தமிழ் சினிமாவில் முன்னணி நடிகராக வலம் வருவதுடன், பல வெற்றிப் பாடல்களை எழுதியுள்ள நடிகர் சிவகார்த்திகேயன், தற்போது தென்னிந்திய திரைப்பட எழுத்தாளர்கள் சங்கத்தில் அதிகாரப்பூர்வப் பாடலாசிரியராக இணைந்துள்ளார்.
இது தமிழ் சினிமா வட்டாரத்தில் பெரும் வரவேற்பைப் பெற்றுள்ளது.
எழுத்தாளர்கள் சங்க நிர்வாகிகளின் சந்திப்பு
தென்னிந்திய திரைப்பட எழுத்தாளர்கள் சங்கத்தின் சார்பில், அதன் தலைவர் சேரன், பொதுச்செயலாளர் பட்டுக்கோட்டை பிரபாகர், பொருளாளர் சுந்தர்ராஜன், துணைத்தலைவர் சினேகன் மற்றும் செயற்குழு உறுப்பினர்களான இயக்குநர் செல்வபாரதி, இயக்குநர் கே.பி.பி. நவீன் ஆகியோர் நடிகர் சிவகார்த்திகேயனை நேரில் சந்தித்து வாழ்த்து தெரிவித்தனர்.
மரியாதை நிமித்தமான சந்திப்பு:
எழுத்தாளர்கள் சங்கம் சார்பில் விரைவில் நடத்தப்பட உள்ள சிறப்பு விழா குறித்து விவாதிக்கவும், அதுதொடர்பாக அழைப்பு விடுக்கவுமே இந்தச் சந்திப்பு நிகழ்த்தப்பட்டது.
பாடலாசிரியராக இணைவு:
சங்கத்தின் நிர்வாகிகளின் அன்பான வேண்டுகோளை ஏற்றுக்கொண்ட நடிகர் சிவகார்த்திகேயன், உடனடியாகத் தென்னிந்திய திரைப்பட எழுத்தாளர்கள் சங்கத்தில் தன்னை ஒரு பாடலாசிரியராக முறைப்படி இணைத்துக்கொண்டார்.
ஆலோசனைகளும் உறுதிமொழியும் – சங்க நலன் சார்ந்து:
சங்கத்தில் இணைந்ததுடன் மட்டும்நில்லாமல், எழுத்தாளர்கள் சங்கத்தின் மேம்பாடு மற்றும் எதிர்காலச் செயல்பாடுகள் குறித்தும் சில ஆலோசனைகளை அவர் நிர்வாகிகளுடன் பகிர்ந்துகொண்டார்.
மேலும், சங்கம் சார்பில் வரவிருக்கும் விழாவில் கலந்துகொள்வதாகவும் அவர் உறுதியளித்துள்ளார் எனச் சங்க நிர்வாகிகள் மகிழ்ச்சியுடன் தெரிவித்துள்ளனர்.
திரைப்படங்களில் நடிகராகவும், தயாரிப்பாளராகவும் முத்திர பதித்து வரும் சிவகார்த்திகேயன், தற்போது எழுத்தாளர்கள் சங்கத்தில் பாடலாசிரியராக இணைந்துள்ளது குறிப்பிடத்தக்க மைல்கல்லாகப் பார்க்கப்படுகிறது.