2026 புத்தாண்டை உலகிலேயே முதலில் வரவேற்ற இடமாக மத்திய பசிபிக் பெருங்கடலில் அமைந்துள்ள கிரிபாட்டி தீவு.
உலகம் முழுவதும் புத்தாண்டு ஒரே நேரத்தில் பிறப்பதில்லை. பூமியின் சுழற்சி மற்றும் நேர மண்டலங்கள் (Time Zones) காரணமாக, சில நாடுகள் புத்தாண்டை முன்னதாகவும், சில நாடுகள் பல மணி நேரங்கள் கழித்தும் வரவேற்கின்றன.
அந்த வகையில், 2026 புத்தாண்டை உலகிலேயே முதலில் வரவேற்ற இடமாக மத்திய பசிபிக் பெருங்கடலில் அமைந்துள்ள கிரிபாட்டி தீவு திகழ்கிறது. சுமார் 1.37 லட்சம் மக்கள் வசிக்கும் இந்த தீவில், இந்திய நேரப்படி பிற்பகல் 3.30 மணியளவில் 2026 புத்தாண்டு பிறந்தது.
கிரிபாட்டி நாட்டின் கிறிட்டிமாட்டி (Kiritimati) நகரில் புத்தாண்டை வரவேற்கும் விழாக்கள் உற்சாகமாக நடைபெற்றன. மக்கள் ஒருவருக்கொருவர் புத்தாண்டு வாழ்த்துக்களைப் பரிமாறிக் கொண்டு, பாரம்பரிய நிகழ்ச்சிகள் மற்றும் கொண்டாட்டங்களில் ஈடுபட்டனர்.
பூமியின் நேர மண்டல அமைப்பில், கிரிபாட்டி தீவின் சில பகுதிகள் சர்வதேச தேதிக்கோட்டிற்கு (International Date Line) கிழக்கே அமைந்துள்ளதால், உலகின் பிற பகுதிகளைவிட முன்பாகவே இங்கு புதிய ஆண்டு பிறக்கிறது. இதன் காரணமாக, ஒவ்வொரு ஆண்டும் புத்தாண்டை முதலில் வரவேற்கும் இடமாக கிரிபாட்டி தீவு குறிப்பிடப்படுகிறது.
2026 புத்தாண்டை வரவேற்க உலக நாடுகள் தயாராகி வரும் நிலையில், கிரிபாட்டி தீவில் தொடங்கிய கொண்டாட்டங்கள், அடுத்தடுத்து பல நாடுகளுக்கும் நகர்ந்து உலகம் முழுவதும் புத்தாண்டு மகிழ்ச்சியை பரப்பி வருகின்றன.