பசும்பொன் முத்துராமலிங்கத் தேவர் ஜெயந்தி மற்றும் குருபூஜையை முன்னிட்டு நடைபெற்ற ஊர்வலத்தில், திருவொற்றியூர் தொகுதி முன்னாள் திமுக சட்டமன்ற உறுப்பினர் கே.பி.சங்கர் தொண்டர்களுடன் இணைந்து உற்சாகமாக நடனமாடிய காட்சிகள் சமூக வலைத்தளங்களில் வைரலாகி வருகின்றன.
பசும்பொன் முத்துராமலிங்கத் தேவரின் ஜெயந்தி மற்றும் குருபூஜையை முன்னிட்டு, தமிழகத்தின் பல்வேறு பகுதிகளிலும் தேவர் பேரவையினர் மற்றும் அரசியல் கட்சிகள் சார்பில் ஊர்வலங்கள், நினைவுப் பேரணிகள் மற்றும் குருபூஜை நிகழ்ச்சிகள் நடைபெற்றன. இதன் ஒரு பகுதியாக, சென்னை திருவொற்றியூர் பெரியார் நகர் பகுதியில் தேவர் ஜெயந்தியை முன்னிட்டு ஊர்வலம் நடைபெற்றது.
இந்த ஊர்வலத்தில் திருவொற்றியூர் தொகுதியின் முன்னாள் திமுக சட்டமன்ற உறுப்பினர் கே.பி.சங்கர் கலந்து கொண்டார். அப்போது ஊர்வலம் சென்று கொண்டிருந்தபோது, ஒலிபரப்பப்பட்ட பிரபல திரையிசைப் பாடலான ‘மெகபூபா மெகபூபா’ பாடலுக்கு அவர் தொண்டர்களுடன் இணைந்து உற்சாகமாக நடனமாடினார்.
முன்னாள் சட்டமன்ற உறுப்பினர் என்ற பாகுபாடின்றி, தொண்டர்களுடன் இணைந்து எளிமையாக நடனமாடிய கே.பி.சங்கரின் செயல் அங்கிருந்தவர்களின் கவனத்தை ஈர்த்தது. இதனால் ஊர்வலத்தில் பங்கேற்ற தேவர் பேரவை நிர்வாகிகள் மற்றும் திமுக தொண்டர்கள் உற்சாகமடைந்தனர்.
இந்த நிகழ்வின்போது எடுக்கப்பட்ட காணொளி சமூக வலைத்தளங்களில் பகிரப்பட்டு வருகிறது. தேவர் ஜெயந்தி ஊர்வலத்தில் கே.பி.சங்கர் உற்சாகமாக நடனமாடிய காட்சிகள் தற்போது இணையத்தில் கவனம் பெற்று வருகின்றன.