நீட் தேர்வு விவகாரத்தில் திமுகவின் இரட்டை வேடத்தால் தான் மாணவர்கள் பாதிக்கப்பட்டுள்ளனர் என்றும், மேகதாது அணை விவகாரத்தில் உச்ச நீதிமன்றத்தின் தீர்ப்பே இறுதியானது என்றும் அதிமுக மூத்த தலைவரும் நாடாளுமன்ற உறுப்பினருமான தம்பிதுரை தெரிவித்துள்ளார். சென்னையில் நடைபெற்ற செய்தியாளர் சந்திப்பில் பல்வேறு அரசியல் நிலவரங்கள் குறித்து அவர் விரிவாகப் பேசினார்.
நீட் விவகாரமும், திமுக – காங்கிரஸ் கூட்டணியின் வரலாற்றுத் துரோகமும்
செய்தியாளர்களைச் சந்தித்துப் பேசிய தம்பிதுரை தெரிவித்த முக்கியக் கருத்துக்களின் சுருக்கம் வருமாறு: “நீட் தேர்வு அறிமுகப்படுத்தப்பட்டபோதும், அது உறுதி செய்யப்பட்டபோதும் ஐக்கிய முற்போக்குக் கூட்டணியில் (UPA) அங்கம் வகித்தது திமுகதான். ஆனால், நீட் தேர்வைத் திரும்பப் பெற வேண்டும் என்று முதன்முதலில் 2014 மற்றும் 2015-ஆம் ஆண்டுகளில் பிரதமர் மோடிக்குக் கடிதம் எழுதியது அதிமுக அரசுதான். 2016-க்குப் பிறகு அரசியல் சூழல் மாறி, மாணவர்கள் உயிரிழப்பு அதிகரித்த பிறகே திமுக உள்ளிட்ட கட்சிகள் நீட் எதிர்ப்பில் இணைந்தன. கடந்த 2013-ஆம் ஆண்டில் உச்ச நீதிமன்றம் நீட் தேர்வை ரத்து செய்தபோது, அதனை எதிர்த்து மறு ஆய்வு மனு தாக்கல் செய்தது காங்கிரஸ் – திமுக கூட்டணி ஆட்சிதான்.
அப்போது மத்திய சுகாதாரத்துறை அமைச்சராக குலாம் நபி ஆசாத்தும், இணை அமைச்சராக திமுகவைச் சேர்ந்த காந்தி செல்வம் பதவியில் இருந்தனர் என்பது குறிப்பிடத்தக்கது. 2021 முதல் 2026 வரையிலான திமுக ஆட்சிக் காலத்தில் நீட் தேர்வை ரத்து செய்ய எந்த ஒரு தெளிவான நடவடிக்கையும் எடுக்காமல், 85 லட்சம் கையெழுத்து இயக்கம் போன்ற விளம்பர நாடகங்கள் மூலமாக மாணவர்களை மட்டுமே திமுக ஏமாற்றியுள்ளது.”
அதிமுக ஆட்சியில் கல்வி மற்றும் மருத்துவத் துறையின் சாதனைகள்
அதிமுகவின் தொடர்ச்சியான முன்னெடுப்புகள் குறித்துப் பேசிய அவர், “2017-ஆம் ஆண்டில் நீட் தேர்விலிருந்து தமிழகத்திற்கு விலக்கு அளிக்கச் சட்டம் முன்மொழிந்து மத்திய அரசின் ஒப்புதலுக்காக அனுப்பியதும், அவசர சட்டம் கொண்டுவரக் கோரியதும் அதிமுக அரசுதான். மேலும், அரசுப் பள்ளிகளில் பயின்ற மாணவர்களுக்கு மருத்துவப் படிப்பில் 7.5% உள் ஒதுக்கீடு சட்டத்தைக் கொண்டுவந்து நூற்றுக்கணக்கான எளிய மாணவர்களின் மருத்துவக் கனவை நனவாக்கியது அதிமுக.
2011-இல் திமுக ஆட்சி முடிவடைந்தபோது 1,945 மருத்துவ இடங்கள் மட்டுமே இருந்த நிலையில், அதிமுக ஆட்சியில் 23 புதிய அரசு மருத்துவக் கல்லூரிகள் தொடங்கப்பட்டு, மருத்துவ இடங்கள் 5,200 ஆக உயர்த்தப்பட்டன. ‘நீட் தேர்வு வேண்டாம்’ என்பதுதான் எங்களின் உறுதியான நிலைப்பாடு” என்றார்.
கல்வியை மாநில பட்டியலுக்கு மாற்ற வேண்டும்
தொடர்ந்து பேசிய தம்பிதுரை, “சுகாதாரமும் கல்வியும் மாநிலப் பட்டியலின் கீழ் வர வேண்டும்; எமர்ஜென்சி காலத்தில்தான் கல்வியைப் பொதுப்பட்டியலுக்குக் காங்கிரஸ் கொண்டு சென்றது. கல்வியை மீண்டும் மாநில பட்டியலுக்குக் கொண்டுவர வேண்டும் என்பதே எங்களின் நிலைப்பாடு. பத்தாண்டு காலம் காங்கிரஸுடன் கூட்டணியில் இருந்தபோது திமுகதனைச் செய்திருக்கலாம். மேலும், நீட் முறைகேடுகளைத் தடுக்க சட்டத்திருத்தம் கொண்டுவந்தது நல்ல முயற்சி என்றாலும், பயிற்சி மையங்களை முழுமையாக ஒழித்தால் மட்டுமே முறைகேடுகளைத் தடுத்து நிறுத்த முடியும்” எனத் தெரிவித்தார்.
மேகதாது அணை தேவையற்றது – உச்ச நீதிமன்றத் தீர்ப்பே இறுதியானது
காவிரி மற்றும் மேகதாது விவகாரம் குறித்துக் குறிப்பிடுகையில், “பெங்களூரு மக்களுக்குக் குடிநீர் வழங்கத் தமிழக மக்கள் எதிரானவர்கள் அல்ல. ஏற்கனவே இருக்கக்கூடிய கிருஷ்ணராஜ சாகர் (KRS) உள்ளிட்ட அணைகளில் இருந்தே 18 டிஎம்சி நீரைத் குடிநீர் தேவைக்கு எடுத்துக் கொள்ள முடியும். எனவே, குடிநீருக்காகப் புதிய அணை கட்ட வேண்டும் என்பது தேவையற்றது.
அணை கட்டப்பட்டால் தமிழ்நாடு, புதுச்சேரி மற்றும் கேரளாவின் விவசாயப் பெருங்குடி மக்கள் கடுமையாகப் பாதிக்கப்படுவார்கள். மத்திய அமைச்சர்கள் என்ன கூறினாலும், உச்ச நீதிமன்றத்தின் தீர்ப்பே இறுதியானது; தமிழகத்தின் அனுமதி இல்லாமல் அங்கு எந்த ஒரு அணையும் கட்ட முடியாது” என்று திட்டவட்டமாகக் கூறினார்.
திராவிட இயக்கமும், தவெக விமர்சனமும்
அரசியல் கள விமர்சனங்களுக்குப் பதிலளித்த தம்பிதுரை, “அண்ணாவும், எம்ஜிஆரும், ஜெயலலிதாவும் வளர்த்தெடுத்த அதிமுகவை யாராலும் அழிக்க முடியாது; அதிமுகவை எடப்பாடி பழனிசாமி தொடர்ந்து சிறப்பாக மீட்டெடுத்து வருவார். ‘திராவிடக் கட்சிகள் முடிந்துவிட்டன’ என்று கூறும் தவெகவின் கொள்கைத் தலைவர்களாகவே பெரியாரும் அண்ணாவும் இருக்கிறார்கள்.
தமிழகத்தில் யாராலும் அழிக்க முடியாது; இன்றுவரை தமிழ்நாட்டை ஆளும் தத்துவம் திராவிடம்தான். திராவிடக் கட்சிகள் மக்களுக்குச் செய்த நலத்திட்டங்களை மக்களிடம் தொடர்ந்து எடுத்துரைப்போம்” எனத் தெரிவித்தார்.