ஒரே வருடத்தில் 2500 கோடி வசூல்… கிங்கான் செய்த சாதனை…

இந்த 2023-ம் ஆண்டு இன்றுடன் முடிய உள்ள நிலையில், இந்த ஆண்டு அதிக வசூலை குவித்த நாயகர்களின் பட்டியல் தற்போது வெளியாகி உள்ளது. இது இந்திய அளவில் எடுக்கப்பட்ட கணக்கெடுப்பின் முடிவுகள் என்பது குறிப்பிடத்தக்கது. இந்திய சினிமா உலகில் இவ்வாண்டு பல முன்னணி நடிகர்களின் திரைப்படங்கள் மக்கள் மத்தியில் பெரும் வரவேற்பை பெற்றுள்ளது.

அந்த வகையில், தற்போது வெளியாகி உள்ள படங்களில் சுமார் 2,500 கோடி ரூபாயை ஒரே வருடத்தில் வசூல் செய்து இந்த 2023 ஆம் ஆண்டின் வெற்றி நாயகனாக மாறி இருக்கிறார் பாலிவுட்டின் கிங்கான் ஷாருக்கான். இந்த ஆண்டு அவரது நடிப்பில் பதான், அட்லீயின் ஜவான் மற்றும் டன்கி ஆகிய மூன்று திரைப்படங்கள் வெளியாகி உள்ளன.

நடப்பு ஆண்டில் வெளியான பலத் திரைப்படங்கள் வசூல் ரீதியாக மட்டுமன்றி விமர்சன ரீதியாகவும் வெற்றி பெற்றன. அதில் பெரும் பங்கு பாலிவுட்டின் பாட்ஷாவாக கொண்டாடப்படும் ஷாருக்கானுக்கே சேரும். ஆண்டின் தொடக்கத்தில் ஷாருக்கானின் பதான் திரைப்படம் வெளியானது. சித்தார்த் ஆனந்த் இப்படத்தை இயக்கியிருந்தார். படத்தில் தீபிகா படுகோன், ஜான் ஆப்ரஹாம், ஆகியோர் முக்கிய கதாபாத்திரங்களில் நடித்திருந்தனர். இத்திரைப்படம் சுமார் ஆயிரம் கோடி ரூபாய்க்கு மேல் வசூலித்து பட்டையை கிளப்பியது.

இதைத் தொடர்ந்து அட்லீ இயக்கத்தில் ஷாருக்கான் நடித்த ஜவான் திரைப்படம் வெளியானது. நயன்தாரா, விஜய் சேதுபதி, தீபிகா படுகோன் என பெரும் நட்சத்திரங்களின் நடிப்பில் வெளியான ஜவான் திரைப்படமும் ஆயிரம் கோடிக்கு மேல் வசூலித்தது. இதைத்தொடர்ந்து ராஜ்குமார் ஹிரானி இயக்கத்தில் ஷாருக்கான் நடித்துள்ள திரைப்படம் டன்கி. ‘முன்னா பாய் எம்பிபிஎஸ்’, ‘3 இடியட்ஸ்’, ‘பிகே’, ‘சஞ்சு’ ஆகிய படங்களை இயக்கியவர் ஹிராணி. படத்தில் டாப்ஸி, விக்கி கவுஷல், போன் இரானி, அனில் குரோவர் ஆகியோர் முக்கிய கதாபாத்திரங்களில் நடித்துள்ளனர். இத்திரைப்படம் கடந்த 21-ம் தேதி உலகம் முழுவதும் வெளியாகி பெரும் வரவேற்பை பெற்று வருகிறது.