அமெரிக்காவுடனான மோதல் போக்கின் காரணமாக ஈரான் அவ்வப்போது ஹார்மூஸ் நீரிணையை (Strait of Hormuz) முடக்குவதாக எச்சரிப்பதும், அதன் வழியாக நடைபெறும் கச்சா எண்ணெய் போக்குவரத்துக்குப் பாதிப்பு ஏற்படும் அபாயமும் உலக நாடுகளிடையே கவலையை ஏற்படுத்தி வருகின்றன. இந்தச் சிக்கலைச் சமாளிக்கும் வகையில், வளைகுடா நாடுகள் மாற்று எண்ணெய் ஏற்றுமதி வழித்தடங்களை உருவாக்கும் திட்டங்களில் தீவிரம் காட்டி வருகின்றன.
ஏற்றுமதிக்கு ஹார்மூஸ் நீரிணையை மட்டுமே நம்பியிருந்த நாடுகள்!
கத்தார், குவைத், ஈராக், ஐக்கிய அரபு அமீரகம் மற்றும் சவுதி அரேபியா உள்ளிட்ட முக்கிய எண்ணெய் ஏற்றுமதி நாடுகள், தங்களது கச்சா எண்ணெய் போக்குவரத்துக்கு ஹார்மூஸ் நீரிணையைப் பெரிதும் நம்பியுள்ளன.
இந்த நீரிணை வழியாகக் கப்பல் போக்குவரத்து தடைபட்டால், எண்ணெய் ஏற்றுமதி பாதிக்கப்படுவதுடன், சம்பந்தப்பட்ட நாடுகளுக்குப் பல பில்லியன் டாலர் அளவுக்கு வருவாய் இழப்பு ஏற்படும் அபாயமும் உள்ளது. இதனால், ஒரே கடல்வழியைச் சார்ந்திருப்பதைக் குறைக்க மாற்றுப் பாதைகளை உருவாக்கும் முயற்சிகள் முன்னெடுக்கப்பட்டுள்ளன.
சவுதி அரேபியாவின் 1,200 கி.மீ. எண்ணெய்க் குழாய் திட்டம்!
ஈரானின் அச்சுறுத்தல்களைத் தவிர்த்து எண்ணெய் ஏற்றுமதியைத் தொடரும் நோக்கில், சவுதி அரேபியா தனது கிழக்குப் பகுதியில் உள்ள எண்ணெய் வயல்களில் இருந்து நாட்டின் மேற்குப் பகுதி வரை சுமார் 1,200 கிலோமீட்டர் தொலைவுக்கு எண்ணெய்க் குழாய் வழித்தடத்தைப் பயன்படுத்தும் திட்டத்தில் கவனம் செலுத்தி வருகிறது.
இதன் மூலம் செங்கடல் பகுதியில் அமைந்துள்ள யான்பு (Yanbu) துறைமுகத்திற்குக் கச்சா எண்ணெயைக் கொண்டு சென்று, அங்கிருந்து சர்வதேச சந்தைகளுக்கு ஏற்றுமதி செய்ய முடியும். இதனால் ஹார்மூஸ் நீரிணையைச் சார்ந்திருக்கும் நிலை குறையும் என எதிர்பார்க்கப்படுகிறது.
ஐக்கிய அரபு அமீரகத்தின் ஹப்ஷான் – புஜைரா திட்டம்!
ஐக்கிய அரபு அமீரகமும் ஹார்மூஸ் நீரிணையைத் தவிர்த்து எண்ணெய் ஏற்றுமதி செய்வதற்காக ஹப்ஷான் – புஜைரா (Habshan–Fujairah) எண்ணெய்க் குழாய் வழித்தடத்தைப் பயன்படுத்தி வருகிறது. இதன் மூலம் நாட்டின் உள்பகுதியில் இருந்து ஓமன் வளைகுடா பகுதியில் அமைந்துள்ள புஜைரா துறைமுகத்திற்குக் கச்சா எண்ணெயைக் கொண்டு செல்ல முடியும்.
மேலும், புஜைரா துறைமுகத்தில் மலையைக் குடைந்து சுமார் 4.2 கோடி பீப்பாய்கள் வரை கச்சா எண்ணெயைச் சேமிக்கும் திறன் கொண்ட நிலத்தடி சேமிப்புக் கிடங்குகள் உருவாக்கப்பட்டுள்ளதாகவும் தெரிவிக்கப்பட்டுள்ளது. இந்த வசதிகள் எண்ணெய் ஏற்றுமதியில் ஏற்படும் தடைகளைச் சமாளிக்க உதவும் என எதிர்பார்க்கப்படுகிறது.
ஈராக்கின் மாற்றுத் திட்டம்: டேங்கர் லாரிகள் மூலம் எண்ணெய் போக்குவரத்து!
இதற்கிடையே, ஈராக்கின் பாஸ்ரா பகுதியிலிருந்து ஆயிரக்கணக்கான டேங்கர் லாரிகள் மூலம் சிரியாவின் பனியாஸ் (Baniyas) துறைமுகத்திற்கு கச்சா எண்ணெயைக் கொண்டு சென்று, அங்கிருந்து மத்திய தரைக்கடல் வழியாக ஏற்றுமதி செய்யும் திட்டமும் குறிப்பிடப்பட்டுள்ளது.
இந்தப் போக்குவரத்துக்காக சுமார் 6,000 டேங்கர் லாரிகள் பயன்படுத்தப்படுவதாகவும், எதிர்காலத்தில் அவற்றின் எண்ணிக்கையை அதிகரிக்கத் திட்டமிடப்பட்டுள்ளதாகவும் தகவல்கள் தெரிவிக்கின்றன. இந்த வழியாகக் கொண்டு செல்லப்படும் எண்ணெய் கிரீஸ், இத்தாலி, துருக்கி உள்ளிட்ட நாடுகளுக்குச் சென்றடைவதாகக் கூறப்படுகிறது.
ஹார்மூஸ் நீரிணையைச் சார்ந்திருக்கும் நிலை குறையுமா?
சவுதி அரேபியாவின் எண்ணெய்க் குழாய் வழித்தடம், ஐக்கிய அரபு அமீரகத்தின் புஜைரா ஏற்றுமதி வசதி மற்றும் ஈராக்கின் மாற்றுப் போக்குவரத்துத் திட்டம் ஆகியவை வளைகுடா நாடுகளுக்கு மாற்று வாய்ப்புகளை உருவாக்குகின்றன.
எனினும், இந்த வழித்தடங்களின் போக்குவரத்துத் திறன், செயல்பாட்டுச் செலவு மற்றும் ஏற்றுமதி அளவு ஆகியவை ஹார்மூஸ் நீரிணை வழியாக நடைபெறும் மொத்த எண்ணெய் வர்த்தகத்திற்கு முழுமையான மாற்றாக அமையுமா என்பது முக்கியமான கேள்வியாக உள்ளது.
ஈரான் – அமெரிக்கா இடையிலான பதற்றம் தொடர்ந்து நீடிக்கும் சூழலில், ஹார்மூஸ் நீரிணையைச் சார்ந்திருப்பதைக் குறைத்து எண்ணெய் ஏற்றுமதியைப் பாதுகாப்பதற்கான வளைகுடா நாடுகளின் இந்த முயற்சிகள் சர்வதேச எரிசக்தி சந்தையில் முக்கியத்துவம் பெற்றுள்ளன.