பிரதமர் நரேந்திர மோடி தலைமையிலான பாஜக அரசு இளைஞர்களை அச்சுறுத்த முயற்சிப்பதாக காக்ரோச் ஜனதா கட்சி (CJP) தலைவர் அபிஜீத் தீப்கே குற்றம்சாட்டியுள்ளார். மேலும், எத்தகைய மிரட்டல்கள் வந்தாலும் இளைஞர்கள் இனி பயப்படமாட்டார்கள் என்றும் அவர் தெரிவித்துள்ளார்.
அக்டோபர் 10-ல் டெல்லியில் போராட்டம்
டெல்லி ஜந்தர் மந்தரில் அக்டோபர் 10-ஆம் தேதி ‘சலோ டெல்லி’ என்ற பெயரில் பேரணி நடத்த காக்ரோச் ஜனதா கட்சி அழைப்பு விடுத்துள்ளது. இந்தப் போராட்டத்தில் பங்கேற்பதற்காக நாடு முழுவதும் இருந்து வரும் ஆயிரக்கணக்கான இளைஞர்கள் தடுத்து வைக்கப்பட்டுள்ளதாக அபிஜீத் தீப்கே குற்றம்சாட்டியுள்ளார்.
போராட்டங்களுக்கு அனுமதி மறுப்பு
டெல்லியில் அமலில் உள்ள கட்டுப்பாடுகள் காரணமாக ஜந்தர் மந்தர் உள்ளிட்ட எந்த இடத்திலும் போராட்டங்களுக்கு அனுமதி இல்லை என்று காவல் ஆணையர் ஸ்ரிஷ் பாண்டே தெரிவித்துள்ளார். மேலும், போராட்டங்களில் பங்கேற்க வேண்டாம் என்றும், தங்களது பாதுகாப்பு மற்றும் குடும்பத்தினரின் நலனுக்கு முன்னுரிமை அளிக்க வேண்டும் என்றும் அவர் கேட்டுக்கொண்டுள்ளார்.
“இளைஞர்கள் இனி பயப்படமாட்டார்கள்”
இதற்கிடையே, அபிஜீத் தீப்கே தனது எக்ஸ் சமூக வலைதளப் பதிவில், போராட்டத்திற்கு முன்னதாக நாடு முழுவதும் ஆயிரக்கணக்கான இளைஞர்களை பாஜக அரசு தடுத்து வைத்துள்ளதாகக் குற்றம்சாட்டியுள்ளார்.
மேலும், பிரதமர் மோடியை நோக்கி, மிரட்டல்களால் இளைஞர்களின் போராட்டத்தைத் தடுக்க முடியாது என்று குறிப்பிட்டுள்ளார். அக்டோபர் 10-ஆம் தேதி டெல்லிக்கு வருவதாகவும், என்ன நடந்தாலும் ஜந்தர் மந்தரை நோக்கிப் பேரணியாகச் செல்லப்போவதாகவும் அவர் தெரிவித்துள்ளார்.
பெங்களூருவில் ஆதரவாளர்களுக்கு நன்றி
முன்னதாக, பெங்களூருவில் தனக்கு அளிக்கப்பட்ட வரவேற்பு மற்றும் ஆதரவுக்கு அபிஜீத் தீப்கே நன்றி தெரிவித்திருந்தார். கடந்த இரண்டு நாட்களில் கிடைத்த அன்பும், அரவணைப்பும், கருணையும் தன்னை நெகிழ்ச்சியடையச் செய்ததாகவும் அவர் தனது சமூக வலைதளப் பதிவில் குறிப்பிட்டிருந்தார்.
டெல்லியில் நடைபெறவுள்ள போராட்டத்தை முன்னிட்டு இளைஞர்கள் தடுத்து வைக்கப்படுவதாக எழுந்துள்ள குற்றச்சாட்டுகளும், காவல்துறையின் கட்டுப்பாடுகள் தொடர்பான அறிவிப்பும் அரசியல் வட்டாரத்தில் கவனம் பெற்றுள்ளன.