சென்னை புறநகர் மின்சார ரயில் பயணிகளின் வசதிக்காகவும், ரயில் சேவைகளின் செயல்பாட்டுத் திறனை மேம்படுத்தவும் தெற்கு ரயில்வே புதிய கால அட்டவணையை வெளியிட்டுள்ளது. இந்தப் புதிய கால அட்டவணை நவம்பர் 1-ஆம் தேதி முதல் அமலுக்கு வருகிறது.
ஞாயிற்றுக்கிழமை ரயில் சேவைகளுக்கு நவம்பர் 1-ஆம் தேதி முதல் புதிய கால அட்டவணை நடைமுறைக்கு வரும். வார நாட்களுக்கான ரயில் சேவைகளில் நவம்பர் 2-ஆம் தேதி முதல் மாற்றங்கள் அமல்படுத்தப்பட உள்ளன.
சென்னை சென்ட்ரல் – அரக்கோணம், சென்னை சென்ட்ரல் – சூலூர்பேட்டை, சென்னை கடற்கரை – செங்கல்பட்டு உள்ளிட்ட முக்கிய வழித்தடங்களில் ரயில்களின் புறப்படும் நேரம், சென்றடையும் நேரம், வழித்தட நீட்டிப்பு மற்றும் நிறுத்தங்கள் ஆகியவற்றில் மாற்றங்கள் செய்யப்பட்டுள்ளன.
சென்னை சென்ட்ரல் – அரக்கோணம் வழித்தடத்தில் மாற்றங்கள்
சென்னை சென்ட்ரல் மூர் மார்க்கெட் வளாகம் – அரக்கோணம் வழித்தடத்தில் பல்வேறு மாற்றங்கள் அறிவிக்கப்பட்டுள்ளன.
திருவள்ளூரில் இருந்து மூர் மார்க்கெட் வளாகத்துக்குப் புதிய மின்சார ரயில் சேவை அறிமுகப்படுத்தப்பட்டுள்ளது. ரயில் எண் 43230, திருவள்ளூரில் இருந்து மதியம் 12.25 மணிக்குப் புறப்பட்டு பிற்பகல் 1.45 மணிக்கு மூர் மார்க்கெட் வளாகத்தைச் சென்றடையும்.
மூர் மார்க்கெட் வளாகத்தில் இருந்து பட்டாபிராம் வரை இயக்கப்பட்டு வந்த ரயில், இனி திருவள்ளூர் வரை நீட்டிக்கப்பட்டுள்ளது. ரயில் எண் 43209 என மாற்றப்பட்டுள்ள இந்த ரயில், காலை 7.10 மணிக்குப் புறப்பட்டு 8.30 மணிக்கு திருவள்ளூரைச் சென்றடையும்.
பட்டாபிராமில் இருந்து இயக்கப்பட்டு வந்த மற்றொரு ரயில் சேவையும் திருவள்ளூரில் இருந்து இயக்கப்படும் வகையில் மாற்றப்பட்டுள்ளது. ரயில் எண் 43220, திருவள்ளூரில் இருந்து காலை 8.45 மணிக்குப் புறப்பட்டு காலை 10.20 மணிக்கு மூர் மார்க்கெட் வளாகத்தைச் சென்றடையும்.
மூர் மார்க்கெட் வளாகத்தில் இருந்து திருவள்ளூர் செல்லும் ரயில், இனி கடம்பத்தூர் வரை நீட்டிக்கப்பட்டுள்ளது. ரயில் எண் 43903, பிற்பகல் 2 மணிக்குப் புறப்பட்டு 3.25 மணிக்கு கடம்பத்தூரைச் சென்றடையும்.
திருவள்ளூரில் இருந்து மூர் மார்க்கெட் வளாகம் செல்லும் ரயில், இனி கடம்பத்தூரில் இருந்து புறப்படும் வகையில் மாற்றப்பட்டுள்ளது. ரயில் எண் 43904, கடம்பத்தூரில் இருந்து பிற்பகல் 3.35 மணிக்குப் புறப்பட்டு மாலை 5.05 மணிக்கு மூர் மார்க்கெட் வளாகத்தைச் சென்றடையும்.
ரயில்களின் வேகத்திலும் மாற்றம்
மூர் மார்க்கெட் வளாகத்தில் இருந்து இரவு 7.30 மணிக்குப் புறப்படும் அரக்கோணம் விரைவு மின்சார ரயில், இனி அனைத்து ரயில் நிலையங்களிலும் நின்று செல்லும் மெதுவான ரயிலாக மாற்றப்பட்டுள்ளது.
அதேபோல், இரவு 7.45 மணிக்குப் புறப்படும் மெதுவான மின்சார ரயில், ஏற்கெனவே விரைவு ரயில் இயக்கப்பட்டு வந்த நிறுத்த முறையைப் பின்பற்றி விரைவு ரயிலாக மாற்றப்பட்டுள்ளது.
சென்னை சென்ட்ரல் – சூலூர்பேட்டை வழித்தடம்
சென்னை சென்ட்ரல் – சூலூர்பேட்டை வழித்தடத்திலும் முக்கிய மாற்றங்கள் செய்யப்பட்டுள்ளன.
மூர் மார்க்கெட் வளாகத்தில் இருந்து கும்மிடிப்பூண்டி வரை இயக்கப்பட்டு வந்த மின்சார ரயில், இனி சூலூர்பேட்டை வரை நீட்டிக்கப்பட்டுள்ளது. ரயில் எண் 42405, அதிகாலை 5.20 மணிக்குப் புறப்பட்டு காலை 7.55 மணிக்கு சூலூர்பேட்டையைச் சென்றடையும்.
கும்மிடிப்பூண்டியில் இருந்து மூர் மார்க்கெட் வளாகம் வரை இயக்கப்பட்டு வந்த ரயில், இனி சூலூர்பேட்டையில் இருந்து புறப்படும் வகையில் மாற்றப்பட்டுள்ளது. ரயில் எண் 42408, காலை 8.10 மணிக்குச் சூலூர்பேட்டையில் இருந்து புறப்பட்டு காலை 10.40 மணிக்கு மூர் மார்க்கெட் வளாகத்தைச் சென்றடையும்.
எம்ஆர்டிஎஸ் ரயில் சேவையில் மாற்றமில்லை
சென்னை கடற்கரை – வேளச்சேரி – பரங்கிமலை வழித்தடத்தில் இயக்கப்படும் எம்ஆர்டிஎஸ் மின்சார ரயில்களின் தற்போதைய கால அட்டவணையில் எந்த மாற்றமும் செய்யப்படவில்லை என தெற்கு ரயில்வே தெரிவித்துள்ளது.
சென்னை கடற்கரை – செங்கல்பட்டு வழித்தடத்தில் கூடுதல் நிறுத்தம்
சென்னை கடற்கரை – செங்கல்பட்டு வழித்தடத்திலும் சில மாற்றங்கள் அறிவிக்கப்பட்டுள்ளன.
அரக்கோணத்தில் இருந்து காஞ்சிபுரம், செங்கல்பட்டு, தாம்பரம் வழியாக சென்னை கடற்கரை செல்லும் விரைவு மின்சார ரயிலில் கூடுதல் நிறுத்தம் வழங்கப்பட்டுள்ளது.
ரயில் எண் 40904, அரக்கோணத்தில் இருந்து காலை 7.30 மணிக்குப் புறப்படும். இந்த ரயில் இனி கூடுவாஞ்சேரி ரயில் நிலையத்திலும் நின்று செல்லும். காலை 9.20 மணிக்கு கூடுவாஞ்சேரியைச் சென்றடையும் வகையில் அட்டவணை மாற்றப்பட்டுள்ளது.
மேலும், சென்னை கடற்கரை – தாம்பரம் – செங்கல்பட்டு – காஞ்சிபுரம் – அரக்கோணம் வழித்தடத்தில் வார நாட்களுக்கான புதிய ரயில் கால அட்டவணையும் வெளியிடப்பட்டுள்ளது.
ஞாயிற்றுக்கிழமைகளில் ஏற்கெனவே நடைமுறையில் உள்ள கால அட்டவணையில் மாற்றம் இல்லை என அறிவிக்கப்பட்டுள்ளது.
பயணிகளுக்கு தெற்கு ரயில்வே அறிவுறுத்தல்
புதிய கால அட்டவணையில் ரயில்கள் புறப்படும் நேரம் மற்றும் இடைப்பட்ட ரயில் நிலையங்களில் வந்து செல்லும் நேரங்களில் மாற்றங்கள் செய்யப்பட்டுள்ளதால், பயணிகள் தங்களது பயணத்தை அதற்கேற்ப திட்டமிடுமாறு தெற்கு ரயில்வே அறிவுறுத்தியுள்ளது.
மேலும், ரயில்களின் வருகை மற்றும் புறப்படும் நேரங்கள் உள்ளிட்ட விவரங்களை NTES செயலி மூலமாகத் தெரிந்துகொள்ளலாம் என்றும் தெரிவிக்கப்பட்டுள்ளது.
சென்னை புறநகர் ரயில் பயணிகள், குறிப்பாக திருவள்ளூர், கடம்பத்தூர், அரக்கோணம், சூலூர்பேட்டை, கும்மிடிப்பூண்டி, கூடுவாஞ்சேரி உள்ளிட்ட பகுதிகளுக்குச் செல்லும் பயணிகள் புதிய கால அட்டவணையை முன்கூட்டியே சரிபார்த்துக்கொள்வது அவசியமாகும்.