சென்னை அண்ணா பல்கலைக்கழக வளாகத்தில் பயிலும் மாணவ-மாணவிகளை உண்ணி காய்ச்சல் (Scrub Typhus) தாக்கியுள்ள நிலையில், அழகப்பா தொழில்நுட்பக் கல்லூரியில் இரண்டாம் ஆண்டு படிக்கும் மாணவி அபிநயா என்பவருக்கு ரத்த அணுக்களின் எண்ணிக்கை குறைந்தது கண்டறியப்பட்டு, தரமணி வி.எச்.எஸ். தனியார் மருத்துவமனையில் தீவிர சிகிச்சைக்காக அனுமதிக்கப்பட்டுள்ளார்.
சென்னை கிண்டியில் உள்ள அண்ணா பல்கலைக்கழக வளாகத்தில் உள்ள மாணவர் விடுதிகள் மற்றும் கல்வி வளாகங்களில் பயிலும் மாணவ-மாணவிகளுக்கு உண்ணி காய்ச்சல் பாதிப்பு ஏற்பட்டுள்ளது பெரும் அதிர்ச்சியை ஏற்படுத்தியுள்ளது.
மருத்துவப் பரிசோதனை மற்றும் பாதிப்பு:
பல்கலைக்கழக வளாகத்தில் உள்ள மாணவ-மாணவிகளுக்கு நேற்று முன்தினம் தீவிர மருத்துவப் பரிசோதனைகள் மேற்கொள்ளப்பட்டன.
இதில் 30-க்கும் மேற்பட்ட மாணவ-மாணவிகளுக்கு உண்ணி காய்ச்சல் தொடர்பான அறிகுறிகள் பரிசோதிக்கப்பட்டு உரிய மாதிரிகள் சேகரிக்கப்பட்டன.
மாணவி மருத்துவமனையில் அனுமதி:
பரிசோதனை முடிவுகளில், அழகப்பா காலேஜ் ஆஃப் டெக்னாலஜி (ACTech) கல்லூரியில் இரண்டாம் ஆண்டு பெட்ரோ கெமிக்கல் இன்ஜினியரிங் பயின்று வரும் கோவையைச் சேர்ந்த மாணவி அபிநயா என்பவருக்கு ரத்தத்தில் தட்டணுக்களின் (Platelets) எண்ணிக்கை மிகவும் குறைவாக இருப்பது தெரியவந்தது.
இதனைத் தொடர்ந்து, உடனடியாக அவர் மேல் சிகிச்சைக்காகத் தரமணியில் உள்ள வி.எச்.எஸ். (VHS) தனியார் மருத்துவமனையில் அனுமதிக்கப்பட்டு தீவிர சிகிச்சைக்கு உட்படுத்தப்பட்டுள்ளார்.
பல்கலைக்கழக வளாகத்தில் காய்ச்சல் பரவல் எதிரொலியாக மாணவர்களிடையே அச்சமும், சுகாதாரப் பணிகள் தீவிரப்படுத்தப்பட வேண்டும் என்ற கோரிக்கையும் எழுந்துள்ளது.