தலைமைத் தேர்தல் ஆணையர் ஞானேஷ் குமாருக்கு எதிராக, நவம்பர் 1-ஆம் தேதி டெல்லியில் நடைபெறவுள்ள ‘இந்தியா’ கூட்டணியின் பேரணிக்கு காக்ரோச் ஜனதா கட்சி (Cockroach Janta Party – CJP) ஆதரவு தெரிவித்துள்ளது.
இது தொடர்பாக அக்கட்சியின் நிறுவனர் அபிஜீத் டிப்கே தனது எக்ஸ் (X) சமூக வலைதளப் பக்கத்தில் அதிகாரப்பூர்வ அறிவிப்பை வெளியிட்டுள்ளார்.
‘இந்தியா’ கூட்டணி பேரணிக்கு CJP ஆதரவு
டெல்லி ராம்லீலா மைதானத்தில் நவம்பர் 1-ஆம் தேதி காங்கிரஸ் தலைமையிலான ‘இந்தியா’ கூட்டணி சார்பில் பிரம்மாண்டப் பேரணி நடைபெற உள்ளது. வாக்காளர் பட்டியலின் சிறப்புத் தீவிர திருத்தப் பணியான SIR தொடர்பான முறைகேடுகள் குறித்த குற்றச்சாட்டுகளை முன்வைத்து, தலைமைத் தேர்தல் ஆணையர் ஞானேஷ் குமார் பதவி விலக வேண்டும் என்று எதிர்க்கட்சிகள் வலியுறுத்தி வருகின்றன.
இந்தப் போராட்டத்திற்கு ஆதரவு தெரிவித்துள்ள CJP நிறுவனர் அபிஜீத் டிப்கே, “ஞானு பதவி விலக வேண்டும். காக்ரோச் ஜனதா கட்சி நவம்பர் 1-ஆம் தேதி நடைபெறும் ‘இந்தியா’ கூட்டணியின் பேரணிக்கு ஆதரவு அளிக்கிறது. நாட்டின் நலனே முதன்மையானது” என்று குறிப்பிட்டுள்ளார்.
வாக்குரிமையைப் பாதுகாக்க வேண்டும்: CJP
CJP வெளியிட்டுள்ள அறிக்கையில், இந்திய அரசியலமைப்பு ஒவ்வொரு வயது வந்த குடிமகனுக்கும் வாக்களிக்கும் உரிமையை வழங்கியுள்ளதாகத் தெரிவிக்கப்பட்டுள்ளது.
SIR நடவடிக்கையால் தகுதியான வாக்காளர்களின் பெயர்கள் வாக்காளர் பட்டியலில் இருந்து நீக்கப்படுவது தொடர்பாகக் கவலைகள் எழுந்துள்ளதாகவும், எந்தவொரு தகுதியான குடிமகனும் தனது வாக்குரிமையை இழக்கக் கூடாது என்றும் அந்த அமைப்பு வலியுறுத்தியுள்ளது.
அரசாங்கத்தை மக்கள் தேர்ந்தெடுக்க வேண்டும்; அரசாங்கம் தனக்கான வாக்காளர்களைத் தேர்ந்தெடுக்கக் கூடாது என்பதே ஜனநாயகத்தின் அடிப்படை என்று CJP தனது அறிக்கையில் குறிப்பிட்டுள்ளது.
மேலும், சுதந்திரமான மற்றும் நியாயமான தேர்தல்களுக்காகப் போராடும் அனைத்து அமைப்புகளுக்கும் தங்களது ஆதரவு தொடரும் என்றும் தெரிவித்துள்ளது.
ஞானேஷ் குமார் பதவி விலக வேண்டும் என வலியுறுத்தல்
SIR நடவடிக்கையின் மூலம் தேர்தல் ஆணையத்தின் மீதான நம்பகத்தன்மை பாதிக்கப்பட்டுள்ளதாக CJP குற்றம்சாட்டியுள்ளது. சுதந்திரமான, நியாயமான தேர்தல்களை நடத்துவதற்கான நம்பிக்கையை மீட்டெடுக்க தலைமைத் தேர்தல் ஆணையர் ஞானேஷ் குமார் பதவி விலக வேண்டும் என்றும் அந்த அமைப்பு வலியுறுத்தியுள்ளது.
இதுவரை தனித்தனியாக முன்னெடுக்கப்பட்டு வந்த CJP மற்றும் காங்கிரஸ் தலைமையிலான போராட்டங்கள் தற்போது ஒரே கோரிக்கையின் அடிப்படையில் இணைந்து செயல்படுவதற்கான அறிகுறியாக இந்த ஆதரவு அறிவிப்பு பார்க்கப்படுகிறது.
நவம்பர் 1-ஆம் தேதி நடைபெறவுள்ள பேரணியில் CJP நிர்வாகிகள் நேரடியாகப் பங்கேற்பார்களா என்பது குறித்த தெளிவான அறிவிப்பு வெளியாகவில்லை.