நியூசிலாந்துக்கு எதிரான 5-வது மற்றும் கடைசி ஒருநாள் கிரிக்கெட் போட்டியில் மெதுவாகப் பந்துவீசியதற்காக இந்திய அணிக்கு போட்டி ஊதியத்தில் 35 சதவீதம் அபராதம் விதித்து சர்வதேச கிரிக்கெட் கவுன்சில் (ஐசிசி) நடவடிக்கை எடுத்துள்ளது.

இந்தியா – நியூசிலாந்து அணிகள் இடையிலான 5-வது ஒருநாள் போட்டி கடந்த நவம்பர் 15-ம் தேதி நியூசிலாந்தின் மவுண்ட் மாங்கனுய் நகரில் நடைபெற்றது. இந்தப் போட்டியில் இந்திய அணி 22 ரன்கள் வித்தியாசத்தில் வெற்றி பெற்று, ஒருநாள் தொடரை 3-1 என்ற கணக்கில் கைப்பற்றியது.
இருப்பினும், இந்தப் போட்டியில் நிர்ணயிக்கப்பட்ட நேரத்திற்குள் இந்திய அணி பந்துவீச்சை முடிக்கவில்லை என்று புகார் எழுந்தது. நேர ஒதுக்கீடுகளைக் கணக்கில் எடுத்த பிறகும் இந்திய அணி 7 ஓவர்கள் குறைவாக வீசியது கண்டறியப்பட்டது.
35 சதவீதம் அபராதம் விதித்த ஐசிசி!
இதையடுத்து, ஐசிசி எலைட் குழு போட்டி நடுவர் ரஞ்சன் மதுகல்லே இந்திய அணிக்கு போட்டி ஊதியத்தில் 35 சதவீதம் அபராதம் விதித்தார்.
ஐசிசியின் வீரர்கள் மற்றும் வீரர் உதவிப் பணியாளர்களுக்கான நடத்தை விதிமுறைகளின் 2.22-வது பிரிவின்படி, நிர்ணயிக்கப்பட்ட நேரத்திற்குள் வீசப்படாத ஒவ்வொரு ஓவருக்கும் வீரர்களின் போட்டி ஊதியத்தில் 5 சதவீதம் அபராதம் விதிக்கப்படும். அதிகபட்சமாக 50 சதவீதம் வரை அபராதம் விதிக்க இந்த விதிமுறை அனுமதிக்கிறது.
இதன்படி, 7 ஓவர்கள் குறைவாக வீசியதால் இந்திய அணிக்கு 35 சதவீத அபராதம் விதிக்கப்பட்டுள்ளது.
குற்றத்தை ஒப்புக்கொண்ட ஷ்ரேயாஸ் ஐயர்!
இந்திய அணியின் வழக்கமான ஒருநாள் கேப்டன் சுப்மன் கில் இல்லாததால், கடைசி இரண்டு போட்டிகளுக்கு ஷ்ரேயாஸ் ஐயர் கேப்டனாகச் செயல்பட்டார்.
இந்நிலையில், மெதுவான ஓவர் ரேட் தொடர்பான குற்றச்சாட்டை ஷ்ரேயாஸ் ஐயர் ஒப்புக்கொண்டு, ஐசிசி விதித்த அபராதத்தையும் ஏற்றுக்கொண்டார். இதனால் இந்த விவகாரம் தொடர்பாக முறையான விசாரணை நடத்த வேண்டிய அவசியம் ஏற்படவில்லை என்று ஐசிசி தெரிவித்துள்ளது.
இந்தக் குற்றச்சாட்டை கள நடுவர்கள் பால் ரீஃபெல், வெய்ன் நைட்ஸ், மூன்றாவது நடுவர் குமார் தர்மசேனா மற்றும் நான்காவது நடுவர் கிறிஸ் பிரவுன் ஆகியோர் முன்வைத்தனர்.
தொடரை வெற்றியுடன் நிறைவு செய்த இந்திய அணிக்கு, மெதுவான பந்துவீச்சு காரணமாக அபராதம் விதிக்கப்பட்டிருப்பது ரசிகர்கள் மத்தியில் கவனத்தைப் பெற்றுள்ளது.
ஐபிஎல் கிரிக்கெட்டில் இருந்து ஓய்வு: உருக்கமான வீடியோ வெளியிட்ட எம்.எஸ்.தோனி – ரசிகர்கள் நெகிழ்ச்சி!
