காஞ்சிபுரம் மாவட்டம் ஒரகடம் அருகே, 20-க்கும் மேற்பட்ட டாஸ்மாக் மதுக்கடைகளில் வசூலான ரூ.1.5 கோடி பணம் கொள்ளையடிக்கப்பட்ட சம்பவம் பெரும் பரபரப்பை ஏற்படுத்தியுள்ளது.
வசூல் பணத்துடன் சென்ற வாகனத்தையும் மர்ம நபர்கள் கடத்திச் சென்றதாகக் கூறப்படுகிறது.
ரூ.1.5 கோடி பணம் கொள்ளை
20-க்கும் மேற்பட்ட டாஸ்மாக் மதுக்கடைகளில் வசூலான பணம் சுமார் ரூ.1.5 கோடி எனக் கூறப்படுகிறது. இந்தப் பணத்தை எடுத்துச் சென்ற வாகனத்தை மர்ம நபர்கள் வழிமறித்து, பணத்துடன் வாகனத்தையும் கடத்திச் சென்றதாகத் தகவல் வெளியாகியுள்ளது.
காரை விட்டுவிட்டு தப்பியோட்டம்
கொள்ளைச் சம்பவத்துக்குப் பிறகு, தாரணிதாங்கல் பகுதியில் காரை விட்டுவிட்டு மர்ம நபர்கள் தப்பியோடியதாகக் கூறப்படுகிறது. இதையடுத்து, சம்பவ இடத்திற்கு விரைந்த போலீசார் விசாரணையைத் தீவிரப்படுத்தினர்.
தனிப்படை அமைத்து விசாரணை
கொள்ளையில் ஈடுபட்ட நபர்களைப் பிடிக்கத் தனிப்படை அமைக்கப்பட்டுள்ளது. தப்பியோடியவர்களின் அடையாளம், கொள்ளையடிக்கப்பட்ட பணம் மற்றும் கடத்திச் செல்லப்பட்ட வாகனம் குறித்து போலீசார் பல்வேறு கோணங்களில் விசாரணை நடத்தி வருகின்றனர். இச்சம்பவம் அப்பகுதியில் பெரும் பரபரப்பை ஏற்படுத்தியுள்ளது.