மெட்ராஸ் ரவுண்ட் டேபிள் 1 (MRT1) அமைப்பின் சார்பில் நடத்தப்பட்ட ‘சார்ஜ்பீ சென்னை ரன்ஸ் 2026’ (Chargebee Chennai Runs 2026) மாரத்தான் போட்டியின் ஐந்தாவது பதிப்பு இன்று காலை சென்னையில் கோலாகலமாக நடைபெற்றது. இதில் சுமார் 14,000 பேர் பதிவு செய்திருந்தனர்.
மாற்றுத்திறனாளி குழந்தைகளுக்கான உள்ளடக்கிய கல்வி மற்றும் மறுவாழ்வை ஊக்குவிக்கும் நோக்கில், SPASTN அமைப்பின் RCIET திட்டத்திற்கு ஆதரவளிக்கும் வகையில் இந்த மாரத்தான் போட்டி நடத்தப்பட்டது.
3 கி.மீ. முதல் அரை மாரத்தான் வரை!
இந்த நிகழ்வில் 3 கி.மீ., 5 கி.மீ., 10 கி.மீ. மற்றும் அரை மாரத்தான் எனப் பல்வேறு பிரிவுகளில் போட்டிகள் நடைபெற்றன. மேலும், அனைவரையும் உள்ளடக்கிய வகையில் மாற்றுத்திறனாளிகளும் பங்கேற்கும் சிறப்பு ஓட்டமும் இடம்பெற்றது.
சென்னையின் பல்வேறு பகுதிகளைச் சேர்ந்த ஓட்டப்பந்தய ஆர்வலர்கள் ஆர்வத்துடன் கலந்துகொண்டு தங்களது ஓட்டத் திறமையை வெளிப்படுத்தினர்.
போட்டி முடிந்து ஜூம்பா நடனமாடி உற்சாகம்!
மாரத்தான் போட்டிகள் நிறைவடைந்ததைத் தொடர்ந்து, சென்னை ஓமந்தூரார் அரசு மருத்துவமனை மைதானத்தில் பங்கேற்பாளர்கள் ஒன்றிணைந்து ஜூம்பா நடனமாடினர். ஓட்டப்போட்டியின் உற்சாகத்தைத் தொடர்ந்து இசைக்கு ஏற்ப நடனமாடி மகிழ்ந்தனர்.
மேடையில் பாடி அசத்திய அனிருத்!
இந்த நிகழ்ச்சியின் பரிசளிப்பு விழாவில் இசையமைப்பாளர் அனிருத் ரவிச்சந்தர் சிறப்பு விருந்தினராகக் கலந்துகொண்டார். பல்வேறு ஓட்டப் பிரிவுகளில் வெற்றி பெற்றவர்களுக்குப் பரிசுகளை வழங்கி கௌரவித்தார்.
தொடர்ந்து மேடையில் பாடல்களைப் பாடி அங்கிருந்த ரசிகர்களை உற்சாகப்படுத்தினார். அனிருத்தின் இசை நிகழ்ச்சி பங்கேற்பாளர்களிடையே கூடுதல் உற்சாகத்தை ஏற்படுத்தியது.
சமூக நோக்கத்துடன் நடைபெற்ற மாரத்தான்!
இதுகுறித்து MRT1 அமைப்பின் தலைவர் ஷ்ரே ரத்தா கூறுகையில், விளையாட்டின் மூலம் மக்களை ஒன்றிணைப்பதுடன், முக்கியமான சமூக நோக்கத்திற்குப் பங்களிப்பதே சென்னை ரன்ஸ் நிகழ்வின் நோக்கம் என்றார்.
இந்த ஆண்டு SPASTN அமைப்பின் RCIET திட்டத்துடன் இணைந்து செயல்படுவது, மாற்றுத்திறனாளி குழந்தைகளுக்கான உள்ளடக்கிய கல்வி மற்றும் மறுவாழ்வுக்கு ஆதரவளிக்கும் அமைப்பின் உறுதிப்பாட்டை வெளிப்படுத்துவதாகவும் தெரிவித்தார்.
மேலும், அனைவருக்கும் அணுகக்கூடிய கற்றல் சூழலை உருவாக்கவும், குழந்தைகள், குடும்பத்தினர் மற்றும் ஆசிரியர்களுக்குக் கிடைக்கும் ஆதரவை வலுப்படுத்தவும் இந்த முன்னெடுப்பு உதவும் என்று கூறினார்.
இந்த முயற்சியில் பங்கேற்ற அனைவருக்கும், கூட்டாளர்கள் மற்றும் ஆதரவாளர்களுக்கும் நன்றியும் தெரிவித்தார்.
விளையாட்டு, இசை மற்றும் சமூகப் பொறுப்பு ஆகியவற்றை ஒருங்கிணைத்த ‘சார்ஜ்பீ சென்னை ரன்ஸ் 2026’ நிகழ்வு சென்னையில் உற்சாகமான சூழலில் நிறைவடைந்தது.