திருவண்ணாமலை அருணாசலேஸ்வரர் கோயிலில் நடைபெற உள்ள கார்த்திகை தீபத் திருவிழாவை முன்னிட்டு, பக்தர்களின் பாதுகாப்பிற்காகப் பல்வேறு விரிவான ஏற்பாடுகள் செய்யப்பட்டு வருகின்றன.
இதன் ஒரு பகுதியாக, பல்வேறு மாவட்டங்களில் இருந்து 5 டிஐஜிக்கள், 42 எஸ்பிக்கள் உள்ளிட்ட 15,000 போலீசார் பாதுகாப்புப் பணியில் ஈடுபடுத்தப்பட உள்ளனர்.
ஏஐ தொழில்நுட்பத்தில் 700-க்கும் மேற்பட்ட கண்காணிப்பு கேமராக்கள்
திருவண்ணாமலை மாநகரப் பகுதி, அருணாசலேஸ்வரர் திருக்கோயில் மற்றும் கிரிவலப் பாதை உள்ளிட்ட முக்கிய இடங்களில் 700-க்கும் மேற்பட்ட கண்காணிப்பு கேமராக்கள் பொருத்தப்பட உள்ளன. செயற்கை நுண்ணறிவு (ஏஐ) தொழில்நுட்பத்துடன் செயல்படும் இந்தக் கேமராக்கள் மூலம் பக்தர்களின் நடமாட்டம் தீவிரமாகக் கண்காணிக்கப்படும்.
மேலும், ஏஐ தொழில்நுட்பத்துடன் கூடிய ட்ரோன் கேமராக்கள் மூலமாகவும் மக்கள் கூட்டம் கண்காணிக்கப்பட உள்ளது. இதன் மூலம் அதிக அளவில் பக்தர்கள் கூடும் பகுதிகளைக் கண்டறிந்து, தேவையான பாதுகாப்பு மற்றும் போக்குவரத்து நடவடிக்கைகளை மேற்கொள்ள முடியும் என எதிர்பார்க்கப்படுகிறது.
பரணி தீபம், மகா தீபத்திற்கு பக்தர்களுக்குக் கட்டுப்பாடு
பரணி தீபத்தைக் காண 5,000 பக்தர்களும், மகா தீபத்தைக் காண 8,000 பக்தர்களும் திருக்கோயிலுக்குள் அனுமதிக்கப்பட உள்ளனர். பக்தர்கள் சிரமமின்றி தரிசனம் செய்யவும், கூட்ட நெரிசலைத் தவிர்க்கவும் இந்த ஏற்பாடுகள் செய்யப்பட்டுள்ளன.
25 தற்காலிக பேருந்து நிலையங்கள் – 155 இடங்களில் கார் பார்க்கிங்
தீபத் திருவிழாவிற்கு வருகை தரும் பக்தர்களின் போக்குவரத்து வசதிக்காக 25 தற்காலிகப் பேருந்து நிலையங்கள் அமைக்கப்பட உள்ளன. மேலும், 155 இடங்களில் கார் நிறுத்தும் வசதிகளும் ஏற்பாடு செய்யப்பட்டுள்ளன. வாகனங்களை ஒழுங்குபடுத்தவும், நிறுத்துமிடங்களை எளிதில் அடையாளம் காணவும் கியூஆர் குறியீடு வசதியுடன் கூடிய பார்க்கிங் ஏற்பாடுகளும் செய்யப்பட்டுள்ளன.
குற்றவாளிகள் ஊடுருவலைத் தடுக்க முக அடையாளக் கேமராக்கள்
திருவிழா கூட்டத்தில் குற்றச் செயல்களில் ஈடுபடுவோர் ஊடுருவுவதைத் தடுக்கும் வகையில், முக அடையாளம் காணும் கேமராக்கள் (Face Recognition Cameras) பயன்படுத்தப்பட உள்ளன. போலீசாரின் நேரடி கண்காணிப்புடன் நவீனத் தொழில்நுட்பங்களும் இணைக்கப்படுவதால், தீபத் திருவிழாவின்போது பாதுகாப்பு நடவடிக்கைகள் மேலும் தீவிரப்படுத்தப்பட உள்ளன.
திருவண்ணாமலை மகா தீபத் திருவிழா: தீபமலை உச்சியில் காவல்துறையினர் சிறப்பு பூஜை!