடாடும் வரைபடம் மூலம் கண்டறிய முடியும்.
நில உரிமை, பெண்கள் உரிமை, தலித் மற்றும் இதர பிற்படுத்தப்பட்டோர் உரிமைகள், விவசாயிகள் பிரச்சினைகள், கல்வி மற்றும் தேர்வுகள் உள்ளிட்ட பல்வேறு விவகாரங்கள் தொடர்பான போராட்டங்களை இந்த தளத்தில் பதிவு செய்யலாம் என்று ராகுல் காந்தி தெரிவித்துள்ளார்.
தனித்தனியாக நடைபெறும் போராட்டங்களின் தகவல்களை ஒரே இடத்தில் கொண்டு வந்து, ஒரே மாதிரியான கோரிக்கைகளை முன்வைக்கும் குழுக்கள் ஒன்றையொன்று அறிந்து கொள்ள உதவுவதே இந்த தளத்தின் நோக்கம் என ராகுல் காந்தி தெரிவித்துள்ளார். தேவையான இடங்களில் நாடாளுமன்றம், கடிதங்கள் அல்லது நேரடியாக போராட்டக் களத்தில் தங்களால் முடிந்த ஆதரவை வழங்குவதாகவும் அவர் கூறியுள்ளார்.
மகாத்மா காந்தியின் சத்தியாகிரகக் கொள்கையை முன்வைத்து இந்த தளத்திற்கு ‘சத்யாகிரகா’ என பெயரிடப்பட்டுள்ளது. போராட்டங்களில் ஈடுபடுவோர் தங்களது விவரங்களை பதிவு செய்து, இதன் மூலம் தங்களைப் போன்ற கோரிக்கைகளுக்காக போராடுபவர்களை கண்டறியலாம் என தெரிவிக்கப்பட்டுள்ளது.
தொடக்க நாளில் இந்த தளத்தில் பல்வேறு மாநிலங்கள் மற்றும் யூனியன் பிரதேசங்களில் இருந்து நூற்றுக்கணக்கான போராட்டங்கள் பதிவு செய்யப்பட்டிருந்ததாக தகவல்கள் வெளியாகியுள்ளன. இதில் கல்வி தொடர்பான கோரிக்கைகள், ஊழல், விவசாயிகள் பிரச்சினைகள், சுகாதாரம், பெண்கள் பாதுகாப்பு உள்ளிட்டவை இடம்பெற்றுள்ளன.
உலகின் உயரமான செனாப் பாலத்தின் மீது வந்தே பாரத் ரயிலை 100 கி.மீ. வேகத்தில் இயக்கி சாதனை