கர்நாடக மாநிலத்தில் குடும்பப் பிரச்சினை காரணமாக ஆற்றில் குதித்து தற்கொலைக்கு முயன்ற பெண், எதிர்பாராத விதமாக முதலை தாக்கியதால் கூச்சலிட்டுள்ளார். அவரது அலறல் சத்தத்தைக் கேட்ட பொதுமக்களும் போலீசாரும் விரைந்து செயல்பட்டு அவரை உயிருடன் மீட்ட சம்பவம் பரபரப்பை ஏற்படுத்தியுள்ளது.
ஆற்றில் குதித்த பெண் – தாக்கிய முதலை!
கர்நாடக மாநிலம் தட்சிண கன்னடா மாவட்டத்தில் உள்ள புகழ்பெற்ற குக்கே சுப்பிரமணியா கோவில் பகுதிக்கு உட்பட்ட குமாரதாரா ஆற்றில் இந்தச் சம்பவம் நடைபெற்றுள்ளது.
உடுப்பி மாவட்டத்தைச் சேர்ந்த 38 வயதான ரேகா (பெயர் மாற்றப்பட்டுள்ளது) என்பவர் தனது குடும்பத்தினருடன் கோவிலுக்கு வந்துள்ளார். அப்போது கணவருடன் ஏற்பட்ட குடும்பத் தகராறு காரணமாக மனமுடைந்த அவர், புதன்கிழமை இரவு குமாரதாரா பாலத்தில் இருந்து ஆற்றில் குதித்துத் தற்கொலைக்கு முயன்றதாகக் கூறப்படுகிறது.
அவர் ஆற்றில் தத்தளித்துக் கொண்டிருந்தபோது அங்கிருந்த முதலை ஒன்று அவரைக் கடித்துள்ளது. இதனால் அதிர்ச்சியடைந்த பெண் உதவி கேட்டு அலறியுள்ளார்.
அலறல் சத்தம் கேட்டு விரைந்த போலீசார்!
பெண்ணின் அலறல் சத்தத்தைக் கேட்ட அருகிலிருந்த தங்கும் விடுதி ஊழியர்கள் உடனடியாக சுப்பிரமணியா போலீசாருக்குத் தகவல் தெரிவித்தனர்.
இதையடுத்து போலீசாரும் அப்பகுதி மக்களும் விரைந்து சென்று ஆற்றில் இருந்த முதலையை விரட்டியதுடன், பெண்ணையும் பத்திரமாக மீட்டனர்.
முதலை கடித்ததில் அவருக்கு லேசான காயங்கள் ஏற்பட்டன. உடனடியாக மருத்துவமனைக்குக் கொண்டு செல்லப்பட்ட அவருக்கு முதலுதவி சிகிச்சை அளிக்கப்பட்டது.
குடும்பத்தினரிடம் ஒப்படைத்த போலீசார்!
சிகிச்சைக்குப் பிறகு அந்தப் பெண்ணுக்கு போலீசார் மனநல ஆலோசனையும் வழங்கினர். பின்னர் அவரது குடும்பத்தினரைத் தொடர்புகொண்டு அவர்களுடன் வீட்டுக்கு அனுப்பி வைத்தனர்.
இந்தச் சம்பவம் தொடர்பாக இதுவரை எந்தப் புகாரும் பதிவு செய்யப்படவில்லை என்றும், பெண்ணின் குடும்பத்தினர் கேட்டுக்கொண்டதற்கிணங்க அவரது அடையாளம் வெளியிடப்படவில்லை என்றும் போலீசார் தெரிவித்துள்ளனர்.
தற்கொலை முயற்சியில் ஈடுபட்ட பெண்ணை முதலை தாக்கிய சம்பவம், எதிர்பாராத விதமாக அவர் உதவி கேட்டு அலறவும், அதன் மூலம் போலீசார் மற்றும் பொதுமக்கள் அவரை மீட்கவும் வழிவகுத்துள்ளது.