புதுச்சேரியில் உள்ள அரசு பல் மருத்துவக் கல்லூரியின் வங்கிக் கணக்கில் இருந்து ரூ.8.5 கோடி பணம் சைபர் குற்றவாளிகளால் கொள்ளையடிக்கப்பட்ட சம்பவம் பெரும் அதிர்ச்சியை ஏற்படுத்தியுள்ளது. வங்கிக் கணக்கில் இருந்த பாதுகாப்புக் குறைபாட்டைப் பயன்படுத்தி மர்ம நபர்கள் இந்தப் பணத்தை அபகரித்துள்ளதாக முதற்கட்ட விசாரணையில் தெரியவந்துள்ளது.
அரசு பல் மருத்துவக் கல்லூரி
புதுச்சேரி கோரிமேடு பகுதியில் மகாத்மா காந்தி அரசு பல் மருத்துவ முதுநிலை அறிவியல் கல்லூரி செயல்பட்டு வருகிறது. சுமார் 30 ஆண்டுகளாக இயங்கி வரும் இந்தக் கல்லூரியில் பேராசிரியர்கள், மருத்துவர்கள் மற்றும் ஊழியர்கள் என 200-க்கும் மேற்பட்டோர் பணியாற்றி வருகின்றனர். மேலும், 500-க்கும் மேற்பட்ட மாணவர்கள் இளநிலை மற்றும் முதுநிலை பல் மருத்துவப் படிப்புகளைப் பயின்று வருகின்றனர்.
2 மாத ஊதியத்திற்காக அனுப்பப்பட்ட ரூ.8.5 கோடி
இந்தக் கல்லூரியில் பணியாற்றும் ஊழியர்களுக்கு கடந்த இரண்டு மாதங்களாக ஊதியம் வழங்கப்படாமல் இருந்துள்ளது. பண்டிகைக் காலம் நெருங்கியதால் நிலுவையில் உள்ள ஊதியத்தை உடனடியாக வழங்க வேண்டும் என ஊழியர்கள் அரசிடம் கோரிக்கை விடுத்து வந்தனர்.
இதையடுத்து, இரண்டு மாத ஊதியம் மற்றும் இதர படித்தொகைகளைச் சேர்த்து சுமார் ரூ.8 கோடியே 50 லட்சத்தை அரசு கருவூலத்தில் இருந்து கல்லூரியின் தனியார் வங்கிக் கணக்கிற்கு அனுப்பி வைக்கப்பட்டது.
ஆனால், கல்லூரி நிர்வாகம் வங்கிக் கணக்கைச் சரிபார்த்தபோது, அரசு அனுப்பிய பணம் கணக்கில் இல்லாததைக் கண்டு அதிர்ச்சியடைந்தது.
சைபர் குற்றவாளிகள் பணத்தை அபகரித்தது எப்படி?
இதுகுறித்து சம்பந்தப்பட்ட தனியார் வங்கியிடம் கல்லூரி நிர்வாகம் விசாரணை நடத்தியது. அப்போது வங்கிக் கணக்கை ஆய்வு செய்த வங்கி ஊழியர்கள், சுமார் ரூ.8.5 கோடி பணம் சைபர் குற்றவாளிகளால் கொள்ளையடிக்கப்பட்டிருப்பதைக் கண்டறிந்ததாகத் தெரிவிக்கப்பட்டுள்ளது.
வங்கியின் பாதுகாப்புக் குறைபாட்டைப் பயன்படுத்தி இணையவழியில் பணம் அபகரிக்கப்பட்டிருக்கலாம் என முதற்கட்ட விசாரணையில் தெரியவந்துள்ளது.
போலீசில் புகார் – வங்கி பொறுப்பேற்பு
இந்தச் சம்பவம் தொடர்பாக மகாத்மா காந்தி அரசு பல் மருத்துவக் கல்லூரி நிர்வாகம் புதுச்சேரி சைபர் கிரைம் காவல் நிலையத்தில் புகார் அளித்துள்ளது.
இதையடுத்து, போலீசார் சம்பந்தப்பட்ட தனியார் வங்கி ஊழியர்களிடம் முதற்கட்ட விசாரணை நடத்தினர். இந்த இணையவழி மோசடிக்கு தனியார் வங்கி முழுப் பொறுப்பையும் ஏற்றுள்ளதாகத் தினத்தந்தி செய்தி தெரிவிக்கிறது.
ரூ.8.5 கோடி பணம் எவ்வாறு அபகரிக்கப்பட்டது, மோசடியில் ஈடுபட்டவர்கள் யார், பணம் எந்தெந்த வங்கிக் கணக்குகளுக்கு மாற்றப்பட்டது என்பது குறித்து போலீசார் தொடர்ந்து விசாரணை நடத்தி வருகின்றனர்.
ஊழியர்களுக்கு வழங்க வேண்டிய இரண்டு மாத நிலுவை ஊதியத்திற்காக அனுப்பப்பட்ட அரசு நிதியே மோசடியில் சிக்கியிருப்பது புதுச்சேரியில் பெரும் பரபரப்பை ஏற்படுத்தியுள்ளது.
ஆந்திராவை சூறையாடிய ‘முரசு’ புயல்: ஹெலிக்காப்டரில் இருந்து பார்வையிட்ட முதல்வர் சந்திரபாபு நாயுடு.!