தமிழ்நாடு அரசுப் பணியாளர் தேர்வாணையம் (TNPSC) சார்பில் நடத்தப்படும் குரூப்-2 மற்றும் குரூப்-2ஏ முதல்நிலைத் தேர்வு இன்று (நவம்பர் 1) தமிழகம் முழுவதும் பல்வேறு தேர்வு மையங்களில் நடைபெற்று வருகிறது.
தமிழக அரசின் பல்வேறு துறைகளில் காலியாக உள்ள 846 பணியிடங்களை நிரப்புவதற்காக நடத்தப்படும் இந்தத் தேர்வில் மொத்தம் 4 லட்சத்து 89 ஆயிரத்து 885 பேர் விண்ணப்பித்துள்ளனர். இதனால் ஒரு காலிப்பணியிடத்திற்கு சராசரியாக 579 பேர் போட்டியிடுகின்றனர்.
1,647 தேர்வு மையங்களில் தேர்வு!
தமிழகம் முழுவதும் 1,647 தேர்வு மையங்களில் தேர்வு நடைபெறுகிறது. சென்னையில் மட்டும் 173 தேர்வு மையங்களில் 51,721 பேர் தேர்வு எழுதுகின்றனர்.
இன்று காலை 9.30 மணிக்குத் தொடங்கிய தேர்வு நண்பகல் 12.30 மணி வரை நடைபெறுகிறது. மொத்தம் 3 மணி நேரம் நடைபெறும் இத்தேர்வு கொள்குறி வகையில் நடத்தப்படுகிறது.
300 மதிப்பெண்களுக்கு 200 வினாக்கள்!
குரூப்-2 மற்றும் குரூப்-2ஏ முதல்நிலைத் தேர்வில் மொத்தம் 300 மதிப்பெண்களுக்கு 200 வினாக்கள் இடம்பெற்றுள்ளன.
தேர்வின் வினாத்தாள் விவரம்:
- பொது அறிவு – 75 வினாக்கள்
- திறனறிவு – 25 வினாக்கள்
- பொதுத்தமிழ் அல்லது பொது ஆங்கிலம் – 100 வினாக்கள்
846 காலிப்பணியிடங்கள்: கடும் போட்டி!
தமிழக அரசின் பல்வேறு துறைகளில் உள்ள 846 காலிப்பணியிடங்களை நிரப்புவதற்காக இந்தத் தேர்வு நடத்தப்படுகிறது. இதில் குரூப்-2 பிரிவில் 43 பணியிடங்களும், குரூப்-2ஏ பிரிவில் 803 பணியிடங்களும் அடங்கும்.
தேர்வர்களுக்கு முக்கிய அறிவுறுத்தல்கள்!
தேர்வர்கள் தங்களது ஹால் டிக்கெட்டில் குறிப்பிடப்பட்டுள்ள வழிமுறைகளைத் தவறாமல் பின்பற்ற வேண்டும் என தேர்வாணையம் அறிவுறுத்தியுள்ளது.
தேர்வு மையத்திற்கு உரிய நேரத்தில் செல்ல வேண்டும். ஹால் டிக்கெட் மற்றும் அனுமதிக்கப்பட்ட ஆவணங்களை எடுத்துச் செல்ல வேண்டும். கருப்பு நிற மை கொண்ட பால்பாயிண்ட் பேனா மட்டுமே பயன்படுத்த அனுமதிக்கப்பட்டுள்ளது.
மின்னணு சாதனங்கள் மற்றும் வாட்சுகள் உள்ளிட்ட தடை செய்யப்பட்ட பொருட்களைத் தேர்வு அறைக்குள் கொண்டு செல்ல அனுமதி இல்லை.
தமிழகம் முழுவதும் நடைபெற்று வரும் இந்தத் தேர்வில் சுமார் 4.89 லட்சம் பேர் பங்கேற்பதால், அரசுப் பணியிடங்களுக்கான போட்டி கடுமையாகியுள்ளது.