“காவிரி நீரைத் தராத கர்நாடகாவுக்கு எண்ணெய் கொண்டு செல்ல தமிழனின் வயல்தான் பாதையா?” – விளைநிலங்களை அழிக்கும் திட்டத்திற்கு எதிராகக் கொதித்தெழுந்த தி.வேல்முருகன்!

“தண்ணீர் தர மறுக்கும் கர்நாடக மாநிலத்திற்காக, தமிழர்களின் வளமான விவசாய நிலங்களை அழித்து எண்ணெய் குழாய் பதிக்கும் அநீதியை ஒருபோதும் அனுமதிக்க முடியாது” என்று தமிழக வாழ்வுரிமைக் கட்சியின் தலைவர் தி.வேல்முருகன் கடும் கண்டனம் தெரிவித்துள்ளார். இது தொடர்பாக அவர் வெளியிட்டுள்ள ஆக்ரோஷமான அறிக்கையின் விவரம் பின்வருமாறு:

அரசின் இரட்டை நிலைப்பாடு ஏன்?

கனிம வளங்களை பிற மாநிலங்களுக்கு எடுத்துச் செல்ல தடை விதிக்கும் தமிழ்நாடு அரசு, விவசாய நிலங்களை அழிப்பதற்கு மட்டும் அனுமதிப்பது ஏன்? இது வெளிப்படையான இரட்டை நிலைப்பாடு ஆகும். தமிழ்நாட்டின் உரிமையான காவிரி நீரைக் கூட திறக்க மறுக்கும் கர்நாடக அரசுக்கு, நமது விவசாய நிலங்களை பலியிட்டு எண்ணெய் குழாய் அமைத்துக் கொடுக்கும் அநீதியைத் தமிழக வாழ்வுரிமைக் கட்சி வன்மையாகக் கண்டிக்கிறது.

தமிழகத்தின் உரிமைகளை மதிக்காத மாநிலங்களின் தேவைகளுக்காக, நமது இயற்கை வளங்களையும், விவசாய வளங்களையும் சூறையாடும் போக்கு இனியும் தொடரக் கூடாது. கனிம வளங்களைப் பாதுகாக்க சட்டம் இருப்பதை விட, விவசாய நிலங்களைப் பாதுகாக்க அதைவிட வலுவான சட்டம் இருக்க வேண்டும்.

விளைநிலங்களைச் சிதைப்பது அநீதி!

பாரத் பெட்ரோலியம் நிறுவனம், கோவை மாவட்டம் இருகூரில் இருந்து கர்நாடக மாநிலம் தேவனகுந்தி வரை எண்ணெய் குழாய் பதிக்கும் திட்டத்தைச் செயல்படுத்தி வருகிறது. முத்தூரிலிருந்து கர்நாடக எல்லை வரை நெடுஞ்சாலை ஓரமாகக் குழாய்கள் பதிக்கப்படும் நிலையில், இருகூரிலிருந்து முத்தூர் வரையிலான சுமார் 70 கிலோமீட்டர் தொலைவுக்கு மட்டும் விவசாயிகளின் எதிர்ப்பையும் மீறி, விளைநிலங்களைத் தோண்டி குழாய் பதிப்பது எவ்விதத்தில் நியாயம்?

நெடுஞ்சாலை வழியாகக் கொண்டு செல்ல முடியும் என்றால், விவசாய நிலங்களை ஏன் சிதைக்க வேண்டும்? கர்நாடகாவுக்கு எண்ணெய் கொண்டு செல்ல, தமிழனின் வயல்தான் பாதையா?

இழப்பீடு நிரந்தர தீர்வாகாது!

நாளை எண்ணெய் குழாயில் கசிவு ஏற்பட்டால், அந்த நிறுவனம் பணத்தை இழப்பீடாக வீசிவிட்டுப் போய்விடும். ஆனால், நஞ்சான மண்ணை மீண்டும் உயிர்ப்பிக்க முடியுமா? மாசடைந்த நிலத்தடி நீரை மீட்டெடுக்க முடியுமா? பல தலைமுறைகள் ரத்தம் சிந்தி, உழைத்து உருவாக்கிய விளைநிலங்களை மீண்டும் உருவாக்க முடியுமா?

தமிழக அரசுக்குக் கோரிக்கை

கேரளாவுக்காகத் தமிழ்நாட்டின் கனிம வளங்களை எடுத்துச் செல்லக் கூடாது என்பதே எங்களின் நிலைப்பாடு. அதேபோல், கர்நாடகாவுக்காக நமது விவசாய நிலங்களை அழிக்கக் கூடாது என்பதும் எங்களின் உறுதியான கொள்கை.

பிற மாநிலங்களின் திட்டங்களுக்காகத் தமிழ்நாட்டின் விவசாய நிலங்களைக் கையகப்படுத்தவோ, சேதப்படுத்தவோ கூடாது என்ற தெளிவான கொள்கை முடிவை தமிழ்நாடு அரசு உடனடியாக அறிவிக்க வேண்டும்.

பாரத் பெட்ரோலியம் நிறுவனம் விளைநிலங்கள் வழியாக மேற்கொள்ளும் பணிகளை உடனடியாகத் தடுத்து நிறுத்தி, ஏற்கனவே பயன்படுத்தப்படும் நெடுஞ்சாலை வழித்தடத்திலேயே முழு திட்டத்தையும் மாற்றியமைக்கத் தமிழக அரசு உத்தரவிட வேண்டும். இவ்வாறு தி.வேல்முருகன் தனது அறிக்கையில் மிகக் கடுமையாக வலியுறுத்தியுள்ளார்.