சப்தம் படத்தின் டிரைலர் வெளியாகி உள்ளது.
தமிழ் சினிமாவில் மிருகம், மரகத நாணயம், ஈரம் ஆகிய படங்களின் மூலம் ரசிகர்கள் மத்தியில் மிகவும் பிரபலமானவர் நடிகர் ஆதி. அந்த வகையில் இவரது நடிப்பில் கடந்த 2009இல் வெளியான ‘ஈரம்’ திரைப்படத்தை அறிவழகன் இயக்கியிருந்தார். தண்ணீரை மையமாக வைத்து ஹாரர் திரில்லர் கதைக்களத்தில் வெளியான இந்த படம் ரசிகர்கள் மத்தியில் மிகப்பெரிய வரவேற்பை பெற்றது. இந்நிலையில் அறிவழகன், ஆதி கூட்டணியில் உருவாகியுள்ள சப்தம் திரைப்படத்தின் மீதான எதிர்பார்ப்பும் அதிக அளவில் இருந்து வருகிறது. இந்த படத்தை 7ஜி ஃபிலிம்ஸ் நிறுவனம் தயாரிக்க தமன் இப்படத்திற்கு இசையமைத்துள்ளார். இதில் ஆதியுடன் இணைந்து லட்சுமி மேனன், லைலா, சிம்ரன் மற்றும் பலர் நடித்திருக்கின்றனர். மேலும் இந்த படத்தின் தலைப்பை பார்க்கும்போது இப்படமானது சப்தம் என்பதை மையக்கருவாக வைத்து ஈரம் படத்தைப் போலவே ஹாரர் த்ரில்லர் ஜானரில் உருவாக்கப்பட்டிருப்பதாக தெரிகிறது.
ஏற்கனவே இந்த படத்தின் படப்பிடிப்புகள் முழுவதும் நிறைவடைந்த நிலையில் படமானது வருகின்ற பிப்ரவரி 28 அன்று திரைக்கு வர இருக்கிறது. இதற்கிடையில் இந்த படத்தில் இருந்து அடுத்தடுத்த போஸ்டர்களும், முதல் பாடலும் வெளியாகி நல்ல வரவேற்பை பெற்றன. இதைத் தொடர்ந்து இப்படத்தின் ட்ரெய்லரை படக்குழு வெளியிட்டுள்ளது. இந்த படத்தில் ஆதி, ரூபன் என்ற கதாபாத்திரத்தில் நடித்துள்ளார். இவர் இப்படத்தில் பேய்களை பற்றி தெரிந்துகொள்ளும் புலனாய்வாளராக நடித்திருக்கிறார். மிரட்டலான இசையில் திரில்லிங்கான காட்சிகளுடன் வெளியாகியுள்ள இந்த ட்ரெய்லர் படத்தின் மீதான எதிர்பார்ப்பை அதிகப்படுத்தி உள்ளது. அத்துடன் இணையத்திலும் வைரலாகி வருகிறது.