நடிகர் அன்னு கபூர் தனது தோற்றம் குறித்து தெரிவித்த சர்ச்சைக்குரிய கருத்துக்கு, நடிகை தமன்னா தற்போது பதிலளித்துள்ளார். விமர்சனங்களுக்கு முக்கியத்துவம் கொடுத்தால் வாழ்க்கையில் முன்னேற முடியாது என்றும், தனது கவனம் முழுவதும் நடிப்புத் தொழிலில் மட்டுமே இருப்பதாகவும் அவர் தெரிவித்துள்ளார்.
‘ஸ்திரீ 2’ பாடலால் எழுந்த சர்ச்சை!
இந்தியில் வெளியாகி வெற்றி பெற்ற ‘ஸ்திரீ 2’ திரைப்படத்தில் இடம்பெற்ற ‘ஆஜ் கி ராத்’ பாடலுக்கு தமன்னா நடனமாடியிருந்தார். இந்தப் பாடல் ரசிகர்களிடையே நல்ல வரவேற்பைப் பெற்றது.
இதற்கிடையே, கடந்த 2025-ம் ஆண்டு யூடியூப் நேர்காணல் ஒன்றில் அந்தப் பாடல் குறித்து பேசிய நடிகர் அன்னு கபூர், தமன்னாவின் தோற்றத்தை வர்ணிக்கும் வகையில் ‘துதியா பதன்’ (Dudhiya Badan) என்ற வார்த்தையைப் பயன்படுத்தினார். இந்தக் கருத்து சமூக வலைதளங்களில் பரவியதைத் தொடர்ந்து, பலரும் அவருக்கு எதிராக விமர்சனங்களை முன்வைத்தனர். குறிப்பாக, ஒரு நடிகையின் நடிப்பை விட அவரது உடல் தோற்றத்தை மையப்படுத்திப் பேசியதாக விமர்சிக்கப்பட்டது.
விமர்சனங்களைப் புறக்கணிக்கும் தமன்னா!
இந்நிலையில், இந்த விவகாரம் குறித்து தமன்னாவிடம் கேள்வி எழுப்பப்பட்டது. அதற்குப் பதிலளித்த அவர், ஒரு கலைஞராக எதைக் கவனத்தில் எடுத்துக்கொள்ள வேண்டும், எதைப் புறக்கணிக்க வேண்டும் என்பதைப் புரிந்துகொள்வது மிகவும் முக்கியம் என்று தெரிவித்தார்.
மேலும், “ஒரு பெண்ணாக, இதுபோன்ற விமர்சனங்களுக்கு முக்கியத்துவம் கொடுக்கத் தொடங்கினால் நம்மால் முன்னேறிச் செல்ல முடியாது. அதனால் இதுபோன்ற விஷயங்களை நான் கவனிப்பதில்லை. எனது நடிப்புத் தொழிலிலும், நான் உருவாக்க விரும்பும் படைப்புகளிலும் மட்டுமே கவனம் செலுத்துகிறேன்” என்று கூறினார்.
நடிப்பை சேவையாகக் கருதுகிறேன்!
தனது தொழில் குறித்துப் பேசிய தமன்னா, நடிப்பை வெறும் பணியாகப் பார்க்காமல் ஒரு சேவையாகச் செய்ய விரும்புவதாகவும் தெரிவித்தார். நேர்மையான அணுகுமுறையுடன் பணியாற்றுவதால்தான் தனது நடிப்பு மக்களைச் சென்றடைவதாகவும் அவர் குறிப்பிட்டார்.
அன்னு கபூரின் கருத்து சர்ச்சையை ஏற்படுத்திய நிலையில், அதற்கு நேரடியாக மோதல் போக்கில் பதிலளிக்காமல், விமர்சனங்களைத் தாண்டி தனது தொழிலில் கவனம் செலுத்துவதே முக்கியம் என்பதை தமன்னா தனது பேச்சின் மூலம் வெளிப்படுத்தியுள்ளார்.
‘சிங்கம்’ ஸ்டைல் இல்ல.. இது வேறமாரி போலீஸ்: ‘சீன்’ திரைப்படத்தில் சூர்யாவின் புதிய அவதாரம்!