தலைமைத் தேர்தல் ஆணையர் ஞானேஷ் குமாரை பதவி நீக்கம் செய்ய வேண்டும் என்றும், வாக்காளர் பட்டியல் சிறப்பு தீவிர திருத்தமான SIR நடவடிக்கையை ரத்து செய்ய வேண்டும் என்றும் வலியுறுத்தி, காக்ரோச் ஜனதா கட்சி (CJP) சார்பில் நவம்பர் 7-ம் தேதி கேரள மாநிலம் கொச்சியில் போராட்டம் நடைபெற உள்ளது.
“ஜனநாயகத்தைக் காப்போம்; SIR-ஐ ரத்து செய்வோம்” என்ற முழக்கத்துடன் நடைபெற உள்ள இந்தப் போராட்டம், “ஜந்தர் மந்தர் @ கொச்சி” எனப் பெயரிடப்பட்டுள்ளது. கொச்சியில் உள்ள ராஜேந்திர மைதானத்தில் மாலை 4 மணிக்கு இந்த ஆர்ப்பாட்டம் நடைபெறுகிறது.
டெல்லியில் ஏற்பட்ட தடையைத் தொடர்ந்து கொச்சியில் போராட்டம்
டெல்லியின் ஜந்தர் மந்தர் பகுதியில் ஞானேஷ் குமாருக்கு எதிராகப் போராட்டம் நடத்த முயன்ற CJP நிறுவனர் அபிஜீத் தீப்கே உள்ளிட்ட நிர்வாகிகளை டெல்லி காவல்துறையினர் கடந்த மாதம் கைது செய்தனர். அனுமதியின்றிப் போராட்டம் நடத்த முயன்றதாகக் கூறி இந்த நடவடிக்கை எடுக்கப்பட்டது.
இதற்கிடையே, ஜந்தர் மந்தர் போராட்டத் தளமாகப் பயன்படுத்தப்படுவதற்கான அனுமதியும் ரத்து செய்யப்பட்டது. இதனால் டெல்லியில் போராட்டம் நடத்துவதில் சிக்கல் ஏற்பட்ட நிலையில், தங்களது எதிர்ப்பைத் தேசிய அளவில் விரிவுபடுத்தும் வகையில் கொச்சியில் போராட்டத்தை நடத்த CJP முடிவு செய்துள்ளது.
முக்கிய நிர்வாகிகள் பங்கேற்பு
கொச்சியில் நடைபெற உள்ள இந்தப் போராட்டத்தில் CJP நிறுவனர் அபிஜீத் தீப்கே, தேசியச் செயலாளர் ஆஃப்ரீன் நவாஸ் மற்றும் தெற்கு மண்டலப் பொறுப்பாளர் விஜய் மல்லங்கி உள்ளிட்டோர் பங்கேற்க உள்ளனர்.
டெல்லிக்கு வெளியே CJP நடத்தும் முதல் பெரிய அளவிலான போராட்டமாக இது பார்க்கப்படுகிறது. SIR நடவடிக்கைக்கு எதிராகவும், தேர்தல் நடைமுறைகளில் வெளிப்படைத்தன்மை கோரியும் இந்தப் போராட்டம் முன்னெடுக்கப்படுவதாக அந்த அமைப்பு தெரிவித்துள்ளது.